భారీ నష్టాలతో ముగిసిన స్టాక్ మార్కెట్.. ఇన్వెస్టర్ల కంట రక్త కన్నీరు పెట్టించిన రెండు కారణాలు ఇవే..

దేశీయ స్టాక్ మార్కెట్లు బుధవారం (ఆగస్టు 12) తీవ్ర ఒత్తిడి నడుమ నష్టాలతో ముగిశాయి. టాటా సన్స్ ఛైర్మన్ ఎన్. చంద్రశేఖరన్ ఆకస్మిక రాజీనామా వార్తలు టాటా గ్రూప్ షేర్లపై తీవ్ర ప్రభావం చూపగా, అంతర్జాతీయంగా పెరుగుతున్న ముడి చమురు ధరలు మరియు వెలువడనున్న భారత్, అమెరికా కీలక ద్రవ్యోల్బణ గణాంకాలు ఇన్వెస్టర్లలో అప్రమత్తతను పెంచాయి. అయితే ట్రేడింగ్ ముగిసే సమయానికి దిగువ స్థాయిల వద్ద లభించిన కొనుగోళ్ల మద్దతుతో సూచీలు కొంత వరకు నష్టాలను తగ్గించుకున్నాయి.

ట్రేడింగ్ సమయంలో ఒకానొక దశలో 24,265 వద్ద కనిష్ఠాన్ని తాకిన ఎన్‌ఎస్‌ఈ (NSE) నిఫ్టీ, చివరికి 35 పాయింట్ల స్వల్ప క్షీణతతో 24,435 వద్ద స్థిరపడింది. మరోవైపు బీఎస్ఈ (BSE) సెన్సెక్స్ 78,263 పాయింట్ల వద్ద ప్రారంభమై.. ఇంట్రాడేలో తీవ్ర ఒత్తిడిని ఎదుర్కొని చివరికి 187 పాయింట్లు పడిపోయి 77,966 వద్ద క్లోజ్ అయింది.

టాటా సన్స్ ఛైర్మన్ పదవి నుంచి ఎన్. చంద్రశేఖరన్ తప్పుకుంటున్నట్లు వెలువడిన ప్రకటన గ్రూప్ కంపెనీల స్టాక్స్‌ను దెబ్బతీసింది. ఐటీ దిగ్గజం టాటా కన్సల్టెన్సీ సర్వీసెస్ (TCS) షేరు ఇంట్రాడేలో 5 శాతానికి పైగా పతనమై.. చివరికి 3.9 శాతం నష్టంతో నిఫ్టీలోనే అత్యధికంగా నష్టపోయిన స్టాక్‌గా నిలిచింది. దీనికితోడు టాటా స్టీల్, టాటా కన్స్యూమర్ ప్రాడక్ట్స్ షేర్లు కూడా 1.5 శాతం మేర క్షీణించాయి. గోద్రేజ్ గ్రూప్ సహా ఫలితాలు ప్రకటించిన పలు కంపెనీల షేర్లలోనూ హెచ్చుతగ్గులు నమోదయ్యాయి.

ఐటీ ఇండెక్స్ 1.5 శాతానికి పైగా క్షీణించగా.. ప్రభుత్వ రంగ బ్యాంకులు మాత్రం అద్భుత ప్రదర్శన కనబరిచాయి. ఆరోగ్యకరమైన రుణ వృద్ధి, బలమైన ఆస్తి నాణ్యత మరియు ఆకర్షణీయమైన వాల్యుయేషన్ల కారణంతో నిఫ్టీ పీఎస్‌యూ (PSU) బ్యాంక్ సూచీ 2 శాతం లాభంతో ముగిసింది. గ్లోబల్ సప్లై పరిస్థితులపై ఆందోళనల నేపథ్యంలో లోహ రంగ (Metal) షేర్లు కూడా లాభాలను నమోదు చేశాయి. హిండాల్కో, ఎస్‌బీఐ (SBI), జియో ఫైనాన్షియల్ సర్వీసెస్ షేర్లు 1.3 శాతం నుండి 2.8 శాతం వరకు లాభపడి అగ్రస్థానంలో నిలిచాయి.

Also Read

చమురు మంటల్లో తగలబడుతున్న స్టాక్ మార్కెట్.. నష్టాల్లో కొనసాగుతున్న సెన్సెక్స్, నిఫ్టీ..

ప్రపంచవ్యాప్తంగా నెలకొన్న అనిశ్చితులు, విడుదల కానున్న భారత్, అమెరికా వినియోగదారుల ధరల ద్రవ్యోల్బణ (CPI) గణాంకాలకు ముందు ఇన్వెస్టర్లు జాగ్రత్త వహించారని జియోజిత్ ఇన్వెస్ట్‌మెంట్స్ రీసెర్చ్ హెడ్ వినోద్ నాయర్ తెలిపారు. ఇతర ఆసియా మార్కెట్లు లాభాల్లో పయనించినప్పటికీ, క్రూడ్ ఆయిల్ ధరలు పెరగడం దేశీయ మార్కెట్ సెంటిమెంట్‌ను దెబ్బతీసిందన్నారు.

విదేశీ సంస్థాగత పెట్టుబడిదారులు (FIIs) మంగళవారం (ఆగస్టు 11న) వరుసగా మూడో రోజు కూడా నికర కొనుగోలుదారులుగా నిలిచారు. తాత్కాలిక డేటా ప్రకారం.. విదేశీ ఇన్వెస్టర్లు రూ. 258 కోట్ల విలువైన షేర్లను కొనుగోలు చేయగా.. దేశీయ సంస్థాగత పెట్టుబడిదారులు (DIIs) రూ. 25 కోట్ల విలువైన పెట్టుబడులు పెట్టారు.