రూ.14 వేల కోట్ల పోర్షే డీల్.. అయినా స్టాక్ మార్కెట్లో టీసీఎస్ షేర్లు ఎందుకు కుప్పకూలాయి..

భారత ఐటీ రంగానికి అత్యంత కీలకమైన పరిణామంలో.. దేశంలోనే అతిపెద్ద సాఫ్ట్‌వేర్ సేవల దిగ్గజం టాటా కన్సల్టెన్సీ సర్వీసెస్ (TCS) జర్మన్ లగ్జరీ కార్ల తయారీ సంస్థ పోర్షే (Porsche) తో భారీ భాగస్వామ్యాన్ని ప్రకటించింది. పోర్షే ఏజీతో పాటు దాని కన్సల్టింగ్ అనుబంధ సంస్థ ఎంహెచ్‌పీ (MHP)తో €1.25 బిలియన్, అంటే సుమారు రూ.14,000 కోట్ల విలువైన ఐదేళ్ల ఒప్పందం కుదుర్చుకున్న నేపథ్యంలో కంపెనీ భవిష్యత్ వ్యాపారంపై ఆశావహ అంచనాలు వ్యక్తమవుతున్నాయి.

ఈ డీల్ కింద పోర్షే సంస్థ తన వాహన ఇంజనీరింగ్, విడిభాగాల తయారీ, రోజువారీ కార్యకలాపాలు, కస్టమర్ అనుభవంలో ఆర్టిఫిషియల్ ఇంటెలిజెన్స్ (AI) సాంకేతికతను విస్తృతంగా ఉపయోగించడంలో టీసీఎస్ తోడ్పడనుంది. ఆటోమోటివ్ రంగంలో సరికొత్త ఏఐ అనువర్తనాలను నిరంతరం అభివృద్ధి చేసేందుకు టీసీఎస్ ఒక ప్రత్యేక ఏఐ మొబిలిటీ కేంద్రాన్ని కూడా ఏర్పాటు చేయనుంది.అయితే ఈ భారీ డీల్ వార్త వచ్చినప్పటికీ టీసీఎస్ షేర్లు మంగళవారం ఇంట్రాడే ట్రేడింగ్‌లో నష్టాలతో ప్రారంభమయ్యాయి.

ఈ భారీ భాగస్వామ్యంలో భాగముగానే.. పోర్షేకు చెందిన ఐటీ, బిజినెస్ కన్సల్టింగ్ అనుబంధ సంస్థ 'ఎంహెచ్‌పీ' (MHP) ని 320 మిలియన్ యూరోలకు (సుమారు రూ. 2,950 కోట్లు) టీసీఎస్ పూర్తిగా కొనుగోలు చేయనుంది. దాదాపు 30 ఏళ్ల చరిత్ర.. 4,500 మందికి పైగా సిబ్బంది ఉన్న ఎంహెచ్‌పీని స్వాధీనం చేసుకోవడం ద్వారా రొమేనియా, యూకే, యూఎస్, మెక్సికో, భారత్‌లలోని దాని నెట్‌వర్క్ అంతా టీసీఎస్ పరమవుతుంది. జర్మన్ ఆటోమొబైల్ రష్యా, యూరప్ ఐటీ మార్కెట్లలో తన పట్టును బలపరచుకోవడానికి టీసీఎస్‌కు ఇది వ్యూహాత్మకంగా ఎంతగానో ఉపయోగపడుతుందని మార్కెట్ నిపుణులు అంచనా వేస్తున్నారు.

Also Read

TCS ఉద్యోగులకు అలర్ట్.. ఢిల్లీ క్యాంపస్ ఉద్యోగులు కొత్త కార్యాలయం నుంచి పనిచేయాలని ఆదేశాలు..కారణం ఏంటంటే..

అయితే ఇంతటి భారీ ఒప్పందం వెలువడినప్పటికీ స్టాక్ మార్కెట్లో మాత్రం టీసీఎస్ షేర్లు లాభాలను నమోదు చేయలేకపోయాయి. మంగళవారం నాటి ప్రారంభ ట్రేడింగ్‌లో బీఎస్ఈలో టీసీఎస్ షేరు 0.38% క్షీణించి రూ. 2,274.40 వద్ద నిలిచింది. ఒక దశలో ఇది రూ. 2,269.05 కనిష్ట స్థాయికి పడిపోయింది. మార్కెట్లో ఈ విధమైన ప్రతికూలతకు ప్రధాన కారణం ఎంహెచ్‌పీ కొనుగోలు వల్ల రాబోయే త్రైమాసికాలలో టీసీఎస్ మార్జిన్లపై పడే తీవ్ర ఒత్తిడేనని విశ్లేషకులు స్పష్టం చేస్తున్నారు.

ప్రముఖ బ్రోకరేజ్ సంస్థ ఎమ్‌కే గ్లోబల్ విడుదల చేసిన నివేదిక ప్రకారం.. ఎంహెచ్‌పీ విలీనం, ఉద్యోగుల నిర్వహణ, సంబంధిత విలీన ఖర్చుల కారణంగా మొదటి సంవత్సరంలో టీసీఎస్ ఆపరేటింగ్ మార్జిన్లపై 0.50 శాతం నుండి 0.60 శాతం వరకు ప్రతికూల ప్రభావం పడనుంది. అంతేకాకుండా కంపెనీ ఒక్కో షేరుపై వచ్చే ఆదాయం (EPS) కూడా స్వల్పకాలంలో మందగించే అవకాశం ఉంది. ఈ స్వల్పకాలిక వ్యయాల గురించిన భయాలే పెట్టుబడిదారులను అమ్మకాల వైపు నడిపించాయి.

అయినప్పటికీ సుదీర్ఘ కాలవ్యవధిలో ఈ ఒప్పందం కంపెనీ ఆదాయాన్ని గణనీయంగా పెంచుతుందని బ్రోకరేజ్ సంస్థలు విశ్వాసం వ్యక్తం చేస్తున్నాయి. ఎంహెచ్‌పీ విలీనం పూర్తయిన తర్వాత టీసీఎస్ మొత్తం వార్షిక రాబడికి అదనంగా 2.8 శాతం నుండి 3 శాతం వరకు ఆదాయం జతకూరుతుంది. ఫలితంగా ఎమ్‌కే గ్లోబల్.. టీసీఎస్ షేరుకు రూ. 2,600 టార్గెట్ ధరను ఖరారు చేయగా (సుమారు 14% లాభం), నువామా ఇన్స్టిట్యూషనల్ మరింత ఆశాజనకంగా రూ. 3,000 టార్గెట్ ధరతో 'బై' రేటింగ్‌ను ఇచ్చింది (సుమారు 32% అప్‌సైడ్). ప్రారంభంలో లాభాల శాతంలో కొంత హెచ్చుతగ్గులు ఉన్నప్పటికీ, పోర్షేతో కుదిరిన ఈ డీల్ గ్లోబల్ ఏఐ రేసులో టీసీఎస్‌ను అగ్రస్థానంలో నిలబెడుతుందని టెక్ రంగ నిపుణులు భావిస్తున్నారు.

డిస్క్లైమర్: ఈ వెబ్‌సైట్‌లోని అభిప్రాయాలు, సూచనలు పూర్తిగా వ్యక్తిగత విశ్లేషకులు లేదా ఇతర సంస్థలవి మాత్రమే. ఇవి Goodreturns.in లేదా Greynium Information Technologies Private Limited అధికారిక అభిప్రాయాలు కాదని గమనించగలరు.మేము ఈ విషయం యొక్క ఖచ్చితత్వం, సమగ్రత లేదా విశ్వసనీయతపై ఎటువంటి హామీ ఇవ్వడం కాని, అనుమతించడం కాని బాధ్యత వహించడం జరగదు. మేము ఎలాంటి పెట్టుబడి సలహా ఇవ్వము. అలాగే ఎటువంటి సెక్యూరిటీ కొనుగోలు లేదా అమ్మకాలు ప్రోత్సహించము. ఈ వెబ్‌సైట్‌లోని కథనం పూర్తిగా సమాచారం, విద్యా ప్రయోజనాల కోసమే అందించబడుతుంది. మీరు ఏదైనా పెట్టుబడి నిర్ణయం తీసుకునే ముందు, లైసెన్స్ పొందిన ఆర్థిక సలహాదారుల సహాయం తీసుకోండి. ఈ కథనాన్ని కేవలం సమాచారంగా మాత్రమే పరిగణించండి.