స్టాక్ మార్కెట్ క్లోజింగ్ బెల్.. ఫ్లాట్‌గా ముగిసిన షేర్ మార్కెట్.. హార్ముజ్ జలసంధి ఉద్రిక్తతలతో అలర్ట్..

అంతర్జాతీయ మార్కెట్లలో నెలకొన్న భౌగోళిక రాజకీయ అనిశ్చితి, ముఖ్యంగా హార్ముజ్ జలసంధిని తిరిగి తెరిచే విషయమై అమెరికా, ఇరాన్‌ల మధ్య ఒప్పందంపై స్పష్టత లేకపోవడంతో సోమవారం ట్రేడింగ్ సెషన్‌లో భారత స్టాక్ మార్కెట్లు తీవ్ర అస్థిరత మధ్య ముగిశాయి. రోజంతా హెచ్చుతగ్గులకు లోనైన సూచీలు చివరికి దాదాపు ఫ్లాట్ గా ముగిశాయి. ట్రేడింగ్ ముగిసే సమయానికి బీఎస్‌ఈ సెన్సెక్స్ 21 పాయింట్లు (0.03%) స్వల్పంగా క్షీణించి 78,478.66 వద్ద స్థిరపడగా.. ఎన్‌ఎస్‌ఈ నిఫ్టీ50 10.50 పాయింట్లు (0.04%) నష్టపోయి 24,560 వద్ద క్లోజ్ అయింది.

బెంచ్ మార్క్ సూచీలు ఫ్లాట్‌గా ముగిసినప్పటికీ.. మిడ్‌క్యాప్, స్మాల్‌క్యాప్ సూచీలు రాణించడంతో విస్తృత మార్కెట్ పెట్టుబడిదారులకు ఊరటనిచ్చింది. నిఫ్టీ మిడ్‌క్యాప్ సూచీ 0.66 శాతం, నిఫ్టీ స్మాల్‌క్యాప్ సూచీ 0.16 శాతం మేర లాభపడ్డాయి. రంగాల పరంగా చూస్తే.. నిఫ్టీ రియల్టీ, ప్రైవేట్ బ్యాంక్, ఐటీ రంగాలు సానుకూల ధోరణిని కనబరచగా.. పీఎస్‌యూ బ్యాంకింగ్ రంగం తీవ్ర ఒత్తిడిని ఎదుర్కొంది. నిఫ్టీ-50 లో ముఖ్యంగా టైటాన్ కంపెనీ, గ్రాసిమ్ ఇండస్ట్రీస్, టాటా స్టీల్ స్టాక్‌లు భారీగా లాభపడిన జాబితాలో నిలిచాయి.

ప్రైమరీ మార్కెట్‌లో సందడి కొనసాగుతోంది. ఈరోజు ధూత్ ట్రాన్స్‌మిషన్, మోల్బియో డయాగ్నోస్టిక్స్ ఐపీఓలు రూ. 4,006.59 కోట్ల సమీకరణే లక్ష్యంగా సబ్‌స్క్రిప్షన్ కోసం ప్రారంభమయ్యాయి. మరోవైపు లీప్ ఇండియా, టెక్నోక్రాఫ్ట్ వెంచర్స్, ఆప్టిమిస్టిక్స్ ఎంటర్‌టైన్‌మెంట్ ఐపీఓలు రెండవ రోజులోకి అడుగుపెట్టగా.. ఎల్ఏపీఎల్ ఆటోమోటివ్ ఐపీఓకు ఈరోజే చివరి రోజుగా ఉంది.

Also Read

పెట్టుబడిదారులు డబ్బులతో రెడీనా.. ధూత్ ఐపీఓ వచ్చేసింది.. పూర్తి వివరాలు ఇవిగో..

జియోజిత్ ఇన్వెస్ట్‌మెంట్స్ రీసెర్చ్ హెడ్ వినోద్ నాయర్ మాట్లాడుతూ.. హార్ముజ్ జలసంధి ఉద్రిక్తతల వల్ల ఇన్వెస్టర్లు జాగ్రత్త వహించారని, అయితే కార్పొరేట్ కంపెనీల సానుకూల ఫలితాలు, అమెరికాలో బలహీనమైన ఉపాధి డేటా ఫెడ్ రేట్ల పెంపు భయాలను తగ్గించి మార్కెట్‌కు మద్దతు ఇచ్చాయని తెలిపారు. ఇన్వెస్టర్లు ఇప్పుడు రాబోయే అమెరికా సీపీఐ (ద్రవ్యోల్బణం) గణాంకాల కోసం ఎదురుచూస్తున్నారు.

ఇక కరెన్సీ, కమోడిటీ మార్కెట్ల విషయానికి వస్తే.. ఎల్‌కేపీ సెక్యూరిటీస్ విశ్లేషకుడు జతిన్ త్రివేది ప్రకారం.. ముడి చమురు ధరలు బ్యారెల్‌కు $80 స్థాయి వద్ద మద్దతు పొంది 2.5 శాతం మేర పెరిగాయి. చమురు ధరల పెరుగుదల దిగుమతుల బిల్లును పెంచడంతో భారత రూపాయి 0.07 శాతం బలహీనపడి డాలర్‌కు 95.26 వద్దకు చేరింది. యూఎస్ ద్రవ్యోల్బణ డేటా ముంగిట డాలర్ హెచ్చుతగ్గులకు లోనయ్యే అవకాశం ఉందని, ప్రస్తుతం USD/INR ధర 95.00 నుండి 95.50 శ్రేణిలో కదలాడొచ్చని ఆయన అంచనా వేశారు.

డిస్క్లైమర్: ఈ వెబ్‌సైట్‌లోని అభిప్రాయాలు, సూచనలు పూర్తిగా వ్యక్తిగత విశ్లేషకులు లేదా ఇతర సంస్థలవి మాత్రమే. ఇవి Goodreturns.in లేదా Greynium Information Technologies Private Limited అధికారిక అభిప్రాయాలు కాదని గమనించగలరు.మేము ఈ విషయం యొక్క ఖచ్చితత్వం, సమగ్రత లేదా విశ్వసనీయతపై ఎటువంటి హామీ ఇవ్వడం కాని, అనుమతించడం కాని బాధ్యత వహించడం జరగదు. మేము ఎలాంటి పెట్టుబడి సలహా ఇవ్వము. అలాగే ఎటువంటి సెక్యూరిటీ కొనుగోలు లేదా అమ్మకాలు ప్రోత్సహించము. ఈ వెబ్‌సైట్‌లోని కథనం పూర్తిగా సమాచారం, విద్యా ప్రయోజనాల కోసమే అందించబడుతుంది. మీరు ఏదైనా పెట్టుబడి నిర్ణయం తీసుకునే ముందు, లైసెన్స్ పొందిన ఆర్థిక సలహాదారుల సహాయం తీసుకోండి. ఈ కథనాన్ని కేవలం సమాచారంగా మాత్రమే పరిగణించండి.