మూడు రోజుల నష్టాలకు బ్రేక్.. లాభాల్లో ప్రారంభమైన స్టాక్ మార్కెట్లు..

Stock Market Today: గత మూడు ట్రేడింగ్ సెషన్లుగా నష్టాల్లో మునిగిన భారత స్టాక్ మార్కెట్లు గురువారం తిరిగి లాభాల బాట పట్టాయి. సానుకూల అంతర్జాతీయ సంకేతాల మద్దతుతో బెంచ్‌మార్క్ సూచీలు గురువారం ఉదయం బలంగా ప్రారంభమయ్యాయి. బొంబాయి స్టాక్ ఎక్స్ఛేంజ్ సూచీ సెన్సెక్స్ మునుపటి ముగింపు 76,724 పాయింట్లతో పోలిస్తే 220 పాయింట్లు పుంజుకుని 76,800 స్థాయి సమీపంలో ట్రేడవుతోంది. మరోవైపు నేషనల్ స్టాక్ ఎక్స్ఛేంజ్ సూచీ నిఫ్టీ కూడా 80 పాయింట్ల లాభంతో కీలకమైన 24,000 మార్కును తాకి, అదే స్థాయి వద్ద కొనసాగుతోంది. సూచీలతో పాటు విస్తృత మార్కెట్ (Broad Market) కూడా సానుకూల ధోరణిని కనబరుస్తోంది.

ఎన్‌ఎస్‌ఈ రంగాల సూచీలలో కొనుగోళ్ల జోరు కనిపిస్తోంది. ముఖ్యంగా నిఫ్టీ రియల్టీ, మీడియా, పీఎస్‌యూ బ్యాంక్ (రంగానికి చెందిన ప్రభుత్వ రంగా బ్యాంకులు) సూచీలు ఒక్కొక్కటి 1 శాతం చొప్పున లాభపడి మార్కెట్‌కు ఊతాన్నిస్తున్నాయి. మరోవైపు ఐటీ, ఆటో, ఎఫ్‌ఎంసీజీ (FMCG) రంగాలు కొంత ఒత్తిడికి లోనై 0.70 శాతం వరకు నష్టాల్లో ట్రేడవుతున్నాయి.

నిఫ్టీలో ఐసిఐసిఐ బ్యాంక్, ఎస్‌బిఐ మరియు అదానీ పోర్ట్స్ షేర్లు 1 శాతానికి పైగా పెరిగి టాప్ గెయినర్లుగా నిలిచాయి. వీటితో పాటు యాక్సిస్ బ్యాంక్, జెఎస్‌డబ్ల్యు స్టీల్ మరియు హెచ్‌డిఎఫ్‌సి బ్యాంక్ షేర్లు లాభాల బాటలో పయనిస్తున్నాయి. హెచ్‌సిఎల్ టెక్, టెక్ మహీంద్రా మరియు ఇండిగో షేర్లు 1 శాతానికి పైగా క్షీణించి నష్టాల్లో ముందంజలో ఉన్నాయి.

Also Read

క్రూడ్ ఆయిల్ మంటలు.. స్టాక్ మార్కెట్లో ఒక్కరోజులో రూ.2 లక్షల కోట్ల సంపద ఆవిరి..

అంతర్జాతీయ మార్కెట్లో బ్రెంట్ క్రూడ్ ధర దాదాపు అర శాతం తగ్గి బ్యారెల్‌కు $95.10 వద్దకు పడిపోయింది. ఇరాన్‌తో సుదీర్ఘ పోరు జరిగే అవకాశాలు తక్కువగా ఉన్నాయని అమెరికా అధ్యక్షుడు డొనాల్డ్ ట్రంప్ చేసిన వ్యాఖ్యలు, హోర్ముజ్ జలసంధి యూఎస్ నియంత్రణలోనే ఉందన్న ప్రకటనల నేపథ్యంలో చమురు ధరలపై ఒత్తిడి పెరిగింది. క్రూడ్ ఆయిల్ ధరలు తగ్గడం వల్ల ద్రవ్యోల్బణం, వడ్డీ రేట్లపై ఉన్న ఆందోళనలు ఉపశమించి మార్కెట్ సెంటిమెంట్ మెరుగుపడింది.

చమురు భయాలు తగ్గడంతో ఆసియా మార్కెట్లు తిరిగి కోలుకున్నాయి. కొరియన్ కోస్పి సూచీ 1.5 శాతం లాభపడగా, జపాన్ నిక్కీ 120 పాయింట్లు పెరిగింది. షాంఘై, హాంగ్ కాంగ్ మార్కెట్లు కూడా ఆకుపచ్చ రంగులో (లాభాల్లో) ట్రేడవుతుండగా, యూఎస్ ఫ్యూచర్స్ మార్కెట్లు స్థిరంగా ఉన్నాయి.

మార్కెట్లో ఐపీఓల జోరు కొనసాగుతోంది. లుమినో ఇండస్ట్రీస్ షేరు ఎన్‌ఎస్‌ఈ, బీఎస్‌ఈలలో అద్భుతమైన లిస్టింగ్‌ను నమోదు చేసింది. ఎన్‌ఎస్‌ఈలో ఈ షేరు తన ఇష్యూ ధర ₹82తో పోలిస్తే 34 శాతం ప్రీమియంతో ₹110 వద్ద లిస్ట్ అయింది. బీఎస్‌ఈలో ₹109 వద్ద (₹32.93 ప్రీమియం) ప్రారంభమైంది. బిడ్డింగ్ చివరి నాటికి 118.12 రెట్ల ఓవర్‌సబ్‌స్క్రిప్షన్ సాధించిన ఈ కంపెనీ ఐపీఓ ద్వారా ₹700 కోట్లు (₹500 కోట్ల ఫ్రెష్ ఇష్యూ, ₹200 కోట్ల ఓఎఫ్‌ఎస్) సేకరించిన సంగతి తెలిసిందే.