హైదరాబాద్: స్టేట్ బ్యాంక్ ఆఫ్ హైదరాబాద్(ఎస్‌బీహెచ్) అతి స్వల్పకాలిక డిపాజిట్లపై వడ్డీరేట్లను రెండు శాతం తగ్గిస్తూ నిర్ణయం తీసుకుంది. ఏడు నుంచి 14 రోజుల కాల పరిమితి గల డిపాజిట్లపై వడ్డీ రేటును తగ్గిస్తున్నట్టు స్టేట్‌ బ్యాంక్‌ ఆఫ్‌ హైదరాబాద్‌ ప్రకటించింది. ప్రస్తుతం ఇస్తున్న 7 శాతం వడ్డీ రేటును 5 శాతానికి సవరిస్తున్నట్టు శనివారం విడుదల చేసిన ప్రకటనలో బ్యాంకు వెల్లడించింది. ఈ మారిన రేట్లు సోమవారం (సెప్టెంబర్ 3) నుంచి అమలులోకి రానున్నాయి.

మిగిలిన డిపాజిట్ల రేట్లు, రుణాల రేట్లలో ఎలాంటి మార్పు చేయలేదు. ఒకటి నుంచి మూడేళ్ల కాలానికి 9.25 శాతం వడ్డీని ఎస్‌బీహెచ్ ఆఫర్ చేస్తోంది. కోటి రూపాయల పైబడిన డిపాజిట్లపై 180 నుంచి ఒక సంవత్సరంలోపు 8.50 శాతం, ఆపై మూడేళ్ల వరకూ 9.25 శాతం, ఆపై పదేళ్ల వరకూ 9 శాతం వడ్డీని ఆఫర్‌ చేస్తున్నట్టు వివరించింది.

టాక్స్‌ సేవర్‌ స్కీమ్‌లో భాగంగా లక్ష రూపాయల్లోపు డిపాజిట్లపై ఐదేళ్ల నుంచి 10 సంవత్సరాల కాల పరిమితిలో 9 శాతం వడ్డీని ఇస్తున్నట్టు తెలిపింది. ప్రత్యేక డిపాజిట్‌ స్కీముల్లో భాగంగా ఎస్‌బిహెచ్‌ డబుల్‌పై 9.75 శాతం, ఎస్‌బిహెచ్‌ 500, ఎస్‌బిహెచ్‌ 100లపై 9.5 శాతం వడ్డీని ఇస్తున్నామని వివరించింది. మిగతా డిపాజిట్ల విషయంలో మార్పులు లేవని తెలిపింది.

తెలుగు వన్ఇండియా