వాషింగ్టన్: ప్రపంచ ఆర్థిక సంక్షోభం బారినపడకుండా భారత్ బ్యాంకులు భద్రంగానే ఉన్నాయని అంతర్జాతీయ ద్రవ్యనిధి (ఐఎంఎఫ్ ) తన నివేదికలో పేర్కొంది. ఇంటర్నేషనల్‌ బ్యాంకింగ్ వ్యవస్థతో ఇక్కడి బ్యాంకులు చాలా తక్కువగా అనుసంధానమై ఉండటమే ఇందుకు కారణమని తెలిపింది. ఇతర దేశాలతో పోలిస్తే భారత్, మలేసియా బ్యాంకులు అన్ని అంశాల్లోనూ విదేశీ బ్యాంకుల మాదిరే ఇబ్బందుల నుండి సురక్షితంగా ఉన్నట్లు వెల్లడించింది. ఇదే జాబితాలో ఆస్ట్రేలియా, కెనడాలు కూడా ఉన్నాయి. భారత్, మలేసియాల్లో విదేశీ బ్యాంకుల కార్యకలాపాలు స్వల్పంగా ఉండటంతో పాటు ఖాతాల్లో చాలా తక్కువ స్థాయిలో విదేశీ రుణాలు ఉన్నాయని నివేదిక పేర్కొంది.

ఐఎంఎఫ్ వెల్లడించిన నివేదకలో భారత్ బ్యాంకింగ్ వ్యవస్థ వాటా 10 శాతం కంటే తక్కువ కావడం గమనార్హం. కొన్ని విధానపరమైన సడలింపులు ఇస్తున్నప్పటికీ భారత్, మలేసియాలు విదేశీ బ్యాంకుల ప్రవేశం, కార్యకలాపాలపై నియంత్రణలను కొనసాగిస్తున్నాయని కూడా ఐఎంఎఫ్ నివేదిక వివరించింది. సంక్షోభం మొదలై అయిదేళ్లు గడిచిపోయినా, ప్రపంచ ఆర్థిక వ్యవస్థ ఇంకా బలహీనంగానే ఉందని ఐఎంఎఫ్ పేర్కొంది. దీన్ని బాగుపర్చాలంటే నియంత్రణ సంస్థలు, ప్రైవేట్ రంగం, పర్యవేక్షకులు చేయాల్సింది ఎంతైనా ఉందని చెప్పింది.

తెలుగు వన్ఇండియా