లాభాలతో ప్రారంభమైన స్టాక్ మార్కెట్.. 400 పాయింట్లు జంప్ చేసిన సెన్సెక్స్.. 23,380 దాటిన నిఫ్టీ..

భారతీయ స్టాక్ మార్కెట్లు సోమవారం ట్రేడింగ్‌ను లాభాలతో ఆశాజనకంగా ప్రారంభించాయి. ప్రారంభ ట్రేడింగ్‌లోనే బిఎస్‌ఇ సెన్సెక్స్ 400 పాయింట్లకు పైగా ఎగబాకి 74,700 స్థాయిని తాకగా, ఎన్‌ఎస్‌ఈ నిఫ్టీ 50 సూచీ 23,380 మార్కును అధిగమించింది. లార్జ్-క్యాప్ విభాగంలో కొనుగోళ్ల మద్దతు లభించినప్పటికీ.. మిడ్-క్యాప్, స్మాల్-క్యాప్ స్టాక్స్‌లో కొంత అమ్మకాల ఒత్తిడి కనిపించింది. ఉదయం ట్రేడింగ్ పురోగమించే కొద్దీ ప్రధాన సూచీలు లాభాలను నిలబెట్టుకునే ప్రయత్నం చేశాయి. ఉదయం 10:39 గంటల సమయానికి సెన్సెక్స్ 329.78 పాయింట్లు (0.44 శాతం) పెరిగి 74,624.74 వద్ద నడుస్తుండగా.. నిఫ్టీ 25.60 పాయింట్లు (0.11 శాతం) లాభపడి 23,372 వద్ద ట్రేడ్ అయింది.

మార్కెట్ ప్రారంభంలో నిఫ్టీ 50 సూచీలోని 50 ప్రధాన కంపెనీలలో 33 షేర్లు లాభాల్లో పయనించగా.. 17 షేర్లు క్షీణతను నమోదు చేశాయి. సెన్సెక్స్ ప్యాక్‌లో అల్ట్రాటెక్ సిమెంట్ ఏకంగా 3.35 శాతం పెరిగి ట్యాప్ గెయినర్‌గా నిలిచింది. దానిని అనుసరించి ఏషియన్ పెయింట్స్, ఇండిగో, సన్ ఫార్మా, ఐటీసీ, ట్రెంట్, టైటాన్, బజాజ్ ఫైనాన్స్ షేర్లు గణనీయమైన లాభాలను ఆర్జించి సూచీలను పైకి లేపాయి. వీటికి తోడు ఎల్&టి, ఎన్‌టిపిసి, హెచ్‌సిఎల్ టెక్, టాటా స్టీల్, కోటక్ మహీంద్రా బ్యాంక్, హిందుస్థాన్ యూనిలివర్, రిలయన్స్ ఇండస్ట్రీస్, ఐసిఐసిఐ బ్యాంక్, యాక్సిస్ బ్యాంక్ షేర్లు కొనుగోళ్ల ఊతంతో సానుకూలంగా ట్రేడ్ అయ్యాయి. మరోవైపు భారతీ ఎయిర్‌టెల్, ఇన్ఫోసిస్, పవర్ గ్రిడ్ షేర్లు నష్టాల్లో కొనసాగాయి.

రంగాల వారీగా పరిశీలిస్తే ఆటో, ఎఫ్‌ఎమ్‌సిజి రంగాలు మార్కెట్‌కు బలమైన మద్దతుగా నిలిచాయి. నిఫ్టీ ఆటో సూచీ 0.76 శాతం, నిఫ్టీ ఎఫ్‌ఎమ్‌సిజి 0.62 శాతం లాభాలను నమోదు చేయగా, నిఫ్టీ బ్యాంక్ సూచీ 0.13 శాతం స్వల్ప లాభంతో కొనసాగింది. అయితే, ఇన్ఫర్మేషన్ టెక్నాలజీ (IT) రంగానికి ఒత్తిడి తప్పలేదు. నిఫ్టీ ఐటీ సూచీ సుమారు 0.66 శాతం నష్టంతో ట్రేడ్ అయింది. లార్జ్-క్యాప్‌లలో కొనుగోళ్లు కనిపించినప్పటికీ మిడ్-క్యాప్ మరియు స్మాల్-క్యాప్ విభాగాలలో నిరాశ వ్యక్తమైంది; నిఫ్టీ మిడ్‌క్యాప్ 100 సూచీ 0.27 శాతం, నిఫ్టీ స్మాల్‌క్యాప్ 100 సూచీ 0.10 శాతం మేర క్షీణించాయి.

Also Read

స్టాక్ మార్కెట్ ఇన్వెస్టర్లకు బిగ్ అలర్ట్.. ఈ వారం షేర్ మార్కెట్ పరిస్థితి ఎలా ఉంటుందంటే..

ఈ వారపు తొలి రోజు మార్కెట్లో లాభాలకు ఐదు ప్రధాన అంశాలు ఊతంగా నిలిచాయి. అంతర్జాతీయ మార్కెట్‌లో బ్రెంట్ ముడి చమురు ధరలు దాదాపు 2.2 శాతం తగ్గి బ్యారెల్‌కు $101.6 స్థాయికి దిగిరావడం భారత్ వంటి ప్రధాన చమురు దిగుమతి దేశానికి పెద్ద ఊరటగా మారింది. శుక్రవారం నాటి ట్రేడింగ్‌లో విదేశీ పోర్ట్‌ఫోలియో ఇన్వెస్టర్లు (FII) రూ. 599.54 కోట్ల విలువైన షేర్లను, దేశీయ సంస్థాగత ఇన్వెస్టర్లు (DII) రూ. 1,019.69 కోట్ల విలువైన షేర్లను కొనుగోలు చేయడం మార్కెట్ సెంటిమెంట్‌ను బలపరిచింది.

ఆసియా మార్కెట్లలో దక్షిణ కొరియా, తైవాన్ సూచీలు లాభాలతో ప్రారంభం కావడం మరియు యూఎస్ స్టాక్ మార్కెట్ ఫ్యూచర్స్ స్వల్పంగా పెరగడం అంతర్జాతీయ సానుకూల సంకేతాలను అందించాయి. చివరిగా అల్ట్రాటెక్ సిమెంట్, ఏషియన్ పెయింట్స్ వంటి దిగ్గజ స్టాక్స్ ఇచ్చిన ర్యాలీ సూచీల పెంపునకు దోహదపడింది. అయితే, చమురు ధరలు ఇంకా $100 వద్దే ఉండటం, యూఎస్ 10-సంవత్సరాల బాండ్ ఈల్డ్స్ 5%కి చేరువలో కొనసాగుతుండటంతో రాబోయే రోజుల్లో వోలటాలిటీ కొనసాగే అవకాశం ఉందనేది విశ్లేషకుల అంచనా.