న్యూఢిల్లీ, జూన్ 3: రిలయన్స్ ఇండస్ట్రీస్ అధినేత ముకేశ్ అంబానీ సోమవారం ప్రణాళికా సంఘం ఉపాధ్యక్షుడు మాంటెక్ సింగ్ అహ్లువాలియా భేటీ అయ్యారు. ఇటీవల రిలయన్స్ ఇండస్ట్రీ వివిధ రకాల వివాదాలతో సతమతమవుతున్న నేపథ్యంలో దాదాపు గంటపాటు వీరిద్దరూ సమావేశం కావడం గమనార్హం. కృష్ణా గోదావరి చమురు బేసిన్‌లో రిలయన్స్‌ ఇండస్ట్రీస్‌ నిర్వహిస్తున్న డి-6 క్షేత్రంలో ఇప్పటికే ఉత్పత్తి తగ్గిపోగా, వెలికితీస్తున్న గ్యాస్‌ ధరను మూడింతలు పెంచాలని ఆ సంస్థ డిమాండ్‌ చేస్తుంది.

కృష్ణా గోదావరి చమురు బేసిన్‌లో గ్యాస్ ఉత్పత్తి పడిపోవడంతో పెట్రోలియం శాఖ నుండి రిలయన్స్ ఇండస్టీస్ జరిమానాను ఎదుర్కోంటున్న విషయం తెలిసిందే. కేజీ-డి6లో ఒక్కో మిలియన్ బ్రిటిష్ థర్మల్ యూనిట్ (ఎబీటీయూ)కి 4.205 డాలర్ల ధర ఉండగా.. 2014 ఏప్రిల్ 1 అనంతరం దీన్ని మూడు రెట్లు పెంచాలని భావిస్తున్నారు. దీనితో పాటు త్వరలో జరగనున్న టెలికం తరంగాల వేలంలోనూ పాల్గొనాలని భావిస్తున్న రిలయన్స్‌ అందుకు సంబంధించిన వివరాలనూ అడిగి తెలుసుకున్నట్టు వివరించారు.

ఈ భేటీ అనంతరం ముకేశ్ మీడియాతో మాట్లాడకుండానే యోజనా భవన్ నుండి వెళ్లిపోయారు. ఇది మర్యాద పూర్వక సమావేశం మాత్రమేనని పేర్కొన్న మాంటెక్ కూడా మీడియాతో మాట్లాడేందుకు నిరాకరించారు. ప్రణబ్ ముఖర్జీ ఆర్దిక శాఖ మంత్రిగా రాజీనామా చేసిన తర్వాత ఆ శాఖను ప్రధానమంత్రి మన్మోహాన్ సింగ్ వద్దే అట్టేపెట్టుకోవండతో ఇటీవల పలువురు కార్పోరేట్ రంగ దిగ్గజాలు ప్రధానికి అత్యంత సన్నిహతుడైన మాంటెక్‌తో సమావేశమవుతున్నారు.

ప్రత్యక్షంగా ప్రధాని అపాయింట్‌మెంట్‌ లభించని ఎంతో మంది వ్యాపారవేత్తలు అహ్లూవాలియాను కలిసి తమ విన్నపాలను ప్రధానికి చేర్చాలని కోరుతున్నారు. గత వారంలో వోడాఫోన్‌ ఇండియా చైర్మన్‌ అనల్జిత్‌ సింగ్‌, యుబి గ్రూప్‌ చైర్మన్‌ విజయ్‌ మాల్యాలు యోజనా భవన్‌ను సందర్శించిన విషయం తెలిసిందే.

తెలుగు వన్ఇండియా