ముంబై, జులై 27: చాలా రోజుల తర్వాత ప్రపంచ స్టాక్‌ మార్కెట్లు మంచి లాభాల్లో ఉన్నాయి. శుక్రవారం రోజున స్టాక్ మార్కెట్లు లాభాలతో ప్రారంభమయ్యాయి. ఆరంభంలో బాంబే స్టాక్ ఎక్సేంజ్ సెన్సెక్స్ 200 పైగా లాభపడుతూ 16,836 పాయింట్ల వద్ద ట్రేడ్ అవుతుండగా.. నిప్టీ 67 పాయింట్లకు పైగా లాభాలతో కొనసాగుతూ 5,150కి సమీపంలో ట్రేడవుతోంది. ఇక దక్షిణ కొరియా, తైవాన్‌, హాంకాంగ్‌ సూచీలు 2 శాతం దాకా లాభపడుతున్నాయి. ఈవాళ మన మార్కెట్లలో ఐసీఐసీఐ బ్యాంకు, పంజాబ్‌ నేషనల్‌ బ్యాంకులు ఆర్థిక ఫలితాలు ప్రకటించనున్నాయి.

ప్రపంచ స్టాక్ మార్కెట్ల విషయానికి వస్తే ఈరోజు లాభాలతో ప్రారంభమయ్యాయి. అమెరికా నుంచి సానుకూల వార్తలు రావడం, యూరో జోన్‌ రుణ సమస్యను పరిష్కరించడానికి కట్టుబడి ఉన్నామని ఈసీబీ ప్రెసిడెంట్‌ మారియో డ్రాగి ప్రకటించడంతో మార్కెట్లు పరుగులు పెడుతున్నాయి. యూరోప్‌ మార్కెట్లు 4 శాతం దాకా లాభపడ్డాయి. బ్రిటన్‌ సూచీ 1.3 శాతం, ఫ్రాన్స్‌ సూచీ 3.9 శాతం, జర్మనీ 2.6 శాతం పెరిగాయి. అమెరికా మార్కెట్లు కూడా అదే బాటలో పయనించాయి. డౌజోన్స్‌ 1.6 శాతం, నాస్‌డాక్‌ 1.3 శాతం లాభపడ్డాయి.

తెలుగు వన్ఇండియా