ముంబై, ఆగస్టు 15: బ్యాంకులలో డిపాజిట్ పథకాలకు సంబంధించిన వడ్డీ రేట్లలో భారీ తేడాలు లేకుండా పారదర్శకమైన విధానాన్ని అనుసరించాలని బ్యాంకులకు రిజర్వ్ బ్యాంక్ ఆఫ్ ఇండియా (ఆర్‌బీఐ) ఆదేశించింది. రిటైల్, బల్క్ డిపాజిట్లు (రూ.15 లక్షల పైబడిన) వడ్డీ రేట్లలో వ్యత్యాసాల వల్ల రిటైల్ డిపాజిటర్లు నష్టపోకూడదనే ఉద్దేశంతో ఈ ఉత్తర్వులను విడుదల చేసింది. దీన్ని ఏప్రిల్ 17 నాటి పాలసీ సమీక్షలోనే ప్రస్తావించినప్పటికీ ప్రత్యేకంగా కొత్త నోటిఫికేషన్‌ను జారీ చేసింది.

ఒకే మెచ్యూరిటీ వ్యవధి ఉన్నప్పటికీ రూ 15 లక్షల లోపు డిపాజిట్లకు, రూ 15 లక్షల పైబడిన డిపాజిట్లకు బ్యాంకులు చెల్లించే వడ్డీ రేట్లలో భారీ తేడాలున్న విషయం తమ దృష్టికి వచ్చినట్లు రిజర్వ్ బ్యాంక్ ఆఫ్ ఇండియా పాలసీ సమీక్షా సమావేశంలో పేర్కొంది. అలాగే, మెచ్యూరిటీ వ్యవధిలో తేడాలు చాలా స్వల్పంగా ఉన్నా బ్యాంకుల వడ్డీరేట్లలో గణనీయం మార్పులుంటున్నాయని తెలిపింది.

ఈ నేపథ్యంలో వ్యత్యాసాలు భారీగా లేకుండా.. బ్యాంకులు చూడాలని సూచించింది. మరోవైపు, బ్యాంకులు తమ పెయిడప్ క్యాపిటల్, రిజర్వుల్లో 20 శాతానికి మించి ఉన్నతమ గ్రూప్ సంస్థలకు రుణాలివ్వరాదని ఆర్‌బీఐ ప్రతిపాదించింది.

తెలుగు వన్ఇండియా