సాంకేతికలోపం ట్రేడింగ్ నిలిపివేత.. 13 ని తర్వాత మళ్లీ పునః ప్రారంభం

ముంబై: స్టాక్ మార్కెట్ అయిన నేషనల్ స్టాక్ ఎక్సేంజ్‌లో ఈరోజు ఉదయం సాంకేతిక సమస్య ఏర్పడింది. ఈ ఉదయం ఒకే ఒక్క నిమిషంలో నిప్టీ 900 పాయింట్ల దాకా కోల్పోతూ 4,888 పాయింట్లను తాకింది. ఆ తర్వాత మరో నిమిషంలో ట్రేడింగ్ 5,525 పాయింట్లకు చేరడంతో క్యాష్ సెగ్మెంట్లో ట్రేడింగ్‌ను నిలిపివేశారు. అప్పటికే నిప్టీ నష్టం 162 పాయింట్లకు చేరింది. ఆ తర్వాత ట్రేడింగ్‌ను 13 నిమిషాల తర్వాత పునః ప్రారంభించారు. దీంతో నిప్టీ లాభంలోకి వచ్చి 5,800 పాయింట్లను అధిగమించింది. మధ్యాహ్నం ఒంటిగంట ప్రాంతంలో నిప్టీ 37 పాయింట్ల దాకా కోల్పోతూ 5,749కు సమీపంలో ట్రేడవుతోంది.

ఇక సెన్సెక్స్ 113 పాయింట్ల దాకా కోల్పోతూ 18, 944 పాయింట్లకి సమీపంలో ట్రేడవుతోంది. ఆటో, ఎఫ్ ఎంసీజీ తప్పించి అన్ని సెక్టోరియల్ సూచీలు నష్టపోతున్నాయి. రియాల్టీ, పవర్, ఐటీ సూచీలు ఎక్కువగా కోల్పోతున్నాయి. గ్రూపు ఏలో ఒబెరాయ్ రియాల్టీ, హెచ్ డీఎఫ్‌సీ, అదాని పవర్, సెంట్రల్ బ్యాంకు, అరబిందో ఫార్మా పేర్లు 4 నుండి నాలుగున్నర శాతం పడుతూ టాప్ లూజర్స్‌గా ఉన్నాయి. అదే సమయంలో గీతాంజలి జెమ్స్, ఎల్ అండ్ టీ ఫైనాన్స్ హోల్డింగ్స్, కోల్ ఇండియా, హిందూస్తాన్ యూనిలీవర్ షేర్లు 1 నుండి రెండున్నర శాతం లాభపడుతూ టాప్ గెయినర్స్‌గా ఉన్నాయి.

ఇక ప్రపంచ స్టాక్ మార్కెట్లు చాలా వరకు లాభాల్లో ఉన్నాయి. వడ్డీ రేట్లు స్దిరంగా ఉంచుతామని యూరోపియన్ సెంట్రల్ బ్యాంకు ప్రసిడెంట్ ప్రకటించారు. దీన్ని ఇన్వెస్టర్లు పాజిటివ్‌గా తీసుకున్నారు. డౌజోన్స్ 0.59 శాతం పెరిగి 3,149 వద్ద ముగిసింది. యూరోప్ మార్కెట్లలో జర్మనీ సూచీ 0.23 శాతం పడగా ఫ్రాన్స్ సూచీ 0.14 శాతం నష్టపోయింది. బ్రిటన్ సూచీ ఫ్లాట్‌గా ముగిసింది. జపాన్, హాంకాంగ్ సూచీలు అర శాతం దాకా లాభపడ్డాయి.

తెలుగు వన్ఇండియా