న్యూయార్క్: అమెరికా బ్యాంకింగ్ దిగ్గజం సిటీ గ్రూప్ సీఈఓ పదవితో పాటు సంస్ద డైరెక్టర్ల సభ్యత్వం నుండి భారత సంతతికి చెందిన విక్రమ్ పండిట్ నిన్న(మంగళవారం) రాజీనామా చేశారు. విక్రమ్ పండిట్ ఈ ఏడాది మూడో క్వార్టర్ (జులై-సెప్టెంబర్)కు సంస్ద నికర లాభం 88 శాతం (46.8 కోట్ల డాలర్లకు) పడిపోయనట్లు ఆర్దిక ఫలితాలను ప్రకటించిన తర్వాత రోజునే ఆయన వైదొలగడం ప్రాధన్యత సంతరించుకుంది. ఇతని స్దానంలో బోర్డు మెంబర్స్ మైఖెల్ కార్బెట్‌ని కొత్త సీఈఓగా ఏకగ్రీవంగా నియమిస్తున్నట్లు తెలిపారు. 55 సంవత్సరాల వయసు కలిగిన విక్రమ్ పండిట్ నాగ్‌పూర్‌లో జన్మించారు. కొలంబియా విశ్వవిద్యాలయం నుండి గ్రాడ్యుయేషన్ పూర్తి చేశారు.

2007 డిసెంబర్ నుండి దాదాపు ఐదేళ్లపాటు సిటీ గ్రూప్‌నకు విక్రమ్ పండిట్ సేవలందించారు. 2008లో ప్రపంచ ఆర్దిక సంక్షోభం నుండి కొనసాగుతున్న అనిశ్చిత పరిస్దితుల్లో సిటీ గ్రూప్ బ్యాంకింగ్ వ్యవస్దను ముందుండి నడిపించారు. ఇది ఇలా ఉంటే కంపెనీ ప్రెసిడెంట్, ఛీఫ్ ఆపరేటింగ్ ఆఫీసర్ (సీఓఓ) జాన్ హవెన్స్ కూడా రాజీనామా చేశారు. వీరిద్దరూ ఇలా సడన్‌గా తమ తమ బాధ్యతల నుండి వైదొలగడానికి గల కారణాలను మాత్రం సిటీ గ్రూప్ వెల్లడించ లేదు. తీవ్ర ఆర్దిక సంక్షోభంలో సిటీ బ్యాంక్‌ సీఈఓగా బాధ్యతలను తీసుకున్న విక్రమ్ పండిట్ 2009, 2010 సంవత్సరాల్లో బ్యాంకును నష్టాల నుండి గట్టెక్కించేందుకు తీవ్ర ఒత్తిడిని ఎదుర్కోన్నారు.

ఈ సందర్బంలో సిటీ బ్యాంక్ లాభాల్లోకి వచ్చేదాకా ఏడాదికి ఒక్క డాలర్ వేతనాన్ని మాత్రమే తీసుకుంటానని చెప్పి ప్రపంచ వ్యాప్తంగా అందరి దృష్టిని ఆకర్షించారు. ఆ తర్వాత సంస్ద లాభాల్లోకి రావడంతో భారీ మొత్తంలో ప్యాకేజీని తీసుకున్నారు. ఆర్దిక సంక్షోభం నుండి మళ్లీ పటిష్టమైన ఫైనాన్షియల్ సంస్దగా సిటీ గ్రూప్ గత కొన్ని సంవత్సరాలుగా పుంజుకుందని సంస్ద పగ్గాలను మరొకరెవరైనా చేపట్టేందుకు ఇదే సరైన సమయంగా భావించి తన రాజీనామాని సమర్పించానని విక్రమ్ పండిట్ తెలిపారు. కొత్త సీఈఓగా బాధ్యతలను చేపట్టిన మైఖెల్ కార్బెట్‌ భవిష్యత్తులో రాబోయే సవాళ్లను దీటుగా ఎదుర్కోనగల వ్యక్తిగా అభివర్ణించాడు.

తెలుగు వన్ఇండియా