న్యూఢిల్లీ, జులై 22: రిటైల్ ద్రవ్యోల్బణం (సిపిఐ) జులై నెలలో స్వల్పంగా తగ్గి 9.86శాతంకు చేరింది. అంతక ముందు నెల జూన్‌లో 10.02శాతంగా నమోదైన విషయం తెలిసిందే. ఐతే ప్రభుత్వం జూన్ నెల సిపిఐ గణాంకాలను ఇప్పుడు 9.93 శాతానికి సవరించింది. జులై నెలలో గుడ్లు, చేపలు, మాంసం ధరలు సైతం 11.11శాతం పెరిగాయి. వీటితో పాటు బేవరేజెస్ ధరలు కూడా 9.26 శాతానికి పెరిగాయి. చక్కెర 9.06 శాతం, తృణ ధాన్యాలు 6.45 శాతం పెరిగాయి.

జూలై నెలలో టోకు ధరల ద్రవ్యోల్బణాన్ని (డబ్ల్యూపీఐ) అనుసరిస్తూ సీపీఐ కూడా తగ్గినప్పటికీ ఇది కొనసాగకపోవచ్చునని నోమురా ఫైనాన్షియల్ అడ్వయిజరీ తన అభిప్రయాన్ని తెలిపింది. వర్షాభావం కారణంగా ఆహార, సరుకుల ధరల పెరుగుతాయని స్పష్టం చేసింది. సీపీఐలో భాగమైన కూరగాయల ధరలు గతేడాది జూలై నెలతో పోలిస్తే గరిష్టంగా 27.33% ఎగశాయి. ఈ బాటలో వంట నూనెల ధరలు 17.37%, పప్పుదినుసులు, తదితర ఉత్పత్తులు 12.49% చొప్పున పెరిగాయి.

ఈ సంవత్సరం మొత్తంమీద సీపీఐ నెమ్మదించడం వరుసగా ఇది రెండోసారి. ఈ ఏడాది మే నెలలో సీపీఐ 10.36%గా నమోదుకాగా, జూన్‌లో 10.02%కు తగ్గింది. మళ్లీ ఇప్పుడు (జూలై) 9.86శాతంగా నమోదైంది.

తెలుగు వన్ఇండియా