స్టాక్ మార్కెట్ టుడే.. నష్టాలతో ప్రారంభమైన షేర్ మార్కెట్.. కారణాలు ఏంటంటే..
Stock Market Today: వరుసగా రెండు రోజుల లాభాల తర్వాత భారత స్టాక్ మార్కెట్లు బుధవారం (నవంబర్ 18) తీవ్ర అమ్మకాల ఒత్తిడితో నష్టాల్లోకి జారుకున్నాయి. ఉదయం సెషన్లో బీఎస్ఈ సెన్సెక్స్ 470 పాయింట్లకు పైగా కుప్పకూలి 82,058 స్థాయికి పడిపోగా.. ఎన్ఎస్ఈ నిఫ్టీ 159 పాయింట్లు నష్టపోయి 25,300 కీలక మద్దతు స్థాయి దిగువకు (25,262 వద్దకు) చేరుకుంది. దేశీయ, అంతర్జాతీయ మార్కెట్లలో నెలకొన్న ప్రతికూల పరిణామాలు.. ముఖ్యంగా మధ్యప్రాచ్యంలో మళ్లీ భగ్గుమన్న యుద్ధ ఉద్రిక్తతలు మదుపర్ల సెంటిమెంట్ను తీవ్రంగా దెబ్బతీశాయి.
మధ్యప్రాచ్యంలో భౌగోళిక రాజకీయ పరిస్థితులు మరింత ప్రమాదకరంగా మారాయి. కువైట్లోని కీలకమైన అలీ అల్-సలేం (Ali Al Salem) సైనిక స్థావరంలో ఉన్న అమెరికా డ్రోన్, క్షిపణి వ్యవస్థలను లక్ష్యంగా చేసుకుని తాము దాడులు జరిపినట్లు ఇరాన్ సైన్యం ప్రకటించిందని ఇరాన్ అధికారిక మీడియా పేర్కొంది.

అదే సమయంలో బహ్రెయిన్లోని అమెరికా స్థావరాలపైనా ఇరాన్ డ్రోన్ దాడులకు యత్నించగా, కువైట్, బహ్రెయిన్ గగనతల రక్షణ వ్యవస్థలు వాటిని అడ్డుకున్నాయి. మరోవైపు, సౌదీ అరేబియా రాజధాని రియాద్ వైపు దూసుకొస్తున్న హౌతీ క్రూయిజ్ క్షిపణులను సౌదీ నేతృత్వంలోని సంకీర్ణ దళాలు కూల్చివేశాయి. ఈ పరిణామాలు అంతర్జాతీయ మార్కెట్లలో అనిశ్చితిని పెంచాయి.
బుధవారం నాటి స్టాక్ మార్కెట్ పతనానికి ప్రధానంగా నాలుగు కారణాలు దోహదపడ్డాయని మార్కెట్ నిపుణులు విశ్లేషిస్తున్నారు:
మొదటి కారణం ఏంటంటే.. నిఫ్టీ కేవలం 12 ట్రేడింగ్ సెషన్లలోనే దాదాపు 13 శాతం మేర ఎగబాకిన నేపథ్యంలో, గరిష్ఠ స్థాయిల వద్ద మదుపర్లు తమ లాభాలను సొమ్ము చేసుకునేందుకు మొగ్గు చూపారు.
రెండవ కారణం ఏంటంటే.. మంగళవారం రాత్రి యూఎస్ మార్కెట్లు భారీ నష్టాలతో ముగిశాయి. డౌ జోన్స్ 1.64 శాతం, ఎస్&పి 500 సూచీ 1.03 శాతం, నాస్డాక్ 0.74 శాతం చొప్పున క్షీణించాయి.
మూడవది ఏంటంటే.. అమెరికాలో ద్రవ్యోల్బణం కారణంగా ఫెడరల్ రిజర్వ్ వడ్డీ రేట్లను మరింత పెంచవచ్చనే అంచనాలతో యూఎస్ బాండ్ ఈల్డ్స్ ఎగబాకడం, ఏఐ కంపెనీల భారీ ఖర్చులపై ఆందోళనలు గ్లోబల్ మార్కెట్లలో రిస్క్ సామర్థ్యాన్ని తగ్గించాయి.
నాలుగవ కారణంగా అమెరికన్ డాలర్ బలపడటంతో దేశీయంగా నిఫ్టీ మెటల్ సూచీ 1.6 శాతం పడిపోయింది. అంతకుమించి, అంతర్జాతీయ కమోడిటీ మార్కెట్లో బంగారం, వెండి ధరలు కేవలం 90 నిమిషాల వ్యవధిలోనే ఏకంగా 425 బిలియన్ డాలర్ల (డాలర్కు రూ. 94 చొప్పున సుమారు రూ. 39.95 లక్షల కోట్లు) మార్కెట్ విలువను కోల్పోయి పెను ప్రకంపనలు సృష్టించాయి.
గత ఏడు రోజుల్లో బంగారం 8 శాతం, వెండి 13.5 శాతం నష్టపోగా.. తాజా ట్రేడింగ్లో బంగారం 1.25 శాతం తగ్గి ఔన్సుకు 3,812 డాలర్ల వద్దకు (357 బిలియన్ డాలర్లు లేదా రూ. 33.56 లక్షల కోట్ల విలువ క్షీణత) దిగివచ్చింది. వెండి సైతం 2.3 శాతం పడిపోయి ఔన్సుకు 46.5 డాలర్ల వద్ద (68 బిలియన్ డాలర్లు లేదా రూ. 6.39 లక్షల కోట్ల విలువ క్షీణత) ట్రేడవుతోంది. దేశీయ ఎంసీఎక్స్ మార్కెట్లోనూ బంగారం 10 గ్రాములకు రూ. 1.31 లక్షల స్థాయికి, వెండి కిలోకు రూ. 1.64 లక్షల కనిష్ఠానికి పడిపోవడం విశేషం.


Click it and Unblock the Notifications
