న్యూఢిల్లీ, జూన్ 27: వచ్చే ఎనిమిది సంవత్సరాల వ్యవధిలో ఇండియాలో భాగస్వాములతో కలసి ఇండియాలో 2020కల్లా 500 కోట్ల డాలర్లను (సుమారు రూ28,000 కోట్లు) ఇన్వెస్ట్ చేయనున్నట్లు శీతలపానీయాల (బెవరేజెస్) దిగ్గజం కోకకోలా మంగళవారం ప్రకటించింది. ఈ సందర్బంలో సంస్ద భారత ఛైర్మన్ ముహ్తార్‌ కెంట్‌ మీడియాతో మాట్లాడుతూ నవంబర్‌ 2011లో ప్రకటించిన విస్తరణ ప్రణాళికల అంచనా వ్యయంతో పోలిస్తే ఇది 15 వేల కోట్ల రూపాయలు అధికమని ఆయన తెలిపారు. ప్రపంచ వ్యాప్తంగా కొత్త ప్లాంట్ల అభివృద్ధి కోసం 30 వేల కోట్ల రూపాయలను కేటాయించగా, అందులో ఆరింట ఒక వంతు భారత్‌లోనే ఖర్చు చేయనున్నట్టు తెలిపారు.

ప్రస్తుతం దేశవ్యాప్తంగా కంపెనీకి 56 ప్లాంట్లున్నాయి. వీటిలో 23 కంపెనీ సొంత ప్లాంట్లుకాగా, 21 ఫ్రాంచైజీలు, 12 కాంట్రాక్ట్ ప్యాకేజింగ్ ప్లాంట్లను కలిగి ఉంది. ఇండియాలో తమ కార్యకలాపాలు చెప్పుకోదగ్గ వృద్ధిని సాధించినట్లు కెంట్ చెప్పారు. ఆరేళ్ల క్రితం ఇక్కడ తాము పటిష్ట పరిస్థితుల్లో లేనప్పటికీ... ప్రస్తుతం గరిష్ట స్థాయిలో బలపడినట్లు తెలిపారు. కంపెనీ ప్రపంచవ్యాప్త అమ్మకాల పరిమాణానికి సంబంధించి తొలి ఐదు దేశాల్లో ఇండియాకు స్థానం లభించనుందని తెలిపారు. కోక కోలా మార్కెట్‌లో టాప్‌-7లో వున్న భారత్‌కు టాప్‌-5కు చేర్చాలన్నదే తమ లక్ష్యమని ఆయన అన్నారు.

కంపెనీ దేశీయంగా కోకకోలా, థమ్సప్, మాజా తదితర శీతల పానీయాలను విక్రయిస్తున్న విషయం తెలిసిందే. విజన్ 2020లో భాగంగా కంపెనీ ప్రపంచవ్యాప్త బిజినెస్ పరిమాణాన్ని 20,000 కోట్ల డాలర్లకు పెంచుకోవాలని ఆశిస్తున్నట్లు కెంట్ తెలిపారు. దీనిలో భాగంగా 3,000 కోట్ల డాలర్లను ఇండియాలో పెట్టుబడులు పెట్టనున్నట్లు తెలిపారు. ఇండియాలో పెట్టుబడి ప్రణాళికలు వీటిలో భాగమేనన్నారు.

తెలుగు వన్ఇండియా