మార్కెట్లో ఇతర ఎక్సేంజ్‌ల నుండి పెరుగుతున్న పోటీ నేపథ్యంలో ఎన్‌ఎస్‌ఈ (నేషనల్ స్టాక్ ఎక్స్ఛేంజ్) కొత్త సభ్యత్వ కార్యక్రమాన్ని ప్రారంభించింది. ఆల్పా పేరుతో ప్రారంభించిన ఈ విభాగంలో సభ్యత్వం పొందడానికి చేయాల్సిన డిపాజిట్, సభ్యుడికి ఉండాల్సిన నికర విలువ తక్కువగా ఉంటాయి. ఖాతాదారులకు ట్రేడింగ్ సేవలందించని సంస్దలు మాత్రమే ఈ విభాగంలో సభ్యత్వం పొందడానికి వీలుంటుంది. ఔత్సాహిక పారిశ్రామిక వేత్తలు, వృత్తి పరంగా ట్రేడింగ్ చేసే వారిని దృష్టిలో పెట్టుకోని ఈ విభాగాన్ని ప్రవేశపెట్టారు. ఎన్‌ఎస్‌ఈ రూ.20 లక్షల డిపాజిట్‌తో క్యాపిటల్ మార్కెట్ విభాగ సభ్యత్వాన్ని ఇస్తుంది.

ఎఫ్‌అండ్‌ఓ విభాగానికి ఈ మొత్తం రూ. 25 లక్షలుగా ఉంది. ప్రస్తుతం అనుసరిస్తున్న విధానం ప్రకారం రూ.1.10 కోట్లకు 2 విభాగాలూ సభ్యులకు అందుబాటులో ఉన్నాయి. కొత్త కేటగిరీ కింద నెట్‌వర్త్ అర్హతను సైతం 50% కుదించి, రూ.50 లక్షలకు తగ్గించింది. ‘ఆల్ఫా' పేరుతో ఈ మెంబర్‌షిప్ కార్యక్రమం మంగళవారం నుంచీ ప్రారంభమవుతుంది. ప్రస్తుతం సభ్యులుగా ఉన్న వారు కూడా కొత్త కేటగిరిలోకి మారడానికి ఎన్ఎస్‌ఈ వెసులుబాటు కల్పించింది. ఇది ఇలా ఉంటే నేషనల్ స్టాక్ ఎక్సేంజ్ (ఎన్ఎస్‌ఈ) నూతన ఛైర్మన్‌గా ఎస్ బి మాథుర్ నియమితులయ్యే అవకాశం ఉంది. ఎస్ బి మాథుర్ గతంలో ఎల్‌ఐసీకి ఛైర్మన్‌గా పనిచేశారు.

గత వారం వరకు ఎస్ ఎస్ఈ ఛైర్మన్ పదవిలో కొనసాగిన విజయ్ కేల్కర్ వైదొలిగిన విషయం తెలిసిందే. ఐతే ఎస్ఎస్ఈతో ఆయన అనుబంధం మాత్రం కొనసాగుతుంది. అడ్వయిజరీ బోర్డు ఛైర్మన్‌‌గా ఆయన కొనసాగుతారు.

తెలుగు వన్ఇండియా