న్యూఢిల్లీ: భారత బ్యాంకింగ్ దిగ్గజం స్టేట్ బ్యాంక్ ఆఫ్ ఇండియా (ఎస్‌బీఐ) డిపాజిట్ రేట్లను తగ్గించింది. పలు మెచ్యూరిటీ కాలాలకు సంబంధించిన స్థిర డిపాజిట్లపై వడ్డీరేట్లను అరశాతం నుంచి ఒక శాతం వరకూ (0.5 - 1)తగ్గించినట్లు ఎస్‌బీఐ తెలిపింది. ఎస్‌బీఐ తీసుకున్న ఈ కీలక నిర్ణయంతో ఇతర బ్యాంకులూ ఇదే దారిలో నడిచే అవకాశం ఉందని కొందరు బ్యాంకింగ్ విశ్లేషకుల అంచనా వేస్తున్నారు. నగదు లభ్యత (లిక్విడిటీ) తగినంతగా ఉండడం వల్లే ఈ నిర్ణయం తీసుకున్నట్లు బ్యాంక్ చైర్మన్ ప్రతీప్ చౌదరి చెప్పారు.

241 రోజుల నుండి ఏడాది వరకు వుండే డిపాజిట్లకు ఒక శాతం వడ్డీ తగ్గుతుంది. పాత రేటు 7.5శాతం వుండగా కొత్త రేటు 6.5శాతం వుంటుంది. మొత్తం 9 మెచ్యూరిటీ పీరియడ్‌ కలిగిన ఎఫ్‌డిలు వుండగా, ఆరు కేటిగిరీలకు మాత్రం 0.5శాతం రేటు సవరించారు. కొత్త రేట్లు సెప్టెంబరు 7నుండి అమల్లోకి వస్తాయని బ్యాంక్‌ ఒక ప్రకటనలో పేర్కొంది. ఈ సవరణతో 7-90రోజుల పాటు వేసే ఎఫ్‌డిలకు వడ్డీరేటు 7శాతం నుండి 6.50శాతానికి తగ్గనుంది. అలాగే, 91-179 రోజుల వరకు వుండే డిపాజిట్లకు కూడా 6.5శాతం వడ్డీ వుంటుంది.

180 రోజుల కాలపరిమితిపై 6.50 శాతం వడ్డీని సవరించారు. ఇక ఫిక్స్‌డ్‌ డిపాజిట్‌ విషయానికి వస్తే 181 - 240 రోజుల కాల పరిమితిపై వడ్డీరేటును 7.25 శాతం నుంచి 6.50 శాతానికి కుదించారు. ఒక సంవత్సరం కంటే ఎక్కువ రెండు సంవత్సరాల కంటే తక్కువ కాలపరిమితి ఫిక్స్‌డి డిపాజిట్లపై కొత్త వడ్డీ రేటు 8.5 శాతానికి సవరించారు.

అంతకు ముందు దీనిపై 9 శాతం వడ్డీ ఇచ్చేవారు 0.5 శాతం తగ్గించారు. 2-3 సంవత్సరాల మ్యాచురిటీ 3-5 సంవత్సరాల మ్యాచురిటీపైన 0.5 శాతం వడ్డీని తగ్గించి 8.5 శాతానికి పరిమితం చేశారు. అయితే 5-10 సంవత్సరాల కాల పరిమితిపై మాత్రం వడ్డీరేట్లలో ఎలాంటి మార్పు లేదు యధావిధిగా 8.5 శాతం వడ్డీని కొనసాగిస్తున్నారు.

తెలుగు వన్ఇండియా