షేర్ మార్కెట్ క్రాష్: తుడిచిపెట్టుకుపోయిన లక్షల కోట్లు ... సెన్సెక్స్ 750points డౌన్..

ఈ వారం మొదటి రోజు అంటే సోమవారం దేశీయ స్టాక్ మార్కెట్ ప్రారంభ ట్రేడింగ్‌లో భారీ క్షీణతను చూస్తోంది. దింతో వరుసగా ఐదవ రోజు కూడా స్టాక్ మార్కెట్ క్షీణతతో ప్రారంభమైంది. ప్రపంచవ్యాప్తంగా షేర్ మార్కెట్లలో తగ్గుదల ప్రభావం దేశీయ మార్కెట్‌పై కనిపించింది. అమెరికన్ స్టాక్ మార్కెట్ కూడా క్షీణతను చూసింది. కన్స్యూమర్ల డిమాండ్ బలహీనంగా ఉండటం దీనికి తోడు సుంకాల భయాల కారణంగా US స్టాక్‌లు పడిపోయాయి. భారత స్టాక్ మార్కెట్లో అన్ని రంగాలలో అమ్మకాలు కనిపిస్తున్నాయి. ఉదయం బిఎస్‌ఇ సెన్సెక్స్ 550 పాయింట్లకు పైగా పడిపోయింది, నిఫ్టీ 22,650 పాయింట్ల దిగువకు చేరింది. జొమాటో, ఒఎన్‌జిసి 2 శాతం చొప్పున పడిపోయాయి. సెన్సెక్స్‌లోని 30 స్టాక్‌లలో 26 స్టాక్‌లు క్షీణతతో ట్రేడవుతున్నాయి. ఉదయం 9.42 గంటలకు సెన్సెక్స్ 750 పాయింట్లు లేదా 1% తగ్గి 74,560 పాయింట్ల వద్ద ట్రేడవుతోంది. నేషనల్ స్టాక్ ఎక్స్ఛేంజ్ నిఫ్టీ 50 ఇండెక్స్ కూడా 226 పాయింట్లు లేదా 0.99% తగ్గి 22,570 పాయింట్లకు చేరుకుంది.

ఈ పతనం కారణంగా, బిఎస్‌ఇ లిస్టెడ్ కంపెనీల మార్కెట్ క్యాప్ రూ.5.07 లక్షల కోట్లు తగ్గి రూ.397.13 లక్షల కోట్లకు చేరుకుంది. జొమాటో, హెచ్‌సిఎల్ టెక్, టిసిఎస్, టెక్ మహీంద్రా, హెచ్‌డిఎఫ్‌సి బ్యాంక్, ఇండస్‌ఇండ్ బ్యాంక్ షేర్లు నష్టాల్లో ప్రారంభమయ్యాయి. అదే సమయంలో సన్ ఫార్మా, మారుతి, ఎం అండ్ ఎం, బజాజ్ ఫిన్‌సర్వ్ ఇంకా నెస్లే ఇండియా షేర్లు ఓపెనింగ్ లాభాలను చవిచూశాయి. సెక్టార్ల విషయానికొస్తే, నిఫ్టీ ఐటీ ఇండెక్స్ 1.8% పడిపోయింది. LTTS, పెర్సిస్టెంట్ సిస్టమ్స్ అండ్ కోఫోర్జ్ షేర్లు క్షీణత ప్రభావాన్ని చూపించాయి. నిఫ్టీ ఫైనాన్షియల్ సర్వీసెస్, మీడియా, మెటల్, పీఎస్యూ బ్యాంక్, రియాల్టీ, కన్స్యూమర్ డ్యూరబుల్స్ సూచీలు కూడా 1% కంటే ఎక్కువ నష్టపోయాయి.

అమెరికా మార్కెట్ పరిస్థితి
ఫిబ్రవరిలో అమెరికాలో కన్స్యూమర్ విశ్వాసం 15 నెలల కనిష్ట స్థాయికి పడిపోయింది. మరోవైపు ద్రవ్యోల్బణం గురించి ఆందోళనలు పెరిగాయి. అమెరికా అధ్యక్షుడు డొనాల్డ్ ట్రంప్ టారిఫ్ ప్రణాళికల గురించి ఆందోళనలు ఇన్వెస్టర్ల మదిలో మెదులుతున్నాయి. తాజా నివేదికలో ఈ గణాంకాలు బయటకు వచ్చాయి. మొత్తంగా ఆసియాలోని చాలా మార్కెట్లు క్షీణించాయి. గత శుక్రవారం అమెరికన్ మార్కెట్‌లో కూడా క్షీణత ప్రభావం కనిపించింది. అయితే అభివృద్ధి గురించి ఆందోళనలు కూడా ఉన్నాయి.