రానున్న ఏడాది - ఏడాదిన్నరలో భారత్‌లో తమ స్టోర్స్‌ను ప్రారంభగలమన్న ఆశాభావాన్ని వాల్ మార్ట్ వ్యక్తం చేసింది. వివరాల్లోకి వెళితే రిటైల్ దిగ్గజం వాల్‌మార్ట్ స్టోర్స్ ప్రెసిడెంట్ (ఆసియా విభాగం) స్కాట్ ప్రైస్ మాట్లాడుతూ మల్టీ బ్రాండ్ రిటైల్‌లో ప్రత్యక్ష విదేశీ పెట్టుబడులకు సానుకూలంగా ఉన్న రాష్ట్రాల్లో వచ్చే 12-18 నెలల్లో తమ స్టోర్స్‌ను ప్రారంభిస్తామన్నారు. ఇందుకోసం ఆయా రాష్ట్రాల నుంచి అనుమతులు తీసుకుంటామని వాల్ స్ట్రీట్ జర్నల్‌కి ఇచ్చిన ఇంటర్వ్యూలో ఆయన తెలిపారు. ఆంధ్రప్రదేశ్‌తో సహా 10 రాష్ట్రాలు, కేంద్రపాలిత ప్రాంతాల్లో స్టోర్లను ఏర్పాటు చేసేందుకు విదేశీ దిగ్గజ రిటైల్ కంపెనీలు ఆసక్తి చూపుతున్న విషయం తెలిసిందే.

అయితే, భారత్‌లో ఎన్ని స్టోర్స్ పెట్టాలన్నదీ ఇంకా నిర్ణయించలేదని ప్రైస్ వివరించారు. రిటైల్‌లో భారతీ ఎంటర్‌ప్రైజెస్‌తో తమ భాగస్వామ్యం కొనసాగుతుందని పేర్కొన్నారు. ఇక, మల్టీ బ్రాండ్ రిటైల్‌లో అటు హాలీడే సీజన్ సందర్భంగా అమెరికాలో 50,000 మంది సిబ్బందిని తాత్కాలిక ప్రాతిపదికన తీసుకోనున్నట్లు సంస్థ తెలిపింది. ఇది ఇలా ఉంటే న్యూయార్క్ సిటీలో స్టోర్ తెరిచేందుకు సంస్థ చేస్తున్న ప్రయత్నాలు మరోసారి బెడిసికొట్టాయి. వాల్‌మార్ట్ రాకపై స్థానిక యూని యన్లు, చిన్న వ్యాపారుల నుంచి తీవ్ర వ్యతిరేకత వ్యక్తమవడంతో న్యూయార్క్ సిటీలో అడుగుపెట్టే ప్రణాళికను వాల్‌మార్ట్ మళ్లీ పక్కన పెట్టింది. ఈ కంపెనీ ఉద్యోగులకు అతి తక్కువ జీతాలు ఇస్తుందని, చౌక ఉత్పత్తులతో చిన్న షాపులు మూతపడతాయని ఆందోళనలు వ్యక్తమవుతున్నాయి.

తెలుగు వన్ఇండియా