న్యూఢిల్లీ: స్టాక్ మార్కెట్లలో, స్దిరాస్తిలో పెట్టిన పెట్టుబడుల కన్నా బంగారంలో పెట్టిన పెట్టుబడులు ఆధిక ప్రతిఫలాన్ని అందించినట్లు 2009 సెప్టెంబర్ నుండి ఈ ఏడాది సెప్టెంబర్ మధ్య బంగారంలో పెట్టుబడులు పెట్టిన వారు రెట్టింపు ప్రతిఫలాలను అందుకున్నట్లు అసోచామ్ తన అధ్యయనంలో పేర్కొంది. మూడేళ్ల క్రితం 10 గ్రాముల బంగారం ధర రూ.15,000 ఉండగా, ప్రస్తుతం రూ.32,000కు చేరింది. భవిష్యత్తులో కూడా బంగారం పట్ల ఇన్వెస్టర్ల విశ్వాసం కొనసాగుతుందన్న అభిప్రాయాన్ని అసోచామ్ సెక్రటరీ జనరల్ డీఎస్ రావత్ పేర్కొన్నారు. అంతర్జాతీయ అనిశ్చితి పరిస్థితులే దీనికి కారణమని ఆయన అన్నారు.

డాలర్ మారకంలో రూపాయి బలహీనత బంగారం ధరను మరింత ముందుకు తీసుకువెళ్లినట్లు ఆయన విశ్లేషించారు. రూపాయి పతనం కావడంతో పాటు అంతర్జాతీయ మార్కెట్లో బంగారం ధరలు పెరగడంతో ఇక్కడ కూడా బంగారం ధరలు పెరిగాయని అధ్యయనంలో తేలింది. బంగారంతో పాటు స్థిరాస్థిలో పెట్టుబడి పెట్టిన వారికి కూడా మంచి రిటర్న్‌లు దక్కాయని పేర్కొంది. అయితే బంగారంతో పోల్చుకుంటే అంత పెద్ద లాభాలు రాలేదని చెప్పాలి. అయితే పెద్ద నగారల్లో స్థిరాస్తిలో పెట్టుబడి పెట్టిన వారికి రెండింతలు లాభాలు వచ్చాయి. ఢిల్లీ, ముంబయి, చెన్నై, గుర్‌గావ్‌లాంటి ప్రాంతాల్లో మూడు సంవత్సరాల క్రితం స్థిరాస్థి కొనుగోలు చేసిన వారు ఇప్పుడు విక్రయించాలనుకుంటే వారికి రెట్టింపు లబ్ధి వస్తుందని అధ్యయనంలో పేర్కొంది.

రియల్టీలో పెట్టుబడులు మంచి రిటర్న్స్ ఇచ్చినప్పటికీ, బంగారంతో పోల్చితే ఇవి తక్కువగా ఉన్నట్లు అధ్యయనం వెల్లడించింది. ఈక్విటీ మార్కెట్‌లో పెట్టుబడులు మాత్రం మెజారిటీ ఇన్వెస్టర్లకు సంతృప్తిని ఇవ్వలేదని అసోచామ్ స్పష్టం చేసింది. గడచిన మూడేళ్ల కాలంలో ఈక్విటీల్లో పెట్టుబడులు కొంత హరించుకుపోయినట్లు అసోచామ్ అధ్యయనంలో తెలిపింది.

తెలుగు వన్ఇండియా