Click it and Unblock the Notifications
స్టాక్ మార్కెట్ని కుప్పకూల్చిన ఒక్క మెసేజ్.. చివరి 20 నిమిషాల్లోనే షేర్ మార్కెట్ భారీ పతనం..
స్టాక్ మార్కెట్లో కొన్నిసార్లు ఒక్క వార్తాంశం నిమిషాల వ్యవధిలో అంతవరకు సాగిన ట్రెండ్ను పూర్తిగా మార్చేస్తుంది. మంగళవారం ట్రేడింగ్ సెషన్లో సరిగ్గా ఇదే జరిగింది. ఉదయం నుండి సెన్సెక్స్, నిఫ్టీలు తీవ్రమైన హెచ్చుతగ్గుల మధ్య ఊగిసలాడాయి. అంతర్జాతీయ మార్కెట్లలో ముడి చమురు ధరలు స్వల్పంగా తగ్గడం, అమెరికా-ఇరాన్ చర్చలపై ఆశలు సజీవంగా ఉండటం ఉదయం పూట కొంత ఊరటనిచ్చాయి.
చమురు ధరలు తగ్గడం వల్ల భారత్ దిగుమతి బిల్లులు, ద్రవ్యోల్బణ ఒత్తిడి తగ్గుతుందనే అంచనాలు ఏర్పడ్డాయి. అయితే, ఐటీ రంగానికి చెందిన ప్రముఖ స్టాక్స్లో అమ్మకాల ఒత్తిడి తీవ్రం కావడంతో ఆ ఆశలు ఆవిరయ్యాయి. ప్రధాన సూచీలలో అత్యధిక వెయిటేజ్ ఉన్న ఐటీ కంపెనీల షేర్లు, టాటా గ్రూప్ స్టాక్స్ విపరీతంగా పడిపోవడంతో సెన్సెక్స్, నిఫ్టీలు రోజు కనిష్ట స్థాయిల వైపు దిగజారాయి.
మధ్యాహ్నం వేళ ఇరాన్ నుండి వచ్చిన ఒక కీలక ప్రకటన మార్కెట్ సెంటిమెంట్ను తక్షణమే మార్చివేసింది. సైనిక ఒత్తిడిని తగ్గించే దిశగా అమెరికా చర్యలు చేపడితే, ఏడు రోజుల్లోగా హార్ముజ్ జలసంధిని తిరిగి తెరవడానికి పరిశీలిస్తామని ఇరాన్ సంకేతాలు ఇచ్చింది.
ప్రపంచవ్యాప్త ముడి చమురు, ద్రవీకృత సహజ వాయువు రవాణాలో దాదాపు 20 శాతం వాటా ఉన్న ఈ జలసంధిని తెరుస్తారనే వార్త వెలువడిన 20 నిమిషాల్లోనే బ్రెంట్ క్రూడ్ ధర పదునుగా పడిపోయి బ్యారెల్కు $99 కంటే దిగువకు చేరింది. చమురు సరఫరా పునరుద్ధరణపై ఆశలు చిగురించడంతో క్రూడ్-సెన్సిటివ్ విమానయాన రంగ సంస్థ ఇండిగో షేర్లు 2 శాతం వరకు పుంజుకున్నాయి. విమాన ఇంధన ఖర్చులు, పెయింట్, టైర్ కంపెనీల ముడిసరుకు వ్యయం తగ్గుతుందనే అంచనాలతో సూచీలు రోజు కనిష్టాల నుండి వేగంగా కోలుకున్నాయి.
అయితే హార్ముజ్ జలసంధిపై కేవలం చర్చల సంకేతాలు మాత్రమే రావడం, ఐటీ రంగానికి చెందిన నష్టాలు కొనసాగడంతో మార్కెట్ ప్లస్ జోన్లోకి రాకపోయినా, నష్ట తీవ్రత పరిమితమైంది. చివరికి, సెన్సెక్స్ 330 పాయింట్లు నష్టపోయి 74,529 వద్ద, నిఫ్టీ 85 పాయింట్లు పడిపోయి 23,329 వద్ద ముగిశాయి. అలాగే నిఫ్టీ బ్యాంక్ 255 పాయింట్లు తగ్గి 56,215 వద్ద, మిడ్క్యాప్ సూచీ 50 పాయింట్లు తగ్గి 61,963 వద్ద ముగియడంతో నాలుగు రోజుల లాభాల ర్యాలీకి బ్రేక్ పడింది.
మరోవైపు బలహీనమైన మార్కెట్లో కూడా కొన్ని ఇండివిజువల్ స్టాక్స్ అద్భుత ప్రదర్శన చేశాయి. నథింగ్ సీఎమ్ఎఫ్ ఉత్పత్తుల విక్రయాల కోసం నూతన జాయింట్ వెంచర్లో మెజారిటీ వాటా సాధించడంతో ఆప్టిమస్ ఇన్ఫ్రాకామ్ షేరు 20 శాతం అప్పర్ సర్క్యూట్ను తాకింది. యూబీఎస్ టార్గెట్ ధరను పెంపొందించడంతో మీషో షేర్లు 10 శాతం మేర పెరగ్గా, మోర్గాన్ స్టాన్లీ రేటింగ్ అప్గ్రేడ్ తర్వాత కోల్ ఇండియా 3 శాతానికి పైగా లాభపడింది. కొత్త ఆర్డర్ల లభ్యతతో పేస్ డిజిటెక్ 7 శాతం, నూతన పురుగుమందు రిజిస్ట్రేషన్ అనుమతులతో పిఐ ఇండస్ట్రీస్ 3 శాతం లాభపడ్డాయి. అయితే, క్యూ1 ఫలితాలు బలహీనంగా ఉన్న ఆగ్మాంట్ మరియు సింబయోటెక్ షేర్లు 3 శాతానికి పైగా పడిపోయాయి.
Sign in with Google
