న్యూఢిల్లీ: ఆర్దిక ఇబ్బందుల్లో ఉన్న కింగ్‌ఫిషర్ ఎయిర్ లైన్స్‌కు మరిన్ని కష్టాలు వచ్చాయి. కింగ్‌ఫిషర్ ఎయిర్ లైన్స్‌‌కి విమానయాన రంగ నియంత్రణ సంస్ద డీజీసీఏ (డైరెక్టరేట్ ఆఫ్ సివిల్ ఏవియేషన్) నిన్న (శుక్రవారం) షోకాజ్ నోటీసు జారీ చేసింది. సురక్షితమైన, విశ్వసనీయమైన సర్వీసులు అందించడంలో విఫలమైనందున లైసెన్సును ఎందుకు రద్దు చేయకూడదో కోరుతూ 15 రోజుల్లో వివరణ ఇవ్వాలని కోరింది. గత 10 నెలలుగా షెడ్యూల్‌ను పాటించకుండా నిబంధనల ఉల్లంఘనకు పాల్పడుతోందని డైరెక్టర్ జనరల్ ఆఫ్ సివిల్ ఏవియేషన్ అరుణ్ మిశ్రా పేర్కోన్నారు.

కింగ్‌ఫిషర్ ఎయిర్ లైన్స్ ఇటీవల సెప్టెంబర్ 28న పాక్షిక లాకౌట్‌ని ప్రకటించి.. ఆ తర్వాత అక్టోబర్ 4వ తారీఖు వరకూ సేవలను రద్దు చేసింది. ఉద్యోగులు మరియు యాజమాన్యం మధ్య చర్చలు విఫలం కావడంతో దీనిని అక్టోబర్ 12 వరకూ పొడిగించింది. దీంతో కింగ్‌ఫిషర్ పాక్షికంగా లాకౌట్‌ను ప్రకటించిన నేపథ్యంలో ఉద్యోగుల సమ్మె ప్రభావాలను కూడా డీజీసీఏ పరిశీలిస్తున్నట్లు పౌర విమానయాన శాఖ మంత్రి అజిత్ సింగ్ తెలిపారు.

ఇది ఇలా ఉంటే మానవత దృక్పధంతో కింగ్‌ఫిషర్ ఎయిర్ లైన్స్‌కు నిధులు సమకూర్చాలని బ్యాంకులు నిర్ణయించాయి. గత ఏడు నెలలుగా వేతనాలు లేక ఉద్యోగులు ఇబ్బందులు పడుతున్నందున ఎస్కో అకౌంట్ల నుండి కింగ్‌ఫిషర్‌కు నిధులు అందించాలని నిర్ణయం తీసుకున్నట్లు స్టేట్ బ్యాంక్ ఆఫ్ ఇండియా ఛైర్మన్ ప్రతీప్ చౌధరి తెలిపారు. ఈ నేపథ్యంలో కంపెనీకి రూ.60 కోట్ల వరకూ సమకూరే అవకాశం ఉంది. ఉద్యోగులు వేతనాలు చెల్లించడానికి వీటిని వినియోగించే అవకాశం ఉంది. కింగ్‌ఫిషర్ చైర్మన్ విజయ్ మాల్యా కొత్త ఇన్వెస్టర్‌ వెతుకులాట కోసం బ్యాంకులు వేచి చూసే ధోరణిలో ఉన్నట్లు ఆయన చెప్పారు.

కింగ్‌ఫిషర్ చెల్లించాల్సిన రూ. 1,580 కోట్ల రుణాలను ఎస్‌బీఐ ఇప్పటికే నిరర్థక ఆస్తిగా వర్గీకరించింది. బ్యాంకులకు కింగ్‌ఫిషర్ దాదాపు రూ. 7,000 కోట్ల మేర రుణాలను తిరిగి చెల్లించాల్సి ఉంది. డీజీసీఏ నోటీసుపై స్పందిస్తూ.. తాము గడువులోగా వివరణ పంపుతామని కింగ్‌ఫిషర్ తెలిపింది. అలాగే, ఉద్యోగులతో చర్చలు జరిపిన తర్వాత సర్వీసుల పునరుద్ధరణపై సమగ్ర ప్రణాళిక సమర్పిస్తామని వివరించింది.

తెలుగు వన్ఇండియా