విప్రో ఇన్వెస్టర్లకు నిపుణుల కీలక సలహా.. రాబోయే రోజుల్లో ఈ షేర్ టార్గెట్ ప్రైస్ ఎంతో తెలుసా?

భారతీయ స్టాక్ మార్కెట్ (stock market) లో ఐటీ రంగం (IT Sector) గత కొంతకాలంగా తీవ్ర ఒడిదుడుకులను ఎదుర్కొంటోంది. ముఖ్యంగా ఆర్టిఫిషియల్ ఇంటెలిజెన్స్ (AI) టెక్నాలజీ వేగంగా పెరిగిపోతుండటంతో.. సాంప్రదాయ ఐటీ ప్రాజెక్టులకు డిమాండ్ తగ్గుతుందేమో అనే ఆందోళన ఇన్వెస్టర్లలో నెలకొంది. ఇలాంటి పరిస్థితుల్లో దేశీయ ఐటీ దిగ్గజం 'విప్రో' (Wipro) ఒక సంచలన ప్రకటనతో మార్కెట్ దృష్టిని ఆకర్షించింది. అమెరికాకు చెందిన ప్రముఖ సాఫ్ట్‌వేర్ సంస్థ 'సర్వీస్‌నౌ' (ServiceNow) తో విప్రో తన భాగస్వామ్యాన్ని మరింత విస్తరిస్తున్నట్లు ప్రకటించింది. ఈ మెగా ఏఐ డీల్ వార్త బయటకు రాగానే, శుక్రవారం ట్రేడింగ్‌లో విప్రో షేర్లు ఏకంగా 4.5 శాతానికి పైగా లాభపడ్డాయి.

అసలు ఈ డీల్ ప్రత్యేకత ఏంటి?

ఈ సరికొత్త ఒప్పందంలో భాగంగా విప్రో తన సొంత ఏఐ ప్లాట్‌ఫామ్ అయిన 'విప్రో ఇంటెలిజెన్స్' (Wipro Intelligence) ను, 'సర్వీస్‌నౌ ఏఐ ప్లాట్‌ఫామ్' తో అనుసంధానం చేయనుంది. దీని ద్వారా పెద్ద పెద్ద కంపెనీలలో ఐటీ (IT), హెచ్ఆర్ (HR), ప్రొక్యూర్‌మెంట్ , సైబర్ సెక్యూరిటీ వంటి విభాగాలలో 'ఏజెంటిక్ ఏఐ వర్క్‌ఫ్లోస్' (Agentic AI Workflows) ను ప్రవేశపెడతారు. సరళంగా చెప్పాలంటే.. కంపెనీల అంతర్గత పనులను డిజిటల్‌గా మరింత వేగవంతం చేయడానికి, ఉద్యోగుల పనితీరును మెరుగుపరచడానికి ఈ టెక్నాలజీ ఉపయోగపడుతుంది.

ఈ పాజిటివ్ న్యూస్ వల్ల ఎన్‌ఎస్‌ఈ (NSE) లో విప్రో షేరు ధర ఒకేరోజు 4.67 శాతం జంప్ చేసి రూ. 211 స్థాయికి చేరుకుంది. గత కొంతకాలంగా నష్టాల్లో ఉన్న ఈ స్టాక్‌ను కొనుగోలు చేయడానికి ఇన్వెస్టర్లు ఆసక్తి చూపించారు.

ట్రేడింగ్ లెవెల్స్ ఎలా ఉన్నాయి? ఇప్పుడు కొనవచ్చా?

బోనాంజా సంస్థకు చెందిన సీనియర్ టెక్నికల్ రీసెర్చ్ అనలిస్ట్ విరాట్ జగద్ ఈ స్టాక్ పనితీరుపై కీలక విశ్లేషణ చేశారు. దీర్ఘకాలికంగా చూస్తే విప్రో షేరు రూ. 200-202 రేంజ్ వద్ద బలమైన సపోర్ట్ జోన్‌ను (Base Formation) ఏర్పరచుకుంటోందని ఆయన చెప్పారు. ప్రస్తుతం డైలీ చార్టులో ఆర్‌ఎస్‌ఐ (RSI) 55 దాటడం వల్ల షేరులో క్రమంగా బలం పుంజుకుంటున్నట్లు సంకేతాలు కనిపిస్తున్నాయి. అయితే, దీర్ఘకాలిక మూవింగ్ యావరేజ్ కంటే కిందనే ట్రేడ్ అవుతుండటం వల్ల.. ఇది శాశ్వతమైన పెరుగుదలా కాదా అనేది ఇప్పుడే చెప్పలేమన్నారు.

కీలకమైన లెవెల్స్ ఇవే..

• రెసిస్టెన్స్ లెవెల్: విప్రో షేరు గనుక రూ. 212-218 స్థాయిని దాటి నిలబడితే.. రాబోయే వారాల్లో ఇది రూ. 235 నుండి రూ. 250 వరకు దూసుకెళ్లే అవకాశం ఉంది.
• సపోర్ట్ లెవెల్: డౌన్‌సైడ్‌లో రూ. 200 అనేది అత్యంత కీలకమైన సపోర్ట్. పొజిషనల్ ట్రేడర్లు ఈ స్థాయిని గమనిస్తూ స్టాక్‌ను హోల్డ్ చేయవచ్చు.

ఏఐ (AI) భయాల మధ్య ఐటీ రంగం ఊరట!

ప్రస్తుతం ఓపెన్ ఏఐ (OpenAI) వంటి సంస్థలు ఎంటర్‌ప్రైజ్ సర్వీసుల్లోకి దూసుకురావడంతో గ్లోబల్ మార్కెట్‌లో సాంప్రదాయ ఐటీ అవుట్‌సోర్సింగ్ బిజినెస్‌పై కాస్త ఒత్తిడి ఉంది. ఈ సవాలును తిప్పికొట్టడానికే భారతీయ ఐటీ కంపెనీలు తమ ఆర్టిఫిషియల్ ఇంటెలిజెన్స్ సామర్థ్యాలను శరవేగంగా పెంచుకుంటున్నాయి. విప్రో తీసుకున్న ఈ తాజా నిర్ణయం కంపెనీ భవిష్యత్తుపై ఇన్వెస్టర్లలో కొత్త నమ్మకాన్ని నింపింది. కాబట్టి, లాంగ్ టర్మ్ కోసం చూసేవారు ఈ మార్కెట్ (stock market) అప్‌డేట్‌ను బట్టి సరైన నిర్ణయం తీసుకోవచ్చు!