ముంబై: కేంద్ర ప్రభుత్వం సంస్కరణలను ప్రవేశపెట్టడంతో రూపాయి మారకం విలువ ఎన్నడూ లేని విధంగా 6 నెలలు తర్వాత మళ్లీ 51 స్దాయిని చూసింది. నిన్న (గురువారం) డాలర్‌తో పోలిస్తే 42 పైసలు బలపడి 51.74 వద్ద ముగిసింది. అంతర్జాతీయంగా డాలర్ బాగా బలహీనంగా ఉన్న సంకేతాలతో ఎగుమతిదారులు, బ్యాంకులు డాలర్ల అమ్మకాలను కొనసాగించడం వల్లే ఇది జరిగింది. ఇక ఫారెక్స్ మార్కెట్లో క్రితం ముగింపు కన్నా కాస్త మెరుగుపడి 52 వద్ద ప్రారంభమైన రూపాయి, ఆ తర్వాత కనిష్ట స్దాయి 52.10ని తాకింది.

విదేశీ సంస్దాగత ఇన్వెస్టర్ల నుండి పెట్టుబడులు పెద్ద ఎత్తున రావడంతో ఒక దశలో రూపాయి మారకం విలువ 51.66 గరిష్ట స్దాయికి చేరింది. చివరకు 0.80 శాతం పెరిగి 51.74 వద్ద ముగిసింది. వడ్డీ రేట్లపై బ్యాంక్ ఆఫ్ ఇంగ్లాండ్, యూరోపియన్ సెంట్రల్ బ్యాంకులు కీలక నిర్ణయాలు తీసుకోనున్న నేపధ్యంలో డాలర్ బలహీనంగా ఉండడం, విదేశాల నుండి నిధులు పెద్ద ఎత్తున రావడం వంటి కారణాలతో రూపాయి దాదాపు 3.3 శాతం మేరకు బలపడింది. అంతక ముందు జూన్ ఆఖర్లో రూపాయి ఎన్నడూ లేని విధంగా కనిష్టమైన 57.3కి పడిపోయిన విషయం తెలిసిందే.

తెలుగు వన్ఇండియా