Hero Motors IPO: సెప్టెంబర్ 16న హీరో మోటార్స్ ఐపీఓ.. ఒక్కో షేరు రూ.79 నుంచి రూ.84..

ఆటో విడిభాగాలు, అధునాతన మొబిలిటీ తయారీదారు అయిన హీరో మోటార్స్ లిమిటెడ్ ఐపీఓ(Hero Motors IPO:)గా రానుంది. తన ఐపీఓ ప్రైస్ ను కూడా ప్రకటించింది. ఐపీఓలో భాగంగా రూ.1000 కోట్లను సమీకరించనుంది. ఈ ఐపీఓ సబ్‌స్క్రిప్షన్ బుధవారం సెప్టెంబర్ 16న ప్రారంభమై శుక్రవారం, సెప్టెంబర్ 18న ముగుస్తుంది. హీరో మోటార్స్ ఒక్కో షేరును రూ.79 నుంచి రూ.84 గా ప్రకటించింది. ప్రతి షేరు ముఖ విలువ(Face Value) రూ.10గా ఉంటుంది. ఈ రూ.1,000 కోట్ల IPOలో రూ.600 కోట్ల విలువైన ఫ్రెష్ ఈక్విటీ ఇష్యూ, రూ.400 కోట్ల విలువైన ఆఫర్ ఫర్ సేల్ ఉంటాయి.

ఒక లాట్‌లో హీరో మోటార్స్ 178 షేర్లు ఉంటాయి. రిటైల్ ఇన్వెస్టర్లు వీటి కోసం కనీసం రూ.14,952 పెట్టుబడి పెట్టాల్సి ఉంటుంది. ఐపీఓలో 35 శాతం రిటైల్ ఇన్వెస్టర్ల కోసం రిజర్వ్ చేశారు. ఈ ఇష్యూలో 50% వాటాను సంస్థాగత పెట్టుబడిదారుల కోసం కేటాయించగా, మిగిలినది సంస్థాగేతర పెట్టుబడిదారుల (NIIs) కోసం కేటాయించారు. గరిష్ట ధరతో హీరో మోటార్స్ మార్కెట్ క్యాపిటలైజేషన్ రూ.3,815 కోట్లుగా ఉంటుంది. ఈ OFSతో కంపెనీలో ప్రమోటర్ల వాటా గతంలో ఉన్న 85.57 శాతం నుంచి 61.63%కి తగ్గుతుంది. ఈ ఇష్యూకు ICICI సెక్యూరిటీస్, DAM క్యాపిటల్, JM ఫైనాన్షియల్ బుక్ రన్నింగ్ లీడ్ మేనేజర్లుగా వ్యవహరిస్తుండగా, Kfin టెక్నాలజీస్ అధికారిక రిజిస్ట్రార్‌గా ఉంది.

అర్హులైన పెట్టుబడిదారులకు షేర్ల కేటాయింపు సెప్టెంబర్ 21న జరుగనుంది. ఈ షేర్లు సెప్టెంబర్ 22న వాటాదారుల డీమ్యాట్ ఖాతాకు జమ చేస్తారు. హీరో మోటార్స్ షేర్లు సెప్టెంబర్ 23, బుధవారం నాడు స్టాక్ మార్కెట్‌లో అరంగేట్రం చేయనున్నాయి. హీరో మోటార్స్ అత్యాధునిక ట్రాన్స్‌మిషన్ సిస్టమ్స్, డ్రైవ్ యూనిట్లు, ఇంజన్ భాగాలను కూడా ఉత్పత్తి చేస్తుంది. BMW, డుకాటి వంటి ప్రధాన అంతర్జాతీయ బ్రాండ్లు, ఇతర ద్విచక్ర వాహన, ఎలక్ట్రిక్ సైకిల్ తయారీదారులు దీని ముఖ్య క్లైయింట్స్ గా ఉన్నారు. Uno Minda వంటి పరిశ్రమ దిగ్గజాలతో పోలిస్తే Hero Motors ఆదాయం చాలా తక్కువగా ఉంది; Uno Minda పరిమాణం దీనికంటే 10 రెట్లు ఎక్కువగా ఉంటుంది.

రూ.84 గరిష్ట ధరల శ్రేణిని పరిగణనలోకి తీసుకుంటే, గరిష్ట ధర వద్ద 'ప్రైస్-టు-ఎర్నింగ్స్' (P/E) నిష్పత్తి 60గా ఉంటుంది. ఇది లిస్టయిన చాలా ఇతర సంస్థల కంటే ఎక్కువ. హీరో మోటార్స్ సానుకూలతలు చూస్తే.. బలమైన మాతృ సంస్థ & బ్రాండ్ వారసత్వం ఉంది. పంకజ్ ముంజాల్ నేతృత్వంలోని హీరో మోటార్స్ కంపెనీ (HMC) గ్రూప్‌లో భాగం. ఇది ఆటోమోటివ్ రంగంలో విస్తృతమైన పరిశ్రమ అనుభవం, బలమైన కార్పొరేట్ పాలన, బ్రాండ్ ఈక్విటీ నుంచి ప్రయోజనం పొందుతుంది. ఈ కంపెనీ ఎలక్ట్రిక్ ద్విచక్ర వాహనాలు, ఎలక్ట్రిక్ కార్లు, మైక్రో-మొబిలిటీ అప్లికేషన్‌ల (ఇ-బైక్‌లు) కోసం గేర్లు, ఎలక్ట్రిక్ డ్రైవ్ యూనిట్లు, ట్రాన్స్‌మిషన్ సిస్టమ్‌లను డిజైన్ చేసి, తయారు చేస్తుంది.

వేగంగా విస్తరిస్తున్న యూరోపియన్, ఉత్తర అమెరికా ఇ-బైక్ ట్రాన్స్‌మిషన్ మార్కెట్లపై ప్రత్యేక దృష్టి సారించిన అతి కొద్ది భారతీయ ఆటో-కాంపోనెంట్ తయారీదారులలో హీరో మోటార్స్ ఒకటి.
తాజా ఇష్యూ ద్వారా వచ్చిన నిధులలో రూ. 1,900 మిలియన్లను బకాయి ఉన్న రుణాలను ముందస్తుగా చెల్లించడానికి లేదా తిరిగి చెల్లించడానికి కేటాయించారు. వడ్డీ ఖర్చులను తగ్గించడం నికర లాభ మార్జిన్‌ను పెంచుతుంది.

డిస్క్లైమర్: ఈ వెబ్‌సైట్‌లోని అభిప్రాయాలు, సూచనలు పూర్తిగా వ్యక్తిగత విశ్లేషకులు లేదా ఇతర సంస్థలవి మాత్రమే. ఇవి Goodreturns.in లేదా Greynium Information Technologies Private Limited అధికారిక అభిప్రాయాలు కాదని గమనించగలరు.మేము ఈ విషయం యొక్క ఖచ్చితత్వం, సమగ్రత లేదా విశ్వసనీయతపై ఎటువంటి హామీ ఇవ్వడం కాని, అనుమతించడం కాని బాధ్యత వహించడం జరగదు. మేము ఎలాంటి పెట్టుబడి సలహా ఇవ్వము. అలాగే ఎటువంటి సెక్యూరిటీ కొనుగోలు లేదా అమ్మకాలు ప్రోత్సహించము. ఈ వెబ్‌సైట్‌లోని కథనం పూర్తిగా సమాచారం, విద్యా ప్రయోజనాల కోసమే అందించబడుతుంది. మీరు ఏదైనా పెట్టుబడి నిర్ణయం తీసుకునే ముందు, లైసెన్స్ పొందిన ఆర్థిక సలహాదారుల సహాయం తీసుకోండి. ఈ కథనాన్ని కేవలం సమాచారంగా మాత్రమే పరిగణించండి.