ముంబై: భారత కార్పోరేట్లు మరియు ఇన్‌ఫ్రాస్ట్రక్చర్ రంగంలో విదేశీ నిధులను సమకూర్చే భాగంలో రిజర్వ్ బ్యాంక్ ఆఫ్ ఇండియా(ఆర్‌బీఐ) విదేశీ వాణిజ్య రుణాల (ఎక్స్‌టర్నల్‌ కమర్షియల్‌ బారోయింగ్) నిబంధనలను సరళీకరిస్తున్న్టట్లు ఆర్థిక వ్యవహారాల విభాగం కార్యదర్శి డాక్టర్‌ అరవింద్‌ మాయారాం తెలిపారు. దీంతో దేశీయ కంపెనీలు విదేశాల నుండి మరిన్ని నిధులను సమీకరించుకోవచ్చునని ఫిక్కీ నేషనల్‌ ఎగ్జిక్యూటివ్‌ కమిటీ సభ్యుల సమావేశంలో ఆయన పాల్గొని ప్రసంగించారు. దీనిలో భాగంగా ఆర్‌బీఐ... ఆటోమాటిక్ మార్గంలో విదేశీ మార్కెట్ల నుంచి బ్రిడ్జి ఫైనాన్స్‌ను పొందేందుకు కంపెనీలను అనుమతించింది.

గత నెలలో ఎఫ్‌ఐఐలు 5 బిలియన్‌ డాలర్ల వరకూ రూపీ బాండ్లలో, మొత్తం 45 బిలియన్‌ డాలర్ల వరకూ కార్పొరేట్‌ బాండ్లలో పెట్టుబడి పెట్టేలా ఇసిబి విధానాన్ని మార్చిన సంగతి తెలిసిందే. దేశంలోని చాలా కంపెనీలు విదేశీ రుణాలను కోరుతున్న నేపథ్యంలో ఈ నిర్ణయం మేలు కలిగిస్తుందని భావిస్తున్నట్టు ఆయన అన్నారు. ప్రస్తుత ఆర్థిక సంవత్సరంలో 6.5 శాతం జిడిపిని లక్ష్యంగా నిర్దేశించుకుని దాన్ని అధిగమించేందుకు కృషి చేస్తున్నట్టు మాయారాం తెలిపారు. ఇక మరోవైపు భారీ యంత్ర పరికరాలను దిగుమతి చేసుకునే బాటలో ఇన్‌ఫ్రా రంగ కంపెనీలు తీసుకునే ఈసీబీల కాలపరిమితిని ఐదేళ్లకు పొడిగిస్తూ ఆర్‌బీఐ నోటిఫికేషన్‌ను జారీ చేసింది.

వృద్ధి మాంద్యాన్ని ఒక ఇండియా మాత్రమే అనుభవించడం లేదని, చైనా, బ్రెజిల్‌ వంటి దేశాల జిడిపి కూడా దిగజారుతూ వస్తోందని అన్నారు. వివిధ రేటింగ్‌ ఏజన్సీలు ఈ సంవత్సరం ఇండియా చాలా తక్కువ వృద్ధికి పరిమితం కానుందని వేస్తున్న అంచనాలను ప్రస్తావిస్తూ, వాటన్నింటినీ అధిగమించే సత్తా భారత్‌కు వుందని, లక్ష్యాలను చేరుకునేందుకు కృషి చేస్తామని అన్నారు. ద్రవ్యలోటు ప్రస్తుతం 5.76 శాతంగా వుందని, దీన్ని అధిగమిస్తే వృద్ధి రేటు కూడా ప్రభావితం అవుతుందని అన్నారు. వచ్చే ద్రవ్య పరపతి సమీక్షలో ఆర్‌బిఐ తీసుకునే నిర్ణయాలపై ఓ అంచనాకు వచ్చే ముందు టోకు ధరల సూచి ఆధారిత ద్రవ్యోల్బణం, ఆహార ద్రవ్యోల్బణం తాజా గణాంకాలను పరిశీలించాల్సి వుందన్నారు.

తెలుగు వన్ఇండియా