ముంబై, జులై 5: బాంబే స్టాక్ ఎక్సేంజ్‌లో సెన్సెక్స్ సూచీ గురువారం ట్రేడింగ్ ముగిసే సమయానికి 75 పాయింట్ల లాభంతో 17,538 వద్ద ముగిసింది. అలాగే, నిఫ్టీ 24 పాయింట్ల లాభంతో 5,327 వద్ద ఆగింది. ప్రారంభ ట్రేడింగ్‌లో స్వల్ప నష్టాలతో ప్రారంభమైనప్పటికీ.. ఆ తర్వాత సెన్సెక్స్ సూచీ నెమ్మదిగా పుంజుకుంది. ఎఫ్ఎంసీజీ, కన్సూమర్ డ్యురబుల్స్, క్యాపిటల్ గూడ్స్, పవర్ స్టాక్స్, విదేశీ నిధుల ప్రవాహం కారణంగా సెన్సెక్స్ సూచీ వృద్ధిబాటలో పయనించాయి.

ఇక ఈ ట్రేడింగ్‌లో భెల్, సిప్లా, హెచ్‌డీఎఫ్‌సీ, హెచ్‌డీఎఫ్‌సీ బ్యాంకు, హీరో మోటార్‌కార్ప్, హిందుస్థాన్ యూనీ లీవర్, ఐసీఐసీఐ, ఇన్ఫోసిస్, ఐటీసీ, జిందాల్ స్టీల్, ఎల్ అండ్ టి, ఎం అండ్ ఎం, మారుతి సుజుకి, ఎన్టీపీసీ కంపెనీల షేర్లు లాభపడగా, బజాజ్ ఆటో, భారతీ ఎయిర్‌టెల్, కోల్ ఇండియా, డీఎల్ఎఫ్, గెయిల్, హిండాల్కో కంపెనీల షేర్లు నష్టాలను చవిచూశాయి.

ఇది ఇలా ఉంటే కాంగ్రెస్‌ పాలిత రాష్ట్రాల్లో రిటైల్‌ రంగంలోకి ఎఫ్‌డీఐలను అనుమతించే అంశాన్ని యూపీఏ ప్రభుత్వం పరిశీలిస్తోందని వార్తలు వస్తున్నాయి. మల్టీ బ్రాండ్‌ రిటైల్‌ రంగంలోకి విదేశీ ప్రత్యక్ష పెట్టుబడులను అనుమతించాలని గతంలో కేంద్రం చేసిన ప్రయత్నాలను మమతా బెనర్జీ తీవ్రంగా ప్రతిఘటించిన విషయం తెలిసిందే. విదేశీ కంపెనీలు వస్తే కిరాణా దుకాణాలు మూతపడతామని ఆమె వాదించారు. గతంలో వెనక్కు తగ్గిన మన్మోహన్‌ ప్రభుత్వం ఇప్పుడు రిటైల్‌ ఎఫ్‌డీఐని సీరియస్‌గా పరిశీలిస్తోంది.

ముందుగా కాంగ్రెస్‌ పాలిత రాష్ట్రాల్లో అనుమతించాలని ఒక నిర్ణయానికి వచ్చినట్లుగా తెలుస్తోంది. గుజరాత్‌ లాంటి బీజేపీ పాలిత రాష్ట్రాలు కూడా మల్టీబ్రాండ్‌ రిటైల్‌ ఎఫ్‌డీఐని స్వాగతిస్తాయని భావిస్తున్నారు. రిటైల్‌ ఎఫ్‌డీఐ వస్తే భారీ సంఖ్యలో ఉద్యోగాలు వస్తాయి. వినియోగదారులకు ఛాయిస్‌ పెరుగుతుంది.

తెలుగు వన్ఇండియా