జగన్ సర్కార్‌కు కేంద్రం గుడ్‌న్యూస్: సౌత్ నుంచి ఏపీ ఒక్కటే: రూ.2,655 కోట్లకు

న్యూఢిల్లీ: ముఖ్యమంత్రి వైఎస్ జగన్మోహన్ రెడ్డి నేతృత్వంలో ఏపీలో అధికారంలో ఉన్న వైఎస్ఆర్ కాంగ్రెస్ పార్టీ ప్రభుత్వానికి కేంద్ర ప్రభుత్వం ఓ తీపికబురు ఇచ్చింది. అదనంగా 2,655 కోట్ల రపాయల మేర రుణాలను తీసుకోవడానికి అనుమతి ఇచ్చింది. ప్రోత్సాహకాలను ప్రకటించింది. ప్రస్తుత ఆర్థిక సంవత్సరం తొలి త్రైమాసికానికి సంబంధించి- నిర్మల సీతారామన్ సారథ్యంలోని కేంద్ర ఆర్థిక మంత్రిత్వ శాఖ నిర్దేశించిన క్యాపిటల్ ఎక్స్‌పెండిచర్‌ లక్ష్యాన్ని అందుకోవడం వల్ల అదనపు రుణాన్ని తీసుకునే వెసలుబాటును కల్పించింది.

ఏపీ సహా 11 రాష్ట్రాలు..

ఏపీ సహా మొత్తం 11 రాష్ట్రాలు ఈ లక్ష్యాన్ని అందుకున్నాయి. ఆయా రాష్ట్రాలన్నింటికి కూడా డిమాండ్, అవసరాలకు అనుగుణంగా రుణాలను తీసుకోవడానికి పర్మిషన్ ఇచ్చింది. రాష్ట్రాల అవసరాల మేర రుణ మొత్తాన్ని కేంద్ర ఆర్థిక మంత్రిత్వ శాఖ ఖరారు చేసింది. 11 రాష్ట్రాలు కలిపి 15,271 కోట్ల రూపాయల మేర రుణాలను పొందవచ్చని తెలిపింది. ఇందులో ఏపీ వాటా 2,655 కోట్ల రూపాయలుగా నిర్ధారించింది. స్థూల రాష్ట్ర ఉత్పత్తిలో (జీఎస్‌డీపీ)లో 0.25 శాతానికి సమానం ఈ మొత్తం.

ఆ రాష్ట్రాలివే..

ఏపీతో పాటు బిహార్, ఛత్తీస్‌గఢ్, హర్యానా, కేరళ, మధ్యప్రదేశ్, మణిపూర్, మేఘాలయా, నాగాలాండ్, రాజస్థాన్, ఉత్తరాఖండ్ రాష్ట్రాలు- ప్రస్తుత ఆర్థిక సంవత్సరం తొలి త్రైమాసికం అంటే ఏప్రిల్-మే-జూన్ నెలల కాలానికి కేంద్రం నిర్దేశించిన క్యాపిటల్ ఎక్స్‌పెండిచర్ టార్గెట్‌ను అందుకున్నాయి. ఈ జాబితాలో దక్షిణాది నుంచి ఏపీ ఒక్కటే ఈ లక్ష్యాన్ని అందుకోవడం ఇక్కడి ఆర్థిక క్రమశిక్షణకు అద్దం పడుతోందనే అభిప్రాయాలు వ్యక్తమౌతోన్నాయి.

జీఎస్డీపీలో

క్యాపిటల్ ఎక్స్‌పెండిచర్ లక్ష్యాన్ని అందుకోవడం అంటే ఆర్థిక ప్రగతి రేటు అంచనాలకు అనుగుణంగా ఉన్నట్టే. ఆర్థిక ప్రగతిరేటును నిర్ధారించడానికి కేంద్ర ఆర్థిక మంత్రిత్వ శాఖ ప్రతి త్రైమాసికానికి అన్ని రాష్ట్రాలకు క్యాపిటల్ ఎక్స్‌పెండిచర్ లక్ష్యాన్ని నిర్దేశిస్తుంటుంది. ఇది ప్రతి ఆర్థిక సంవత్సరంలోనూ చోటు చేసుకునే ప్రక్రియే. ఈ లక్ష్యాన్ని అందుకున్న రాష్ట్రాలకు ప్రోత్సాహకాలను ప్రకటిస్తుంటుంది. రాష్ట్ర స్థూల జాతీయోత్పత్తిలో 0.25 శాతానికి సమానంగా అదనంగా రుణాలను తీసుకోవడానికి అనుమతి ఇస్తుంటుంది.

ఏ రాష్ట్రానికి ఎంత..

ఈ దఫా 15,721 కోట్ల రూపాయల మేర అదనపు రుణాలను తీసుకోవడానికి ఆ 11 రాష్ట్రాలకు అవకాశం ఇచ్చింది. ఇందులో 2,655 కోట్ల రూపాయల మొత్తాన్నీ ఏపీ వాటాగా నిర్ధారించింది. బిహార్-1,699, ఛత్తీస్‌గఢ్-895, హర్యానా-2,105, కేరళ-2,255, మధ్యప్రదేశ్-2,590, మణిపూర్-90, మేఘాలయా-96, నాగాలాండ్-89, రాజస్థాన్-2,593, ఉత్తరాఖండ్-654 కోట్ల రూపాయల మేర రుణం తీసుకోవచ్చు. రెండో త్రైమాసికానికి సంబంధించిన వివరాలు వచ్చే నెల వెల్లడయ్యే అవకాశం ఉంది.