స్టాక్ మార్కెట్ క్లోజింగ్ బెల్.. వరుసగా రెండో రోజు రక్తపాతం.. రూ. 17 లక్షల కోట్ల సంపద ఆవిరి..

భారత స్టాక్ మార్కెట్ భారీ నష్టాలతో ముగిసింది. వరుసగా రెండో రోజు కూడా భారీ నష్టాలను చవిచూడటంతో ఇన్వెస్టర్లలో ఆందోళన నెలకొంది. సెన్సెక్స్ 1,500 పాయింట్లు, నిఫ్టీ 450 పాయింట్లకు పైగా పతనం కావడం మార్కెట్ యొక్క తీవ్రమైన అమ్మకాల ఒత్తిడిని సూచిస్తోంది. కేవలం నాలుగు రోజుల్లోనే రూ. 17 లక్షల కోట్ల సంపద ఆవిరైపోవడం గమనార్హంగా చెప్పుకోవచ్చు. దీనికి మనం ప్రధాన కారణాలను విశ్లేషిస్తే ప్రధాని మోదీ ప్రసంగం తరువాత జరిగిన పరిణామాలే కారణంగా చెప్పుకోవచ్చు.

హైదరాబాద్‌లోని ర్యాలీలో ప్రధానమంత్రి నరేంద్ర మోదీ చేసిన ప్రసంగం ఇన్వెస్టర్లను అప్రమత్తం చేసింది. పశ్చిమ ఆసియా సంక్షోభం దృష్ట్యా ఆర్థిక వ్యవస్థను కాపాడుకునేందుకు పెట్రోల్, డీజిల్ వాడకాన్ని తగ్గించాలని, విదేశీ పర్యటనలు మరియు బంగారం కొనుగోళ్లు వాయిదా వేసుకోవాలని ఆయన కోరారు. విదేశీ మారకద్రవ్యాన్ని ఆదా చేసేందుకు "వర్క్ ఫ్రమ్ హోమ్", "కార్‌పూలింగ్" వంటి చర్యలు చేపట్టాలన్న ఆయన విజ్ఞప్తి, రాబోయే రోజుల్లో ఆర్థిక సవాళ్లు మరింత తీవ్రం కావచ్చనే సంకేతాలను మార్కెట్లోకి పంపింది.

ఇరాన్ - అమెరికా మధ్య శాంతి కుదురుతుందన్న ఆశలు ఆవిరయ్యాయి. అమెరికా అధ్యక్షుడు డొనాల్డ్ ట్రంప్ కాల్పుల విరమణ ఒప్పందాన్ని "చెత్త" అని కొట్టిపారేయడం, ఇరాన్ నిబంధనలను తిరస్కరించడం పరిస్థితిని మరింత దిగజార్చింది. ఫిబ్రవరి చివరలో జరిగిన దాడుల అనంతరం ఉద్రిక్తతలు పతాక స్థాయికి చేరడం ఇన్వెస్టర్లను రిస్క్ తీసుకోకుండా వెనక్కి తగ్గేలా చేసింది.

అంతర్జాతీయ మార్కెట్‌లో ముడి చమురు ధర 3 శాతం పెరిగి బ్యారెల్‌కు 107 డాలర్లకు పైగా చేరింది. ప్రపంచ చమురు నిల్వలు ప్రమాదకరమైన కనిష్ట స్థాయికి చేరుకున్నాయని సౌదీ అరామ్కో హెచ్చరించడం, ఓపెక్ (OPEC) ఉత్పత్తి 26 ఏళ్ల కనిష్టానికి పడిపోవడం భారత ఆర్థిక వ్యవస్థపై భారాన్ని పెంచుతున్నాయి. చమురు ధరలు పెరిగితే దేశంలో ద్రవ్యోల్బణం పెరిగి, కంపెనీల లాభాలపై ప్రభావం చూపుతుందనే భయం మార్కెట్ పతనానికి దారితీసింది.

Also Read

స్టాక్ మార్కెట్ భారీ పతనం.. వరుసగా రెండో రోజు నష్టాలతో ఇన్వెస్టర్లు విలవిల.. ఐటీ రంగం కుదేల్..

దేశీయ కరెన్సీ రూపాయి చరిత్రలో ఎన్నడూ లేనంతగా క్షీణించింది. మంగళవారం ట్రేడింగ్‌లో డాలర్‌తో పోలిస్తే 95.63 వద్దకు పడిపోయింది. పెరుగుతున్న చమురు ధరలు, విదేశీ నిధుల తరలింపు కరెన్సీపై ఒత్తిడిని పెంచాయి. ఈ ఏడాది రూపాయి విలువ 6.5 శాతం పడిపోవడంతో ఆసియాలోనే బలహీనమైన కరెన్సీలలో ఒకటిగా నిలిచింది. బలహీనమైన రూపాయి వల్ల దిగుమతులు ప్రియమవ్వడమే కాకుండా, విదేశీ ఇన్వెస్టర్లకు భారత మార్కెట్ ఆకర్షణీయంగా కనిపించదు.

భారత మార్కెట్ నుండి విదేశీ పెట్టుబడిదారులు తమ నిధులను వెనక్కి తీసుకుంటున్నారు. సోమవారం ఒక్కరోజే FIIలు సుమారు రూ. 8,437 కోట్ల విలువైన షేర్లను విక్రయించారు. ఇరాన్ యుద్ధం ప్రారంభమైనప్పటి నుండి దాదాపు $20 బిలియన్ల నిధులు వెనక్కి వెళ్లడం మార్కెట్ వెన్ను విరిచింది. అంతర్జాతీయ అనిశ్చితి నెలకొన్నప్పుడు సురక్షితమైన డాలర్ లేదా బంగారం వైపు పెట్టుబడులు మళ్లడం సహజం, దాని ప్రభావమే ఇక్కడ కనిపిస్తోంది.

ప్రస్తుతానికి పశ్చిమ ఆసియాలో శాంతి నెలకొనే సూచనలు కనిపించకపోవడంతో.. Stock Market మరికొంత కాలం అస్థిరంగానే ఉండే అవకాశం ఉంది. ఇన్వెస్టర్లు అప్రమత్తంగా ఉండి, గందరగోళంలో తొందరపడి నిర్ణయాలు తీసుకోకుండా ఉండటం శ్రేయస్కరం.

డిస్క్లైమర్: ఈ వెబ్‌సైట్‌లోని అభిప్రాయాలు, సూచనలు పూర్తిగా వ్యక్తిగత విశ్లేషకులు లేదా ఇతర సంస్థలవి మాత్రమే. ఇవి Goodreturns.in లేదా Greynium Information Technologies Private Limited అధికారిక అభిప్రాయాలు కాదని గమనించగలరు.మేము ఈ విషయం యొక్క ఖచ్చితత్వం, సమగ్రత లేదా విశ్వసనీయతపై ఎటువంటి హామీ ఇవ్వడం కాని, అనుమతించడం కాని బాధ్యత వహించడం జరగదు. మేము ఎలాంటి పెట్టుబడి సలహా ఇవ్వము. అలాగే ఎటువంటి సెక్యూరిటీ కొనుగోలు లేదా అమ్మకాలు ప్రోత్సహించము. ఈ వెబ్‌సైట్‌లోని కథనం పూర్తిగా సమాచారం, విద్యా ప్రయోజనాల కోసమే అందించబడుతుంది. మీరు ఏదైనా పెట్టుబడి నిర్ణయం తీసుకునే ముందు, లైసెన్స్ పొందిన ఆర్థిక సలహాదారుల సహాయం తీసుకోండి. ఈ కథనాన్ని కేవలం సమాచారంగా మాత్రమే పరిగణించండి.