చెన్నై: ప్రభుత్వ రంగ బ్యాంకు బ్యాంక్ ఆఫ్ బరోడా(బీఓబీ) ప్రస్తుత ఆర్దిక సంవత్సరంలో దేశ, విదేశాల్లో 500కు పైగా శాఖలను ఏర్పాటు చేయడంతో పాటు.. వచ్చే నాలుగేళ్లలో దాదాపు 20 వేల మంది కొత్త ఉద్యోగులను నియమించుకొనే దిశగా ప్రణాళికలను సిద్దం చేస్తున్నట్లు బ్యాంక్ ఆఫ్ బరోడా(బీఓబీ) ఛైర్మన్, మేనేజింగ్ డైరెక్టర్ ఎండి మాల్యా తెలిపారు. సోమవారం ఇక్కడ బ్యాంక్ కొత్త జోనల్ కార్యాలయాన్ని(బరోడా ప్రైడ్ పేరుతో) ప్రారంభించిన సందర్భంగా విలేకరులతో మాట్లాడుతూ పై వివరాలను వెల్లడించారు.

ప్రస్తుతం బ్యాంక్ ఆఫ్ బరోడాకి దేశ వ్యాప్తంగా 4,000 శాఖలు, విదేశాల్లో 96 శాఖలు, ఆఫీసులు ఉన్నాయని అన్నారు. ఆస్ట్రేలియా నియంత్రణ సంస్థ నుంచి బ్యాంకింగ్ లెసైన్స్ లభించిందని, త్వరలోనే అక్కడ కార్యాలయాన్ని ఏర్పాటు చేసేందుకు సన్నాహాలు చేస్తున్నామన్నారు. వచ్చే మార్చి నాటికి 500 దేశీయ బ్యాంక్ శాఖలు, 4 కొత్త విదేశీ కార్యాలయాలను(ఉగాండా, కెన్యాల్లో ఒక్కోటి, దుబాయ్‌లో రెండు) ప్రారంభించే ఆలోచనలో ఉన్నట్లు తెలిపారు. దీంతో అంతర్జాతీయ నెట్‌వర్క్ 100కు చేరుతుంది. అదేవిధంగా మరో 500 ఏటీఎంలను అదనంగా ఏర్పాటు చేసే ప్రయత్నాలు జరుగుతున్నాయి. ప్రస్తుతం ప్రపంచ వ్యాప్తంగా 2,000 పైచిలుకు ఏటీఎంలు ఉన్నాయి. ప్రస్తుతం బ్యాంక్ ఆఫ్ బరోడా 25 దేశాల్లో తన కార్యకలాపాలను కొనసాగిస్తోందని మాల్యా వెల్లడించారు.

తెలుగు వన్ఇండియా