అంతక ముందు సెప్టెంబర్ 28న పాక్షిక లాకౌట్‌ని ప్రకటించి.. ఆ తర్వాత అక్టోబర్ 4వ తారీఖు వరకూ సేవలను రద్దు చేసింది. ఉద్యోగులు మరియు యాజమాన్యం మధ్య చర్చలు విఫలం కావడంతో దీనిని అక్టోబర్ 12 వరకూ పొడిగించి.. మళ్లీ లాకౌట్‌ను ఈ నెల 20వ తారీఖు వరకు పొడిగించింది. కింగ్‌ఫిషర్‌ ఎయిర్‌లెైన్స్‌ తిరిగి తమ కార్యకలాపాలను ప్రారంభించాలంటే పౌర విమాన యానశాఖ డెైరెక్టర్‌ జనరల్‌ (డీజీసీఏ)కు ఖచ్చితమైన హామీలు ఇవ్వాలి. కేవలం డబ్బే కాదు... ప్రయాణికుల భద్రతతో పాటు ఉద్యోగులకు బకాయిలు చెల్లిస్తేనే తిరిగి యధావిధిగా విమాన సర్వీసులు పునరుద్ధరణకు అనుమతి ఇస్తామని పౌర విమానయానశాఖ మంత్రి అజిత్‌సింగ్‌ అన్నారు.

ఇటీవలే డీజీసీఏ కింగ్‌ఫిషర్‌కు షోకాజ్‌ నోటీసు జారీ చేసింది. కింగ్‌ఫిషర్ ఎయిర్ లైన్స్‌‌కి విమానయాన రంగ నియంత్రణ సంస్ద డీజీసీఏ (డైరెక్టరేట్ ఆఫ్ సివిల్ ఏవియేషన్) నిన్న (శుక్రవారం) షోకాజ్ నోటీసు జారీ చేసింది. సురక్షితమైన, విశ్వసనీయమైన సర్వీసులు అందించడంలో విఫలమైనందున లైసెన్సును ఎందుకు రద్దు చేయకూడదో కోరుతూ 15 రోజుల్లో వివరణ ఇవ్వాలని కోరింది. గత 10 నెలలుగా షెడ్యూల్‌ను పాటించకుండా నిబంధనల ఉల్లంఘనకు పాల్పడుతోందని డైరెక్టర్ జనరల్ ఆఫ్ సివిల్ ఏవియేషన్ అరుణ్ మిశ్రా పేర్కోన్నారు.

కింగ్‌ఫిషర్ చెల్లించాల్సిన రూ. 1,580 కోట్ల రుణాలను ఎస్‌బీఐ ఇప్పటికే నిరర్థక ఆస్తిగా వర్గీకరించింది. బ్యాంకులకు కింగ్‌ఫిషర్ దాదాపు రూ. 7,000 కోట్ల మేర రుణాలను తిరిగి చెల్లించాల్సి ఉంది. డీజీసీఏ నోటీసుపై స్పందిస్తూ.. తాము గడువులోగా వివరణ పంపుతామని కింగ్‌ఫిషర్ తెలిపింది. అలాగే, ఉద్యోగులతో చర్చలు జరిపిన తర్వాత సర్వీసుల పునరుద్ధరణపై సమగ్ర ప్రణాళిక సమర్పిస్తామని వివరించింది.

తెలుగు వన్ఇండియా