టార్గెట్ రూ.6 లక్షల కోట్లు! ఒకే ఒక్క IPO తో ప్రపంచ రికార్డులను తిరగరాస్తున్న స్పేస్‌ఎక్స్!

ప్రపంచ కుబేరుడు ఎలోన్ మస్క్ ఏం చేసినా అందులో ఒక సంచలనం ఉంటుంది. ఇప్పుడు ఆయనకు చెందిన స్పేస్‌ఎక్స్ (SpaceX) కంపెనీ స్టాక్ మార్కెట్ చరిత్రలోనే ఎన్నడూ లేని విధంగా ఒక సరికొత్త రికార్డును సృష్టించడానికి రెడీ అయిపోయింది. ఈ కంపెనీ తీసుకొస్తున్న IPO (ఇనిషియల్ పబ్లిక్ ఆఫరింగ్) కోసం ప్రపంచవ్యాప్తంగా ఉన్న పెద్ద పెద్ద ఇన్వెస్టర్లు ఎగబడుతున్నారు. ఎంతలా అంటే, కంపెనీ ఆశించిన దానికి రెట్టింపు స్థాయిలో డిమాండ్ వచ్చి పడింది!

బ్లూమ్‌బెర్గ్ నివేదిక ప్రకారం.. బుధవారం అమెరికా మార్కెట్లు ముగిసే సమయానికి ఇన్‌స్టిట్యూషనల్ ఇన్వెస్టర్ల (పెద్ద సంస్థల) బుకింగ్స్ ముగియనున్నాయి. ఈ మార్కెట్ రేసులో స్పేస్‌ఎక్స్ ఏకంగా $150 బిలియన్ల (దాదాపు రూ.12.5 లక్షల కోట్ల) డిమాండ్‌ను రాబట్టింది. కంపెనీ మార్కెట్ నుంచి $75 బిలియన్లు సేకరించాలని అనుకుంటే.. దానికి డబుల్ పాపులారిటీతో ఈ IPO దూసుకుపోతోంది.

టార్గెట్ $75 బిలియన్లు.. వాల్యుయేషన్ ఎంతంటే?

స్పేస్‌ఎక్స్ కంపెనీ మొత్తం 555.6 మిలియన్ల షేర్లను, ఒక్కో షేరును $135 స్థిర ధరతో విక్రయానికి ఉంచింది. అంతా అనుకున్నట్లు జరిగితే, ఈ IPO ద్వారా కంపెనీ $75 బిలియన్లను సేకరిస్తుంది. దీనితో స్పేస్‌ఎక్స్ మార్కెట్ విలువ (Valuation) అక్షరాలా $1.8 ట్రిలియన్లకు చేరుకుంటుంది. అంటే ప్రపంచంలోనే అత్యంత విలువైన కంపెనీల జాబితాలో ఇది టాప్‌లోకి దూసుకెళ్తుంది.

ఇంతకుముందు 2019లో సౌదీ అరేబియాకు చెందిన చమురు దిగ్గజం 'సౌదీ అరామ్‌కో' $29.4 బిలియన్లు వసూలు చేసి ప్రపంచ రికార్డు సృష్టించింది. ఇప్పుడు మస్క్ ఆ రికార్డును చాలా ఈజీగా బద్దలు కొట్టబోతున్నారు. అయితే, కంపెనీ పబ్లిక్‌గా మారినప్పటికీ, ఎలోన్ మస్క్ నియంత్రణలోనే ఉంటుంది. ఆయన తనకున్న వాటాను ఏడాది పాటు విక్రయించకుండా లాక్ చేసుకున్నారు.

మనలాంటి సామాన్య ఇన్వెస్టర్లకు కూడా ఛాన్స్!

పెద్ద పెద్ద ఇన్వెస్టర్లకు బుధవారంతో గడువు ముగిసినప్పటికీ, రిటైల్ ఇన్వెస్టర్లకు (సామాన్య ఇన్వెస్టర్లకు) మరికొంత సమయం అందుబాటులో ఉంది. ఈ IPOలో దాదాపు 30 శాతం కోటాను సామాన్య ఇన్వెస్టర్ల కోసమే కేటాయించడం విశేషం. దీనివల్ల వాల్ స్ట్రీట్ పెద్ద కంపెనీలతో పాటు చిన్న ఇన్వెస్టర్లు కూడా స్పేస్‌ఎక్స్‌లో భాగస్వాములు అయ్యే అద్భుతమైన అవకాశం లభించింది.

బుధవారం బుక్ బిల్డింగ్ ముగిసిన తర్వాత, బ్యాంకులు షేర్ల ధరను , ఎవరికి ఎన్ని షేర్లు కేటాయించాలనేది జూన్ 11న ఫైనల్ చేస్తాయి. ఆ తర్వాత జూన్ 12 నుంచి అమెరికాలోని ప్రముఖ నాస్‌డాక్ (Nasdaq) ఎక్స్ఛేంజ్‌లో 'SPCX' అనే టిక్కర్ పేరుతో ఈ షేర్ల ట్రేడింగ్ అధికారికంగా ప్రారంభం కానుంది. డిమాండ్ విపరీతంగా ఉండటంతో, చాలా మంది ఇన్వెస్టర్లకు వారు అడిగిన దానికంటే తక్కువ షేర్లు వచ్చే ఛాన్స్ ఉంది.

గూగుల్ జెమిని డీల్‌తో పెరిగిన నమ్మకం

స్పేస్‌ఎక్స్ మార్కెట్లోకి రాకముందే ఇన్వెస్టర్లలో ఇంత నమ్మకం కలగడానికి ఒక ముఖ్యమైన కారణం ఉంది. ఇటీవల గూగుల్ పేరెంట్ కంపెనీ అయిన ఆల్ఫాబెట్‌తో స్పేస్‌ఎక్స్ ఒక భారీ ఒప్పందం చేసుకుంది. ఇందులో భాగంగా గూగుల్‌కు చెందిన 'జెమిని' (Gemini AI) ఆర్టిఫిషియల్ ఇంటెలిజెన్స్ విభాగం.. క్లౌడ్ సేవల కోసం స్పేస్‌ఎక్స్‌కు 2029 వరకు ప్రతి నెలా $920 మిలియన్లు చెల్లించనుంది. దీనితో పాటు ప్రముఖ ఏఐ స్టార్టప్ 'ఆంథ్రోపిక్' (Anthropic) తో కూడా ఇలాంటి ఒప్పందమే కుదిరింది. ఈ భారీ ఒప్పందాలు కంపెనీ భవిష్యత్తుపై ఇన్వెస్టర్లకు కొండంత నమ్మకాన్ని ఇచ్చాయి.

ఎలోన్ మస్క్ స్పేస్‌ఎక్స్ IPO గ్లోబల్ స్టాక్ మార్కెట్‌లో ఒక సరికొత్త విప్లవానికి తెరలేపబోతోంది. అంతరిక్ష రంగంలో తిరుగులేని శక్తిగా ఎదిగిన ఈ కంపెనీ, ఇప్పుడు ఫైనాన్స్ మార్కెట్‌లో కూడా రికార్డుల వేట మొదలుపెట్టింది. ఇన్వెస్టర్ల నుంచి వస్తున్న ఈ రెస్పాన్స్ చూస్తుంటే జూన్ 12న మార్కెట్ ఎంట్రీ అదిరిపోనుందని స్పష్టంగా అర్థమవుతోంది.