Stock market: యుద్ధం ముగిసినా మార్కెట్‌ రిస్క్ తప్పదా? ఇన్వెస్టర్లు ఏం చేయాలంటే..

ప్రస్తుతం ప్రపంచవ్యాప్తంగా ఇన్వెస్టర్లందరి కళ్లు ఇరాన్ యుద్ధంపైనే ఉన్నాయి. యుద్ధం ఎప్పుడు ముగుస్తుందా.. మళ్ళీ మార్కెట్లు ఎప్పుడు పుంజుకుంటాయా.. అని అందరూ ఆశగా ఎదురుచూస్తున్నారు. అయితే గోల్డ్‌మన్ సాక్స్ మాజీ సీఈఓ , సీనియర్ ఛైర్మన్ లాయిడ్ బ్లాంక్ ఫెయిన్ తాజాగా చేసిన వ్యాఖ్యలు ఇన్వెస్టర్లలో వణుకు పుట్టిస్తున్నాయి. యుద్ధం రేపే ముగిసినా కూడా దాని వల్ల జరిగిన ఆర్థిక నష్టం మాత్రం చాలా కాలం పాటు ఉంటుందని ఆయన హెచ్చరించారు.

ఇన్ఫ్రాస్ట్రక్చర్ దెబ్బతింటే కోలుకోవడం కష్టం

యుద్ధం వల్ల కేవలం ప్రాణ నష్టమే కాదు, దేశాల ఆర్థిక వెన్నెముక అయిన మౌలిక సదుపాయాలు (Infrastructure) తీవ్రంగా దెబ్బతింటాయి. "యుద్ధం రేపు ఆగిపోయినా, దెబ్బతిన్న వ్యవస్థలను పునర్నిర్మించడానికి చాలా సమయం పడుతుంది. కాబట్టి స్టాక్ మార్కెట్ (Stock market) లో ఆ ఒత్తిడి (Stress) వెంటనే తగ్గదు" అని బ్లాంక్ ఫెయిన్ స్పష్టం చేశారు. చాలా మంది ఇన్వెస్టర్లు యుద్ధం ముగియగానే అంతా సెట్ అయిపోతుందని అనుకుంటున్నారు. కానీ, అది భ్రమ మాత్రమే అని ఆయన అభిప్రాయపడ్డారు.

ఎనర్జీ మార్కెట్‌ లో భారీ కుదుపులు

ఇరాన్ యుద్ధం కారణంగా ఇంధన సరఫరా వ్యవస్థలు (Energy Supply Chains) చిన్నాభిన్నమయ్యాయి. ముఖ్యంగా అంతర్జాతీయ చమురు సరఫరాకు అత్యంత కీలకమైన 'స్ట్రెయిట్ ఆఫ్ హార్ముజ్' మార్గంలో అంతరాయాలు కలగడం వల్ల ఆయిల్ ధరల్లో తీవ్రమైన ఒడిదుడుకులు కనిపిస్తున్నాయి. గతంలో వృద్ధి రేటు, వడ్డీ రేట్ల తగ్గింపు వంటి సానుకూల అంశాల ఆధారంగా నడిచిన స్టాక్ మార్కెట్ (stock market), ఇప్పుడు యుద్ధ భయాలు, ఇంధన ధరల అస్థిరత చుట్టూ తిరుగుతోంది.

ఇన్వెస్టర్లు ఏం చేయాలి?

ఇలాంటి అస్థిరమైన మార్కెట్ పరిస్థితుల్లో ఇన్వెస్టర్లు చాలా జాగ్రత్తగా ఉండాలని బ్లాంక్ ఫెయిన్ సూచించారు.

• అతిగా ఊహించవద్దు: యుద్ధం త్వరగా ముగుస్తుందనో లేదా ఇంకా కాలం సాగుతుందనో ముందే ఊహించి భారీ బెట్టింగ్‌లు (Conviction Trades) చేయకండి.
• ఫ్లెక్సిబిలిటీ ముఖ్యం: మార్కెట్ పరిస్థితులకు అనుగుణంగా ఎప్పటికప్పుడు నిర్ణయాలు మార్చుకునేలా సిద్ధంగా ఉండాలి (Be fleet of foot).
• హెడ్జింగ్ జాగ్రత్త: రిస్క్ తగ్గించుకోవడానికి చేసే హెడ్జింగ్ కూడా ఒక్కోసారి వృథా కావచ్చు, కాబట్టి ప్రతి రూపాయిని ఆచితూచి ఖర్చు చేయాలి.

ప్రైవేట్ మార్కెట్లలో పొంచి ఉన్న ప్రమాదం

పబ్లిక్ స్టాక్ మార్కెట్లే కాకుండా, ప్రైవేట్ ఈక్విటీ మార్కెట్లలో కూడా అసలైన ముప్పు దాగి ఉందని ఆయన హెచ్చరించారు. పబ్లిక్ మార్కెట్లలో ధరలు ఎప్పటికప్పుడు మారుతుంటాయి, కానీ ప్రైవేట్ మార్కెట్లలో వాల్యుయేషన్లు ఇంకా సరిగ్గా అప్‌డేట్ కాలేదని, అక్కడ ఒక పెద్ద 'కరెక్షన్' వచ్చే అవకాశం ఉందని ఆయన ఆందోళన వ్యక్తం చేశారు. మొత్తానికి, ఇన్వెస్టర్లు గుడ్డిగా మార్కెట్‌ను నమ్మకుండా, డిఫెన్సివ్ మోడ్‌ లో ఉండటమే ప్రస్తుతానికి శ్రేయస్కరం.