న్యూఢిల్లీ: ప్రెవేటు రంగంలో దూసుకు పోతున్న ప్రధాన బ్యాంకులైన ఐసిఐసిఐ, హెచ్‌డిఎఫ్‌సి బ్యాంకులు తమ ఫిక్స్‌డ్ డిపాజిట్ల (ఎఫ్‌డి)పై వడ్డీ రేట్లను అరశాతం మేరకు తగ్గించాయి. దీనితో పాటు కొన్ని స్వల్ప వ్వవధి డిపాజిట్లపై వడ్డీని పెంచుతున్నట్లు తెలిపాయి. హెచ్‌డిఎఫ్‌సి తమ ఆరునెలల 17 రోజుల నుంచి 9 నెలల 15 రోజుల వ్యవధి డిపాజిట్లపై వడ్డీని అరశాతం పెంచి 7.75 శాతం నిర్థారించింది. అయతే 9 నెలల 16 రోజుల వ్యవధి ఎఫ్‌డిలపై వడ్డీ పావు శాతం తగ్గించి 9 నెలల 17 రోజుల నుంచి ఏడాది మధ్య ఎఫ్‌డిలపై రేటు అరశాతం పెంచినట్లు ప్రకటనలో తెలిపింది.

366-380 రోజుల ఎఫ్‌డిలపై వడ్డీ 0.25% తగ్గింది. 382 రోజుల నుంచి 730 రోజుల డిపాజిట్లపై 8.75% వడ్డీరేటు చెల్లించనున్నట్లు ప్రకటన పేర్కొంది. ఇదేదారిలో ప్రైవేట్ బ్యాంకుల్లో అతిపెద్దదైన ఐసిఐసిఐ బ్యాంక్ తమ రిటైల్ టర్మ్ డిపాజిట్లపై వడ్డీరేట్లను అర శాతానికి తగ్గించింది. సవరించిన కొత్త రేట్లు మంగళవారం నుంచి అమల్లోకి వచ్చినట్లు ఐసిఐసిఐ తమ వెబ్‌సైట్‌లో వెల్లడించింది. 390 రోజుల నుంచి రెండేళ్ల మధ్య మెచ్యూరిటీలపై 8.75 శాతం గరిష్ట రేటును ఐసీఐసీఐ బ్యాంక్ ఆఫర్ చేస్తుండగా, ఈ రేంజ్‌లో దాదాపు ఇదే రేటును ఇస్తూ- హెచ్‌డీఎఫ్‌సీ, యాక్సిస్ బ్యాంకులు పోటీపడుతున్నాయి.

ఐతే 45 రోజుల వరకూ డిపాజిట్లపై ఐసీఐసీఐ బ్యాంక్ రేట్లు అరశాతం నుంచి ముప్పావు శాతం వరకూ పెంచింది. డిపాజిట్లపై రేట్లు తగ్గించిన మొదటి ప్రైవేట్ బ్యాంక్ ఐసిఐసిఐ కాగా, గతనెల ఎస్‌బిఐ తమ డిపాజిట్లపై వడ్డీని ఒక శాతం వరకూ తగ్గించిన విషయం తెలిసిందే.

తెలుగు వన్ఇండియా