న్యూయార్క్, జూన్ 28: టాటా సన్స్ ఛైర్మన్ రతన్ టాటా అరుదైన పురస్కారాన్ని దక్కించుకున్నారు. సమాజ సేవా కార్యక్రమాల్లో విశేష కృషికి గాను ప్రతిష్టాత్మక రాక్ ఫెల్లర్ ఫౌండేషన్ ఆయనను జీవిత సాఫల్య పురస్కారంతో సత్కరించింది. రాక్ ఫెల్లర్ ఫౌండేషన్ స్దాపించి వంద సంవత్సరాలు పూర్తైన సందర్బంగా 'సెంటినరీ' ఉత్సవాలను జరుపుకుంటుంది. ఈ సందర్బంలో ప్రపంచ వ్యాప్తంగా సమాజ సేవ చేస్తున్న కొందరు ప్రముఖులను సన్మానించింది.

ఈ సందర్భంగా రతన్‌టాటా మాట్లాడుతూ వివిధ ప్రాంతాల్లో వివిధ వ్యాపారాలు చేస్తుంటామని వ్యాపారం కూడా సున్నితమైందని... మనం సంపాదించే సంపాదనలో కొంతసమాజానికి మేలు జరిగే విధంగా ఉండాలని అన్నారు. ఆఫ్రికాతో పాటు, ఆసియా దేశాల్లో చూస్తే ప్రజలు కడు పేదరికంతో మగ్గుతున్నారని పిల్లలు పౌష్ఠికాహార లోపం బాధపడుతుంటారని అలాంటి ప్రాంతాలతో పోలిస్తే మన ఎంతో విలాసవంతమైన జీవితం గడుపుతున్నామని అన్నారు.

వారికి ఎంతో కొంత ఇచ్చి సహాయం చేసే బదులు సమాజంలో వారికి ఒక గుర్తింపు తెచ్చేలా చర్యలు తీసుకోవాలన్నారు. తన కంపెనీలో పనిచేసే ఉద్యోగులు సమాజం పట్ల తమ బాధ్యతను గుర్తెరిగి వారికి కావాల్సిన విధంగా సేవా కార్యక్రమాలు చేపడుతుంటారని రతన్‌టాటా అన్నారు. కంపెనీలు తమ తమ ప్రాంతాల్లో ఇతోధికంగా సమాజాభివృద్ధికి తోడ్పాటు అందించాలని, లేకపోతే వ్యతిరేకతను ఎదుర్కోవాల్సి వస్తుందని ఈ సందర్భంగా జరిగిన కార్యక్రమంలో రతన్ టాటా చెప్పారు.

భారీ వ్యత్యాసాలు ఉంటున్న వర్ధమాన దేశాల్లో ఇలాంటి పరిస్థితులే కనిపిస్తున్నాయని ఆయన తెలిపారు. ఈ నేపథ్యంలో పారిశ్రామిక సంస్థలు సామాజిక సంక్షేమంలో పాలుపంచుకోవాల్సిన అవసరాన్ని గుర్తెరిగి వ్యవహరించాలని సూచించారు. గతయేడాది రాక్‌ఫెల్లర్‌ లైఫ్‌టైమ్‌ ఎచీవ్‌మెంట్‌ అవార్డును మాజీ అమెరికా అధ్యక్షుడు బిల్‌ క్లింటన్‌ దక్కించుకున్నారు.

తెలుగు వన్ఇండియా