హైదరాబాద్: 'దక్కన్ క్రానికల్' గ్రూప్‌ ఓ ఆర్థిక లావాదేవీలో భారీ మోసానికి పాల్పడిందంటూ క్యాపిటల్ మార్కెట్ సర్వీసుల రంగంలోని ప్రముఖ సంస్థ కార్వీ గ్రూప్ దక్కన్ క్రానికల్ హోల్డింగ్స్‌పై సెంట్రల్ క్రైమ్ స్టేషన్ (సీసీఎస్)లో ఫిర్యాదు చేసినట్టు విశ్వసనీయంగా తెలిసింది. కార్వీ ప్రతినిధులు సీసీఎస్ డీసీపీ జాన్ విక్టర్‌కు ఈ ఫిర్యాదు అందించినట్లు సమాచారం. ఈ విషయాన్ని సీనియర్ పోలీసు అధికారులు ద్రువీకరించినట్లు బుధవారం వార్తలు వచ్చాయి. అయితే ఇప్పటి వరకు కేసు నమోదు చేయలేదని తెలుస్తోంది.

మీడియాలో వచ్చిన వార్తాకథనాల ప్రకారం - కార్వీ చేసిన ఫిర్యాదుపై నగర పోలీసు కమిషనర్ అనురాగ్ శర్మతో డీసీపీ జాన్ విక్టర్ చర్చించినట్లు తెలిసింది. ఫిర్యాదుపై కేసు నమోదు చేయాలా, వద్దా అనే అంశంపై న్యాయ సలహా తీసుకోవాలని పోలీసు అధికారులు భావిస్తున్నారు. పోలీసులకు న్యాయపరమైన సలహా తీసుకోవాల్సిన అవసరం ఏర్పడిన నేపథ్యంలో అసలు ఫిర్యాదు ఏమై ఉంటుందనే విషయంపై రకరకాల ఊహగానాలు వినవస్తున్నాయి.

దక్కన్ క్రానికల్ హోల్డింగ్స్‌కు రిజిస్ట్రార్ అండ్ షేర్ ట్రాన్స్‌ఫర్ ఏజెంట్‌గా కార్వీ గ్రూప్ వ్యవహరిస్తోంది. ఈ అనుబంధంతోపాటు కార్వీ గ్రూప్‌లోని మరో సంస్థ నుంచి డీసీ హోల్డింగ్స్ ప్రమోటర్లు రూ. 50 కోట్ల వరకు మేర సెక్యూర్డ్, అన్‌సెక్యూర్డ్ రుణాలను కూడా తీసుకున్నట్లు తెలిసింది. ఈ రుణాలకు సంబంధించి సెక్యూరిటీగా అందజేసిన ఆస్తుల పత్రాల్లో కొన్ని ఫోర్జరీవి ఉన్నట్లు కార్వీ తమ ఫిర్యాదులో ఆరోపించినట్టుగా చెబుతున్నారు. ఇప్పటికే డీసీ హోల్డింగ్స్‌కు వ్యతిరేకంగా ప్రముఖ ఆర్థిక సంస్థ ఐఎఫ్‌సీఐ 'వైండింగ్ అప్' పిటిషన్ దాఖలు చేసింది.

డిబెంచర్ల రిడెంప్షన్‌కు సంబంధించి 27.8 కోట్ల రూపాయలను చెల్లించడంలో డీసీ విఫలమైందని ఆరోపిస్తూ ఐఎఫ్‌సీఐ ఆంధ్రప్రదేశ్ హైకోర్టును ఆశ్రయించింది. దక్కన్ క్రానికల్ ఆర్థిక పరిస్థితిపై తన పిటిషన్‌లో తీవ్రమైన ఆరోపణలే చేసింది. "వేల కోట్ల అప్పులు చేసిన ఈ సంస్థ... వాటిని తిరిగి చెల్లించే పరిస్థితుల్లో లేదు. అందువల్ల... దానిని మూసేసి, ఆస్తులు అమ్మి మా సొమ్ములు ఇప్పించండి'' అని హైకోర్టును కోరింది.

ఇదిలావుంటే, డీసీ ప్రమోటర్లు 54 శాతం వాటాను ఫ్యూచర్స్ క్యాపిటల్ వద్ద తాకట్టు పెట్టడం కంపెనీ ఆరోగ్య పరిస్థితిపై అనుమానాలకు బలం చేకూర్చింది. వరుసగా వస్తున్న ప్రతికూల వార్తలతో డీసీ హోల్డింగ్స్ షేరు ధర మంగళవారం మరో కొత్త కనిష్ఠ స్థాయి 15.45 రూపాయలకు దిగజారింది. గత 15 రోజుల్లో ఈ షేరు ధర దాదాపు 50 శాతంమేర పతనమైంది.

మార్కెట్ పరిస్థితి దక్కన్ క్రానికల్ గ్రూప్‌నకు పూర్తి అడ్డంగా తిరిగిన సమయంలోనే కార్వీ కూడా పోలీసు స్టేషన్‌లో ఫిర్యాదు చేయడం ప్రాధాన్యం సంతరించుకుంది. అయితే, కార్వీ ప్రతినిధులు మాత్రం తాము డీసీకి వ్యతిరేకంగా ఎలాంటి ఫిర్యాదు చేయలేదని చెప్పారు. ఆ గ్రూప్‌తో తమకు ఆర్థిక లావాదేవీలేమీ లేవని చెప్పినట్లు వార్తాకథనాలు చెబుతన్నాయి.