మల్టీ బ్రాండ్ రిటైల్‌లో విదేశీ ప్రత్యక్షపెట్టుబడులతో పాటు, విమానయాన సంస్థల్లో విదేశీ ఎయిర్‌లైన్స్ వాటాలు కొనేందుకు అనుమతించడంతో సోమవారం స్టాక్ మార్కెట్లు ఈ రెండు రంగాల్లో లాభాలతో ప్రారంభం అయ్యే సూచనలు ఉన్నట్లు నిపుణులు తెలిపారు. సంక్షోభంలో ఉన్న విమానయాన రంగానికి ఇది ఊతమిస్తుందని కార్పోరేట్ కంపెనీలు పేర్కొన్నాయి. ఈ పెట్టుబడులతో మన రేటింగ్స్ మెరుగుపడతాయని... అంతర్జాతీయంగా పెట్టుబడులకు కేంద్రంగా భారత ప్రతిష్ట మరింత ఇనుమడించేందుకు ఈ నిర్ణయాలు దోహదపడతాయని ఆసోచామ్ సెక్రటరీ జనరల్ డి.ఎస్. రావత్ చెప్పారు.

ప్రస్తుతం దేశీయంగా ఒకటీ అరా ఎయిర్‌లైన్స్ మాత్రమే లాభాలు నమోదు చేస్తున్నాయి. ఈ నేపథ్యంలో దేశీయ ఎయిర్‌లైన్స్‌లో విదేశీ ఎయిర్‌లైన్స్ 49 శాతం ఎఫ్‌డీఐలను అనుమతించడం .. పలు కంపెనీలకు ఊరటనివ్వనుంది. విదేశీ ఎయిర్‌లైన్స్ వాటాల కొనుగోలు రూపంలో సమకూర్చే నిధులతో దేశీ ఎయిర్‌లైన్స్ తమ రుణాలు చెల్లించి, గట్టెక్కవచ్చు. ముఖ్యంగా తీవ్ర ఆర్థిక సంక్షోభంలో కూరుకుపోయిన కింగ్‌ఫిషర్ ఎయిర్‌లైన్స్‌కి ఇది వరంగా మారనుంది. కింగ్‌ఫిషర్ దీనికోసం అందరికన్నా ఎక్కువ ఆసక్తిగా ఎదురుచూస్తోంది. మరోవైపు, స్పైస్ జెట్ సైతం తాము వ్యూహాత్మక భాగస్వామి కోసం చూస్తున్నట్లు ఇప్పటికే వెల్లడించాయి.

ఇది సాహసోపేతమైన, అద్భుతమైన నిర్ణయమని ఆ కంపెనీ చైర్మన్ విజయ్ మాల్యా.. సోషల్ నెట్‌వర్కింగ్ సైట్ ట్విటర్‌లో పేర్కొన్నారు. పలు విదేశీ ఎయిర్‌లైన్స్ సంస్థలు భారత ఎయిర్‌లైన్స్‌లో వాటాలు కొనుగోలు చేసేందుకు ఆసక్తిగా ఉన్నాయి. ఈ జాబితాలో ఇత్తెహాద్ ఎయిర్‌వేస్, ఖతర్ ఎయిర్‌వేస్, ఎమిరేట్స్‌తో పాటు జర్మనీ సంస్థ లుఫ్తాన్సా గ్రూప్, బ్రిటీష్ ఎయిర్‌వేస్, వర్జిన్ ఎయిర్‌లైన్స్ వంటివి గతంలో ఆసక్తి కనపర్చాయి.

తెలుగు వన్ఇండియా