ఉదయం ఊపు సాయంత్రానికి తుస్సు .. 55 నిమిషాల్లో మారిపోయిన స్టాక్ మార్కెట్ మొత్తం కథ..

గురువారం నాటి స్టాక్ మార్కెట్ ట్రేడింగ్ ఒక ఉత్కంఠభరితమైన క్రికెట్ మ్యాచ్‌ను తలపించింది. ఉదయం పూట భారీ లాభాల దిశగా దూసుకెళ్లిన సూచీలు, చివరి గంట ట్రేడింగ్‌లో అనూహ్యంగా అమ్మకాల ఒత్తిడికి గురయ్యాయి. అయినప్పటికీ, నిఫ్టీ కీలకమైన 24,000 స్థాయికి ఎగువన ముగియడం మార్కెట్‌కు కొంత ఊరటనిచ్చే అంశం.

పైకి చూస్తే సెన్సెక్స్ 89 పాయింట్లు పెరిగి 77,080 వద్ద, నిఫ్టీ 34 పాయింట్ల లాభంతో 24,056 వద్ద ముగిసి మార్కెట్ బాగానే రాణించినట్లు భ్రమ కలిగిస్తున్నప్పటికీ, మార్కెట్ అంతర్గత చిత్రం మాత్రం పూర్తిగా భిన్నమైన కథను చెప్పింది. మార్కెట్లో పెరిగిన షేర్ల కంటే పడిపోయిన షేర్ల సంఖ్య దాదాపు రెట్టింపుగా నమోదైంది. అంటే అడ్వాన్స్-డిక్లైన్ రేషియో సుమారు 1:2గా ఉంది. ఇండెక్స్ లాభాల్లో ఉన్నా, మెజారిటీ స్టాక్‌లు నష్టాల్లోనే ముగిశాయి.

రంగాల వారీగా పరిశీలిస్తే,.. అంతర్జాతీయ మార్కెట్లో బ్రెంట్ క్రూడ్, లోహాల ధరలు యుద్ధానికి ముందు నాటి స్థాయికి పడిపోవడం ఆటో, ఎయిర్‌లైన్స్ రంగాలకు డబుల్ బెనిఫిట్‌గా మారింది. తక్కువ చమురు ధరలు రవాణా ఖర్చులను తగ్గిస్తాయనే ఆశలు, చమురుతో పాటు చౌకైన లోహాలు ఉత్పత్తి వ్యయాన్ని తగ్గిస్తాయనే అంచనాలతో ఆటో స్టాక్స్‌లో కొనుగోళ్ల వెల్లువ కురిసింది.

దీనివల్ల మహీంద్రా & మహీంద్రా, మారుతి సుజుకి షేర్లు దాదాపు 4 శాతం చొప్పున పెరిగాయి. ఆటో విడిభాగాల తయారీ సంస్థలైన మోథర్‌సన్, యునో మిండా కూడా భారీ లాభాలను ఆర్జించాయి. ఇదే సమయంలో ఇంధన ధరల తగ్గుదల సానుకూలంగా మారడంతో, దేశీయ విమానయాన దిగ్గజం ఇండిగో వరుసగా రెండో రోజు కూడా నిఫ్టీ టాప్ గెయినర్లలో ఒకటిగా నిలిచి, దాదాపు 4 శాతం లాభంతో ముగిసింది.

Also Read

స్టాక్ మార్కెట్ ఇన్వెస్టర్లకు బిగ్ అలర్ట్.. రేపటి నుంచి మూడు రోజులు షేర్ మార్కెట్ బంద్.. పూర్తి వివరాలివే..

మరోవైపు, రోజంతా బలంగా రాణించిన బ్యాంకింగ్ స్టాక్స్ చివరి గంటలో ప్రాఫిట్ బుకింగ్ కారణంగా రోజు గరిష్టాల నుండి ఏకంగా 500 పాయింట్లకు పైగా పడిపోయాయి. చివరకు బ్యాంక్ నిఫ్టీ కేవలం 27 పాయింట్ల స్వల్ప లాభంతో 58,177 వద్ద ముగిసింది. లార్జ్-క్యాప్ షేర్లు సూచీలను నిలబెట్టినప్పటికీ, మిడ్-క్యాప్ రంగం ఘోరంగా దెబ్బతింది. నిఫ్టీ మిడ్‌క్యాప్ ఇండెక్స్ ఉదయం నాటి లాభాలన్నింటినీ కోల్పోయి, ఏకంగా 340 పాయింట్లు కుప్పకూలి 61,796 వద్ద స్థిరపడింది. అలాగే అంతర్జాతీయంగా కమోడిటీ ధరల క్షీణత కారణంగా స్టీల్, మైనింగ్ స్టాక్స్‌లో అమ్మకాలు పెరిగి నిఫ్టీ మెటల్ ఇండెక్స్ దాదాపు 1 శాతం నష్టపోయింది.

ప్రత్యేక స్టాక్‌ల విషయానికి వస్తే, మార్కెట్ ఒత్తిడిలో ఉన్నా ఒరాకిల్ ఫైనాన్షియల్ సర్వీసెస్ (OFSS) టెక్నాలజీ స్టాక్ ఇన్వెస్టర్లను ఆనందపరుస్తూ ఈ వారంలోనే సుమారు 15 శాతం అద్భుతమైన రాబడిని అందించింది. రూ. 1,500 కోట్ల వరకు నిధుల సమీకరణ కోసం క్యూఐపీ ప్రకటన చేయడంతో స్టెరిలైట్ టెక్నాలజీస్ (STL) షేరు దాదాపు 5 శాతం లాభపడింది. అలాగే కౌంటర్‌లో 1 శాతానికి పైగా వాటా చేతులు మారినట్లు జరిగిన బ్లాక్ డీల్ తర్వాత లోధా రియల్టీ స్టాక్ 1 శాతం పైగా లాభంతో ముగిసింది.

అయితే, బంగారం ధరలు పడిపోతుండటంతో గోల్డ్ లోన్ వ్యాపారాలపై ప్రభావం పడుతుందనే ఆందోళనల మధ్య ముత్తూట్ ఫైనాన్స్, మణప్పురం ఫైనాన్స్ షేర్లు 2 నుండి 3 శాతం మేర క్షీణించాయి. ఈ వారం ప్రారంభంలో సాధించిన లాభాలన్నింటినీ తుడిచిపెట్టేస్తూ, బంధన్ బ్యాంక్ షేరు 5 శాతం మేర కుప్పకూలి ఇన్వెస్టర్లకు నిరాశ మిగిల్చింది. కేవలం మెయిన్ ఇండెక్స్ గ్రీన్‌ కలర్‌లో ముగిసినంత మాత్రాన మార్కెట్ అంతా బాగున్నట్లు కాదు, అసలు సిసలైన ట్రెండ్ ఎప్పుడూ అంతర్గత మార్కెట్ డైనమిక్స్‌లోనే దాగి ఉంటుందని గురువారం నాటి ట్రేడింగ్ మరోసారి రుజువు చేసింది.

డిస్క్లైమర్: ఈ వెబ్‌సైట్‌లోని అభిప్రాయాలు, సూచనలు పూర్తిగా వ్యక్తిగత విశ్లేషకులు లేదా ఇతర సంస్థలవి మాత్రమే. ఇవి Goodreturns.in లేదా Greynium Information Technologies Private Limited అధికారిక అభిప్రాయాలు కాదని గమనించగలరు.మేము ఈ విషయం యొక్క ఖచ్చితత్వం, సమగ్రత లేదా విశ్వసనీయతపై ఎటువంటి హామీ ఇవ్వడం కాని, అనుమతించడం కాని బాధ్యత వహించడం జరగదు. మేము ఎలాంటి పెట్టుబడి సలహా ఇవ్వము. అలాగే ఎటువంటి సెక్యూరిటీ కొనుగోలు లేదా అమ్మకాలు ప్రోత్సహించము. ఈ వెబ్‌సైట్‌లోని కథనం పూర్తిగా సమాచారం, విద్యా ప్రయోజనాల కోసమే అందించబడుతుంది. మీరు ఏదైనా పెట్టుబడి నిర్ణయం తీసుకునే ముందు, లైసెన్స్ పొందిన ఆర్థిక సలహాదారుల సహాయం తీసుకోండి. ఈ కథనాన్ని కేవలం సమాచారంగా మాత్రమే పరిగణించండి.