స్టాక్ మార్కెట్‌ను పరుగులు పెట్టించిన ఐటీ షేర్లు.. లాభాల్లో ముగిసిన బెంచ్‌మార్క్ సూచీలు..

శుక్రవారం నాటి ట్రేడింగ్‌లో భారత స్టాక్ మార్కెట్లు బలమైన కొనుగోళ్ల మద్దతుతో లాభాల్లో ముగిశాయి. ప్రధానంగా ఐటీ (IT) రంగానికి చెందిన షేర్లలో వ్యూహాత్మక కొనుగోళ్లు వ్యక్తమవ్వడం బెంచ్‌మార్క్ సూచీలను ముందుకు నడిపించింది.ఎన్‌ఎస్‌ఈ (NSE) నిఫ్టీ 50 సూచీ 84.80 పాయింట్లు (0.35%) పెరిగి 24,175.65 వద్ద స్థిరపడింది. గురువారం ఇది 24,090.85 వద్ద ముగిసిన సంగతి తెలిసిందే. ట్రేడింగ్ సమయంలో నిఫ్టీ గరిష్టంగా 24,188.30 మరియు కనిష్టంగా 24,076.85 పాయింట్ల మధ్య ఊగిసలాడింది. అదేవిధంగా, బీఎస్ఈ (BSE) సెన్సెక్స్ 330.92 పాయింట్లు (0.43%) లాభపడి 77,264.51 వద్ద ముగిసింది. ట్రేడింగ్ క్రమంలో సెన్సెక్స్ 76,988.22 పాయింట్ల కనిష్ట స్థాయిని కూడా తాకింది.

రంగాల వారీగా పరిశీలిస్తే ఐటీ రంగానికి చెందిన షేర్లు అత్యుత్తమ ప్రదర్శన కనబరిచాయి. నిఫ్టీ ఐటీ ఇండెక్స్ ఏకంగా 3.51% ఎగబాకి 31,281.70 వద్ద నిలిచింది. విశేషమేమిటంటే ఈ ఇండెక్స్‌లోని 10 కంపెనీల షేర్లూ లాభాల్లోనే ముగిశాయి. మెటల్ సూచీ 0.75%, ఫార్మా సూచీ 0.53% లాభపడ్డాయి. అయితే ఎఫ్‌ఎంసీజీ (0.46% తగ్గింపు), ఆటో (0.11% తగ్గింపు) స్టాక్స్ ఒత్తిడికి లోనయ్యాయి. నిఫ్టీ బ్యాంక్ కూడా 0.02% స్వల్ప నష్టంతో 57,496.30 వద్ద ముగిసింది.

నిఫ్టీ 50 సూచీలోని 30 షేర్లు లాభ పడగా, 19 నష్ట పోయాయి. టీసీఎస్ (TCS) 4% లాభపడి టాప్ గెయినర్‌గా నిలిచింది. ఇన్ఫోసిస్, టెక్ మహీంద్రా, హెచ్‌సీఎల్ టెక్ షేర్లు 2% నుండి 3% వరకు పెరిగాయి. ఐసీఐసీఐ బ్యాంక్ (ICICI Bank) 1.25% నష్టంతో ప్రధానంగా క్షీణించింది. నిఫ్టీ మిడ్‌క్యాప్ 100 సూచీ 0.05% లాభపడగా, స్మాల్‌క్యాప్ 100 సూచీ 0.20% పెరిగింది. నిఫ్టీ నెక్స్ట్ 50 మాత్రం 0.25% తగ్గింది.

Also Read

స్టాక్ మార్కెట్ దెబ్బేసిందా.. షేర్లు అమ్ముకుని ఎగ్జిట్ అవుతున్న ఇన్వెస్టర్లు.. కారణమేమిటంటే..

అంతర్జాతీయంగా ముడి చమురు ధరలు స్వల్పంగా తగ్గాయి. సెప్టెంబర్ ఫ్యూచర్స్ 0.35% తగ్గి బ్యారెల్‌కు $88.20 వద్ద ట్రేడవుతున్నాయి. బంగారం ఫ్యూచర్స్ 0.75%, వెండి 1.21% పడిపోయాయి. ఇన్వెస్టర్లు జాక్సన్ హోల్ కీలక సమావేశం ఫలితాల కోసం ఎదురుచూస్తున్నారు. ఐపీఓ విభాగంలో ప్రయారిటీ జ్యువెల్స్, ఈఎస్డీఎస్ సాఫ్ట్‌వేర్ సొల్యూషన్స్‌తో పాటు SME విభాగంలో కంప్లీట్ స్పోర్ట్స్, పలుక్ టెక్నాలజీస్ ఐపీఓలు ఈరోజే ప్రారంభమయ్యాయి.

మరోవైపు, టెంప్‌సెన్స్ ఇన్‌స్ట్రుమెంట్స్ (TempSens Instruments) షేర్లు ఎన్‌ఎస్‌ఈలో బంపర్ లిస్టింగ్ నమోదు చేశాయి. ఇష్యూ ధర రూ. 300 తో పోలిస్తే 111% ప్రీమియంతో రూ. 631 వద్ద లిస్ట్ అయి ఇన్వెస్టర్లకు భారీ లాభాలను అందించాయి.

డిస్క్లైమర్: ఈ వెబ్‌సైట్‌లోని అభిప్రాయాలు, సూచనలు పూర్తిగా వ్యక్తిగత విశ్లేషకులు లేదా ఇతర సంస్థలవి మాత్రమే. ఇవి Goodreturns.in లేదా Greynium Information Technologies Private Limited అధికారిక అభిప్రాయాలు కాదని గమనించగలరు.మేము ఈ విషయం యొక్క ఖచ్చితత్వం, సమగ్రత లేదా విశ్వసనీయతపై ఎటువంటి హామీ ఇవ్వడం కాని, అనుమతించడం కాని బాధ్యత వహించడం జరగదు. మేము ఎలాంటి పెట్టుబడి సలహా ఇవ్వము. అలాగే ఎటువంటి సెక్యూరిటీ కొనుగోలు లేదా అమ్మకాలు ప్రోత్సహించము. ఈ వెబ్‌సైట్‌లోని కథనం పూర్తిగా సమాచారం, విద్యా ప్రయోజనాల కోసమే అందించబడుతుంది. మీరు ఏదైనా పెట్టుబడి నిర్ణయం తీసుకునే ముందు, లైసెన్స్ పొందిన ఆర్థిక సలహాదారుల సహాయం తీసుకోండి. ఈ కథనాన్ని కేవలం సమాచారంగా మాత్రమే పరిగణించండి.