రిటైల్, విమానయాన రంగాల్లోకి విదేశీ పెట్టుబడులను కేంద్ర ప్రభుత్వం ఆహ్వానించడంతో సోమవారం స్టాక్ మార్కెట్లు లాభాల్లో ప్రారంభమయ్యాయి. ఈ రోజు ఉదయం సెన్సెక్స్ 12 నెలల గరిష్ట స్దాయిలో ప్రారంభమైంది. 11 గంటల ప్రాంతంలో బాంబే స్టాక్ ఎక్సేంజ్ 142 పాయింట్ల వరకూ లాభపడుతూ 18,606కి సమీపంలో ట్రేడవుతోంది. అదే విధంగా నిప్టీ 41 పాయింట్లకు పైగా లాభపడుతూ 5,618 సమీపంలో ట్రేడవుతోంది. గత వారంలో మల్టీ బ్రాండ్ రిటైల్, విమానయాన రంగం, బ్రాడ్ కాస్ట్ సర్వీసుల్లోకి ఎఫ్‌డీఐలను అనుమతిస్తూ కేంద్ర ప్రభుత్వం తీసుకున్న నిర్ణయాన్ని ఇన్వెస్టర్లు స్వాగతిస్తున్నారు.

ఈరోజు రియాల్టీ సూచీ ఏకంగా 4 శాతానికి పైగా లాభపడుతోంది. బ్యాంకులు, క్యాపిలట్ గూడ్స్, ఆయిల్ అండ్ గ్యాస్, ఆటో సూచీలు 2 నుండి 3 శాతం వరకూ లాభపడుతున్నాయి. ఇది ఇలా ఉంటే ఐటీ రంగం, హెల్త్ కేర్ సూచీలు 2 శాతం వరకూ నష్టాల్లో ఉన్నాయి. గత 4 నెలల్లో ఎన్నడూ లేని విధంగా రూపాయి పుంజుకుంది. ఈరోజు ఉదయం 60 పైసల దాకా లాభపడుతూ 53 రూపాయల 70 పైసలకు సమీపంలో ట్రేడవుతోంది.

ఈరోజు అందరికళ్లూ ఆర్‌బీఐ గవర్నర్ దువ్వూరి సుబ్బారావుపైనే ఉన్నాయి. కారణం ఈరోజు చేపట్టనున్న మధ్యంతర త్రైమాసిక పరపతి విధాన సమీక్షలో ఆయన ఏం చేయబోతున్నారనే ఉత్కంఠ నెలకొంది. కార్పోరేట్ వర్గాలు మాత్రం కీలక రేట్లను తగ్గించాలని కోరుకుంటున్నాయి. ఐతే స్టేట్ బ్యాంక్ ఆఫ్ ఇండియా చైర్మన్ ప్రతీప్ చౌదరి మాత్రం రెపో రేటు దిగిరాదని అంటున్నారు. అంతేకాకుండా సీఆర్‌ఆర్‌లో ఒక శాతం కోత ఉంటుందని అంచనా వేశారు.

తెలుగు వన్ఇండియా