Click it and Unblock the Notifications
నష్టాలతో ముగిసిన స్టాక్ మార్కెట్.. కుప్పకూలిన బ్యాకింగ్ రంగాల షేర్లు.. హెచ్డీఎఫ్సీ షేర్లు భారీ పతనం..
బుధవారం నాటి దేశీయ స్టాక్ మార్కెట్ ట్రేడింగ్ తీవ్ర ఒడిదుడుకుల మధ్య ముగిసింది. ఉదయం బుల్స్ పూర్తి స్థాయి ఉత్సాహంతో మార్కెట్ను ప్రారంభించినప్పటికీ, ముగింపు సమయానికి ఆ వేగం మందగించింది. లార్జ్-క్యాప్ షేర్లు, ముఖ్యంగా బ్యాంకింగ్ రంగంలో లాభాల స్వీకరణ మార్కెట్ను కిందకు లాగగా, మిడ్-క్యాప్, రంగాల వారీ షేర్లు మాత్రం ఇన్వెస్టర్లకు కాసుల వర్షం కురిపించాయి.
రోజు ముగిసేసరికి సెన్సెక్స్ 142 పాయింట్లు పడిపోయి 75,867 వద్ద ముగియగా, నిఫ్టీ కేవలం 7 పాయింట్ల స్వల్ప క్షీణతతో 23,907 వద్ద ముగిసింది. ప్రధాన సూచీలు నీరసించినప్పటికీ, బ్రాడర్ మార్కెట్ వైపు ఇన్వెస్టర్ల మొగ్గు స్పష్టంగా కనిపించింది. దానికి నిదర్శనంగా నిఫ్టీ మిడ్-క్యాప్ సూచీ 260 పాయింట్లు లాభపడి 62,559 వద్ద ముగియడం విశేషం.
మార్కెట్ లాభాల్లో ముగియకుండా బ్యాంకింగ్ రంగానికి చెందిన షేర్లు ఆటను పాడుచేశాయి. నిఫ్టీ బ్యాంక్ ఏకంగా 239 పాయింట్లు నష్టపోయి 54,854 వద్ద స్థిరపడింది. ముఖ్యంగా హెచ్డీఎఫ్సీ బ్యాంక్ భారీ అమ్మకాల ఒత్తిడిని ఎదుర్కొని మార్కెట్పై తీవ్ర భారాన్ని మోపింది. మరోవైపు, మెటల్ రంగం బుధవారం నాటి ట్రేడింగ్లో అసలైన హీరోగా నిలిచి దాదాపు 2 శాతం వృద్ధిని నమోదు చేసింది.
మే నెల వాహన విక్రయాల గణాంకాలు వెలువడనున్న తరుణంలో ఆటో స్టాక్స్లో కొనుగోళ్ల వెల్లువ కనిపించింది. టాటా మోటార్స్ ప్యాసింజర్ వాహన వ్యాపార అంచనాలు, బజాజ్ ఆటో షేర్లు అగ్ర లాభాల్లో నిలిచాయి. ఇంటర్నేషనల్ మార్కెట్లో ముడి చమురు ధరలు తగ్గడం విమానయాన రంగానికి కలిసివచ్చింది, దీంతో ఇండిగో షేరు 2 శాతం పెరిగింది.
ఇటీవల విడుదలైన నాలుగో త్రైమాసిక ఫలితాలు ఆయా షేర్ల కదలికలను శాసించాయి. అంచనాలకు మించిన కార్యాచరణ సామర్థ్యం, అద్భుతమైన క్యూ4 ఫలితాల బ్యాక్డ్రాప్తో కమ్మిన్స్ ఇండియా షేరు ఏకంగా 11 శాతం దూసుకెళ్లి మార్కెట్లో హాట్ టాపిక్గా నిలిచింది. దీనికి భిన్నంగా ఓఎన్జీసీ బలహీనమైన త్రైమాసిక ఫలితాల కారణంగా ఇన్వెస్టర్లను తీవ్రంగా నిరాశపరిచింది. దీంతో నిఫ్టీలోనే అత్యంత బలహీనమైన స్టాక్గా నిలిచి 4 శాతం కంటే ఎక్కువ పతనమైంది. ప్రసార రంగంలో జీ ఎంటర్టైన్మెంట్ ప్రతిష్టాత్మక 'ఫీఫా ప్రపంచ కప్' ప్రసార హక్కుల కోసం చర్చలు జరుపుతోందనే వార్తలతో అకస్మాత్తుగా 10 శాతానికి పైగా అప్-సర్జ్ సాధించింది.
ఇక బ్యాటరీ, ఈవీ రంగాలపై మార్కెట్ సానుకూలతతో ఎక్సైడ్ ఇండస్ట్రీస్ వరుసగా రెండో రోజు కూడా రాణించి 8 శాతం లాభాన్ని మూటగట్టుకుంది. మౌలిక సదుపాయాల వృద్ధిపై నమ్మకంతో క్యాపిటల్ గూడ్స్ రంగానికి చెందిన సీజీ పవర్, సిమెన్స్, ఏబీబీ వంటి స్టాక్లు 5 నుండి 7 శాతం వరకు పెరిగాయి.
సీజీఎఫ్ఎంయూ పథకం కింద రూ. 515 కోట్ల క్లెయిమ్కు ఆమోదం లభించడంతో ఐడీఎఫ్ー ఫస్ట్ బ్యాంక్ షేరు 2 శాతం లాభపడగా, కొత్త ఆర్డర్ దక్కించుకోవడంతో హెచ్ఎఫ్సిఎల్ 7 శాతం పెరిగింది. మరోవైపు కెర్నెక్స్ మైక్రోసిస్టమ్స్ లాభాలను కోల్పోయి ఒత్తిడిలోకి జారుకుంది. అయితే, ఆర్థిక సంవత్సరం 2027 కి సంబంధించి కంపెనీ హెచ్చరికలతో కూడిన మేనేజ్మెంట్ వ్యాఖ్యలు చేయడంతో, ఇంట్రాడే గరిష్ట స్థాయిల నుండి కరారో ఇండియా ఏకంగా 20 శాతం పడిపోయి ఇన్వెస్టర్లకు షాక్ ఇచ్చింది.
Sign in with Google