న్యూఢిల్లీ: లిక్కర్ కింగ్ విజయ్ మాల్యాకు చెందిన కింగ్‌ఫిషర్ ఎయిర్‌లైన్స్ సంస్దలో ఇటీవల ప్రకటించిన లాకౌట్‌ను తాజాగా ఈనెల 20 వరకూ పొడిగించారు. జీతాల చెల్లింపులో తీవ్ర జాప్యాన్ని నిరసిస్తూ సమ్మె చేస్తున్న ఉద్యోగులను తిరిగి విధుల్లో చేరవలసిందిగా యాజమాన్యం చేసిన విజ్ఞప్తి ఫలించకపోడవంతో లాకౌట్ పొడిగింపునకు దారితీసినట్లు సమాచారం. నిర్వహణ సంబంధమైన కారణాల వల్ల సంస్దకు చెందిన విమాన సర్వీసులన్నింటిని అక్టోబర్ 20 వరకు రద్దు చేసినట్లు యాజమాన్యం ఉద్యోగులకు తెలిపినట్లు కింగ్‌ఫిషర్ ఎయిర్ లైన్స్ సంస్ద పేర్కొంది. ఇది ఇలా ఉంటే విమాన సర్వీసులను త్వరగా తిరిగి ప్రారంభించడానికి ఉద్యోగులందరూ పనిలోకి రావాలను కోరుతూ సీఈవో సంజయ్ అగర్వాల్ గురవారం లేఖ రాసిన విషయం తెలిసిందే.

అంతక ముందు అక్టోబర్ 13 (శనివారం) నుండి కింగ్ ఫిషర్ ఎయిర్‌లైన్స్ బుకింగ్స్ ప్రారంభిస్తుందని వార్తలు వచ్చిన నేపధ్యంలో విమానయాన నియంత్రణ సంస్ద డీజీసీఏ టిక్కెట్ల విక్రయాలను ఆపివేయాలని కింగ్ ఫిషర్ ఎయిర్‌లైన్స్‌కు ఆదేశాలు జారీ చేసింది. కింగ్‌ఫిషర్ ఎయిర్ లైన్స్ ఇటీవల సెప్టెంబర్ 28న పాక్షిక లాకౌట్‌ని ప్రకటించి.. ఆ తర్వాత అక్టోబర్ 4వ తారీఖు వరకూ సేవలను రద్దు చేసింది. ఉద్యోగులు మరియు యాజమాన్యం మధ్య చర్చలు విఫలం కావడంతో దీనిని అక్టోబర్ 12 వరకూ పొడిగించిన విషయం తెలిసిందే.

దీంతో శుక్రవారం నుండి ప్రారంభమయ్యే విమాన సర్వీసుల కోసం టిక్కెట్ల విక్రయాలు ప్రారంభమయ్యాయని ట్రావెల్ ఏజెంట్లు చెప్పారు. ఉద్యోగుల వేతన బకాయిల కోసం రూ. 60 కోట్లు విడుదల చేశామని బ్యాంకులు చెప్పగా, ఇంతవరకూ తామెలాంటి వేతనాలు అందుకోలేదని ఉద్యోగులు వాపోయారు. మరోవైపు నిన్న న్యూఢిల్లీలోని జంతర్ మంతర్ వద్ద కంపెనీ యాజమాన్యం తమ ఇబ్బందులు పట్టించుకోవడం లేదని ఏడు నెలల బకాయిలను తక్షణం చెల్లించాలని డిమాండ్ చేస్తూ ప్లకార్డులు పట్టుకోని నిరసన ప్రదర్శన నిర్వహించారు. చర్చలు జరపడానికి ఉద్యోగులు సిద్దంగా ఉన్నప్పటికీ.. యాజమాన్యం నుండి ఎలాంటి ప్రతిస్పందన రాలేదని, కొద్ది రోజుల్లో భవిష్యత్ కార్యచరణను తెలుపుతామని అన్నారు.

కింగ్‌ఫిషర్‌ ఎయిర్‌లెైన్స్‌ తిరిగి తమ కార్యకలాపాలను ప్రారంభించాలంటే పౌర విమాన యానశాఖ డెైరెక్టర్‌ జనరల్‌ (డీజీసీఏ)కు ఖచ్చితమైన హామీలు ఇవ్వాలి. కేవలం డబ్బే కాదు... ప్రయాణికుల భద్రతతో పాటు ఉద్యోగులకు బకాయిలు చెల్లిస్తేనే తిరిగి యధావిధిగా విమాన సర్వీసులు పునరుద్ధరణకు అనుమతి ఇస్తామని పౌర విమానయానశాఖ మంత్రి అజిత్‌సింగ్‌ అన్నారు. దీంతో కింగ్‌ఫిషర్ పాక్షికంగా లాకౌట్‌ను ప్రకటించిన నేపథ్యంలో ఉద్యోగుల సమ్మె ప్రభావాలను కూడా డీజీసీఏ పరిశీలిస్తున్నట్లు పౌర విమానయాన శాఖ మంత్రి అజిత్ సింగ్ తెలిపారు.

తెలుగు వన్ఇండియా