హైదరాబాద్: సోషల్ నెట్‌వర్కింగ్ సైట్ ఫేస్‌బుక్ సమాజంలోని భిన్న వర్గాల ప్రజల మధ్య స్నేహవారధిగానే కాకుండా చిన్న వ్యాపారాల విస్తరణకు కూడా చోదకశక్తిగా ఎదుగుతున్నదని ఫేస్‌బుక్ ఇండియా డైరెక్టర్ (ఆన్‌లైన్ ఆపరేషన్స్) కీర్తిగ రెడ్డి అన్నారు. హైదరాబాద్‌లో మంగళవారం మహిళా సాధికారతపై ఇండో అమెరికన్ చాంబర్ ఆఫ్ కామర్స్ నిర్వహించిన గోష్ఠిలో పాల్గొన్న సందర్భంగా మీడియాతో ఆమె ఇష్టాగోష్ఠిగా మాట్లాడారు. ఫేస్‌బుక్ మాధ్యమంగా వ్యాపార ప్రకటనలు చేసిన మధ్యతరహా వ్యాపార సంస్థల ఆదాయాలు 300 శాతం పెరిగినట్టు తమ అధ్యయనంలో తేలిందని చెప్పారు. అలాగే ఆయా సంస్థలు చేస్తున్న వ్యాపారంలో 25 శాతం ఫేస్‌బుక్ మాధ్యమంగానే జరుగుతున్నట్టు కూడా తెలిసిందన్నారు.

ఫేస్‌బుక్‌కు భారతదేశం అతి పెద్ద మార్కెట్లలో ఒకటని, 2010 సంవత్సరంలో తాము హైదరాబాద్‌లో కార్యాలయం ప్రారంభించే నాటికి తమ యూజర్ల సంఖ్య 80 లక్షలు కాగా ఇప్పుడు వారి సంఖ్య ఐదు కోట్లకు పెరిగిందని ఆమె చెప్పారు. ఫేస్‌బుక్ సాధారణ ప్రజలకు కూడా ఒక కస్టమైజ్డ్ న్యూస్‌పేపర్ తరహాలో ఉపయోగపడుతూ వారికి అవసరమైన సమాచారాన్ని అందుబాటులో ఉంచుతున్నదని ఆమె తెలిపారు. భారతదేశంలో డెస్క్‌టాప్ ద్వారా ఫేస్‌బుక్ యాక్సెస్ చేసే వారి కన్నా మొబైల్ ద్వారా యాక్సెస్ చేసే వారి సంఖ్యే ఎక్కువ ఉన్నదని కూడా ఆమె చెప్పారు. ఈ కారణంగానే అధిక సంఖ్యలో మొబైల్ కంపెనీలు తమ అప్లికేషన్లలో ఫేస్‌బుక్‌ను తప్పనిసరిగా ఉంచుతున్నాయని ఆమె అన్నారు. ఫేస్‌బుక్ ద్వారా భారత్‌లో ప్రస్తుతం 90 వేల కోట్ల స్నేహవారధులున్నాయని ఆమె చెప్పారు.

మహిళలు తమ శక్తి తెలుసుకోవాలి మహిళల్లో సాధికారత తీసుకురావాలంటే వారి శక్తి ఏమిటో వారికి తెలిసేలా చైతన్యవంతులను చేయడం అవసరమని అంతకు ముందు ఐఎసిసి గోష్ఠిలో మాట్లాడిన సందర్భంగా కీర్తిగ రెడ్డి అన్నారు. సాధారణంగా మహిళలు తమ శక్తిని తక్కువ అంచనా వేసుకుంటారని, ఆ శక్తి వెలుపలికి వచ్చే వాతావరణం కల్పించినట్టయితే వారు తిరుగులేని నాయకులుగా ఎదుగుతారని ఆమె అన్నారు.

మహిళలు కుటుంబ బాధ్యతలను, ఉద్యోగ బాధ్యతలను సమతూకం చేసుకోవలసి ఉంటుందని అపోలో హాస్పిటల్స్ ఎగ్జిక్యూటివ్ డైరెక్టర్ సంగీతారెడ్డి అన్నారు. కార్పొరేట్ కంపెనీలు మహిళలకు అత్యున్నత పదవులు అందించడంలో వెనుకడుగేయడానికి ఆయా రంగాల్లో ఉన్న నిపుణుల కొరత కూడా కారణమని అభిప్రాయపడ్డారు. 15 సంవత్సరాల క్రి తం తాము హాస్పిటల్ మేనేజ్‌మెంట్‌లో గ్రా డ్యుయేషన్ కోర్సు ప్రవేశపెట్టినప్పుడు దాన్ని అభ్యసించడానికి వచ్చే మహిళల కన్నా పురుషులనే ప్రోత్సహించేవారమని, ప్రస్తుతం పరిస్థితి మారిందని ఆమె అన్నారు.