బెంగుళూరు: ఆర్దిక సమస్యతో ఇబ్బందిపడుతున్న కింగ్‌ఫిషర్ ఎయిర్ లైన్స్ తనకు రూ. 200 కోట్లు వర్కింగ్ లోన్‌ను తక్షణం మంజూరు చేయాల్సిందిగా చేసిన అభ్యర్ధనను స్టేట్ బ్యాంక్ ఆఫ్ ఇండియా నేతృత్వంలోని బ్యాంకుల కూటమి(కన్సార్షియమ్) తిరస్కరించింది. కంపెనీని పునర్‌వ్య వస్థీకరణకు 2-3 వారాల్లోగా కొత్త ప్రణాళికను సిద్ధం చేయాలంటూ ఎస్‌బీఐ క్యాపిటల్స్‌కు సూచించింది. కింగ్‌ఫిషర్ ఎయిర్‌లైన్స్ చైర్మన్ విజయ్ మాల్యా.. గురువారం బెంగళూరులో బ్యాంకర్లతో సమావేశమయ్యారు. ఆర్థిక సంక్షోభంలో ఉన్న సంస్థను పునర్‌వ్యవస్థీకరించే ప్రణాళికను వారితో చర్చించారు.

దేశీయ విమానయాన సంస్దల్లో విదేశీ విమాన సంస్దలు పెట్టుబడులు పెట్టడానికి అనుమతిస్తూ కేంద్రం నిర్ణయం తీసుకున్న తర్వాత ఈ విధమైన సమావేశం జరగడం ఇదే తొలిసారి. కింగ్ ఫిషర్ ఎయిర్‌లైన్స్‌కు అదనంగా సాయం చేయాలంటే కింగ్ ఫిషర్ ఎయిర్‌లైన్స్ ప్రమోటర్లు మరికొంత పెట్టుబడిని తీసుకురావాలని బ్యాంకులు గతంలోనే షరతు విధించిన విషయం తెలిసిందే. కానీ, సంస్ద పునరుద్దరణకు సంబంధించి ఆ దిశగా విజయ్ మాల్యా ఎటువంటి ప్రతిపాదన చేయలేదని తెలిసింది.

కింగ్ ఫిషర్ ఎయిర్‌లైన్స్ తాను తీసుకున్న రూ. 7000 కోట్ల బ్యాంకు రుణానికి ఈ ఏడాది జనవరి నుండి ఎటువంటి చెల్లింపులూ చేయలేదు. ఇప్పటికే తనఖాలో ఉన్న గోవా విల్లా బదులుగా మరో ప్రాపర్టీని తనఖా పెట్టేం దుకు మాల్యా ప్రతిపాదించగా బ్యాంకర్లు ఏ నిర్ణయ మూ తీసుకోలేదు. వచ్చే నెల మూడో వారంలో బ్యాంకర్లు, కంపెనీ యాజ మాన్యం మరోసారి సమావేశం కానుంది. కంపెనీ బకాయిలు దాదాపు రూ. 7,000 కోట్ల మేరకు పేరుకుపోయిన సంగతి తెలిసిందే.

ఇది ఇలా ఉంటే కింగ్‌ఫిషర్‌ వారం వారం చెల్లించాల్సిన చెల్లింపులు చెల్లించడం లేదని పన్ను అధికారి ఒకరు చెప్పారు. తిరగి ఈ పన్ను మొత్తం రూ.60 కోట్లకు చేరందని ఆయన అన్నారు. కింగ్‌ఫిషర్‌కు చెందిన పలు ఖాతాలను పన్ను అధికారులు స్తంభింపచేశారరని ముంబయి సర్వీసు టాక్స్‌ కమిషనర్‌ సుశీల్‌ సోలంకీ చెప్పారు. దీంతో పాటు ఎయిర్‌ ఇండియా కూడా సుమారు రూ.250 కోట్ల మేర సర్వీసు టాక్స్‌ చెల్లించాల్సి ఉందని ఆయన పేర్కొన్నారు. ఎయిర్‌ ఇండియా కూడా తమకు కొత్తగా పెట్టుబడులు వస్తే మొత్తం ఒకేసారి చెల్లిస్తామని హామీ ఇచ్చిందని చెప్పారు. ఎయిర్‌ ఇండియాకు చెందిన కొన్ని ఖాతాలను కూడా స్తంభింపచేశామని ఆయన చెప్పారు.

తెలుగు వన్ఇండియా