హైదరాబాద్: జీఎంఆర్ హైదరాబాద్ ఇంటర్నేషనల్ ఎయిర్ పోర్ట్ (జీహెచ్ఐఏఎల్) కింగ్ ఫిషర్ ఎయిర్ లైన్స్ కంపెనీ ఛైర్మన్ విజయ్ మాల్యాపై దాఖలు చేసిన చెక్కు బౌన్స్ కేసును ఉపసంహరించుకుంది. కారణం తమకు చెల్లించవల్సిన డబ్బు మొత్తాన్ని చెల్లించేందుకు అంగీకరించడమే. దీంతో విజయ్ మాల్యాతో పాటు మరో నలుగురు సీనియర్ ఎగ్జిక్యూటివ్‌లకు నాన్ బెలయిల్‌బుల్ వారంట్ల నుండి ఊరట లభించింది. రూ. 10.5 కోట్ల బకాయిలు చెల్లించిన కింగ్ ఫిషర్ ఎయిర్ లైన్స్... జీఎంఆర్ హైదరాబాద్ ఇంటర్నేషనల్ ఎయిర్ పోర్ట్‌తో ఈ మేరకు ఒప్పందం కుదుర్చుకున్నట్లు సంబంధిత వర్గాల సమాచారం.

ఇక వివరాల్లోకి వెళితే హైదరాబాద్ ఇంటర్నేషనల్ ఎయిర్ పోర్ట్ యూజర్ ఛార్జీల చెల్లింపునకు సంబంధించి కింగ్ ఫిషర్ ఎయిర్ లైన్స్ ఇచ్చిన చెక్కులు బౌన్స్ అయ్యాయంటూ జీఎంఆర్ కోర్టుకెళ్లడంతో ఈనెల 12న నాన్-బెయిల్‌బుల్ వారంట్లు జారీ అయిన విషయం తెలిసిందే. ఇది ఇలా ఉంటే ఉద్యోగుల సమ్మె కారణంగా లాకౌట్‌ను మరికొన్ని రోజులు పొడిగించాల్సి రావొచ్చని కింగ్ ఫిషర్ ఎయిర్ లైన్స్ సీఈఓ సంజయ్ అగర్వాల్ ముంబైలో తెలిపారు.

గత ఏడు నెలలుగా వేతనాలు అందక ఉద్యోగులు సమ్మెకు దిగిన నేపధ్యంలో వారితో నిన్న(బుధవారం) చర్చలు జరిపారు. ఈ చర్చలు విఫలం కావడంతో వచ్చే సోమవారం మరోసారి చర్చిస్తారని సంబంధిత వర్గాలు తెలిపాయి. నిన్న జరిగిన సమావేశంలో ఒక్క నెల జీతాలు తక్షణమే చెల్లించే ప్రతిపాదన పరిశీలనకి వచ్చిందని ఐతే ఉద్యోగులు దీనికి సుముఖంగా లేరని ఇద్దరు పైలెట్లు చెప్పారు. కింగ్ ఫిషర్ ఉద్యోగుల సమ్మె కారణంగా కింగ్ ఫిషర్ ఎయిర్ లైన్స్ సెప్టెంబర్ 29 నుండి అక్టోబర్ 20 వరకూ విడతల వారీగా లాకౌట్‌ని పొడిగించిన సంగతి తెలిసిందే.

తెలుగు వన్ఇండియా