Stock market: పెరుగుతున్న స్టాక్ మార్కెట్! చమురు ధరలు తగ్గడమే కారణమా? ఇన్వెస్టర్లు ఇప్పుడేం చేయాలంటే..

భారతీయ స్టాక్ మార్కెట్ (Stock Market) సోమవారం ట్రేడింగ్‌ను భారీ లాభాలతో ప్రారంభించింది. అంతర్జాతీయంగా నెలకొన్న సానుకూల పరిస్థితులు , ముడి చమురు ధరలు తగ్గడం ఇన్వెస్టర్లలో ఉత్సాహాన్ని నింపింది. ఉదయం 10 గంటల సమయానికి బిఎస్ఇ సెన్సెక్స్ 500 పాయింట్లకు పైగా లాభపడి 79,022.78 వద్ద ట్రేడవుతుండగా, నిఫ్టీ 50 కూడా 130 పాయింట్ల లాభంతో 24,495.75 వద్ద కొనసాగుతోంది. అసలు ఈ భారీ ర్యాలీకి దారితీసిన కారణాలను ఇప్పుడు క్షుణ్ణంగా పరిశీలిద్దాం.

1. ఇరాన్-అమెరికా శాంతి చర్చల ఆశలు

మధ్య ప్రాచ్యంలో నెలకొన్న ఉద్రిక్తతలు తగ్గుముఖం పట్టే సూచనలు కనిపిస్తున్నాయి. అమెరికాతో కొత్తగా శాంతి చర్చల్లో పాల్గొనేందుకు ఇరాన్ మొగ్గు చూపుతోందని వచ్చిన వార్తలు గ్లోబల్ మార్కెట్ సెంటిమెంట్‌ను బలపరిచాయి. హోర్ముజ్ జలసంధిలో నెలకొన్న నౌకాదళ దిగ్బంధం , వాణిజ్య అంతరాయాలు తొలగిపోతాయని ఇన్వెస్టర్లు ఆశిస్తున్నారు. ఇది భౌగోళిక రాజకీయ ముప్పును తగ్గించడమే కాకుండా ప్రపంచ వాణిజ్యానికి ఊతమిస్తుంది.

2. ముడి చమురు ధరల తగ్గుదల

శాంతి చర్చల వార్తల ప్రభావం చమురు ధరలపై స్పష్టంగా కనిపిస్తోంది. బ్రెంట్ క్రూడ్ 0.70 శాతం తగ్గి 94.81 డాలర్లకు చేరుకోగా, డబ్ల్యూటిఐ క్రూడ్ 1.06 శాతం తగ్గి 86.49 డాలర్ల వద్ద ఉంది. భారత్ వంటి చమురు దిగుమతి చేసుకునే దేశాలకు ఇది గొప్ప శుభవార్త. చమురు ధరలు తగ్గడం వల్ల ద్రవ్యోల్బణం అదుపులోకి రావడమే కాకుండా ఆర్థిక స్థిరత్వం పెరుగుతుంది, ఇది నేరుగా స్టాక్ మార్కెట్ (Stock Market) పై సానుకూల ప్రభావం చూపుతుంది.

3. విదేశీ ఇన్వెస్టర్ల (FII) కొనుగోళ్లు

గత కొన్ని సెషన్ల నుంచి విదేశీ సంస్థాగత ఇన్వెస్టర్లు నెట్ బయర్లుగా మారడం మార్కెట్‌కు పెద్ద అండగా నిలిచింది. ఏప్రిల్ 15న రూ. 666 కోట్లు, ఏప్రిల్ 17న రూ. 683 కోట్లు విలువైన షేర్లను ఎఫ్ఐఐలు కొనుగోలు చేశారు. ఈ స్థిరమైన నిధుల ప్రవాహం మార్కెట్లో లిక్విడిటీని పెంచి, ఇన్వెస్టర్ల నమ్మకాన్ని బలపరిచింది.

4. అన్ని రంగాల్లోనూ కొనుగోళ్ల జోరు

నేటి ర్యాలీ కేవలం కొన్ని స్టాక్స్‌కే పరిమితం కాకుండా అన్ని రంగాల్లోనూ కనిపిస్తోంది. నిఫ్టీ రియల్టీ ఇండెక్స్ దాదాపు 1.93 శాతం లాభంతో దూసుకుపోతోంది. పిఎస్‌యు బ్యాంకులు, ఫైనాన్షియల్ సర్వీసెస్, మీడియా రంగాల్లోనూ భారీగా కొనుగోళ్లు జరుగుతున్నాయి. మిడ్‌క్యాప్ , స్మాల్‌క్యాప్ ఇండెక్స్‌లు కూడా 0.70 శాతం నుంచి 0.90 శాతం వరకు లాభపడ్డాయి. ఏషియన్ పెయింట్స్, యాక్సిస్ బ్యాంక్, ఐసీఐసీఐ బ్యాంక్ వంటి దిగ్గజ షేర్లు టాప్ గైనర్లుగా నిలిచాయి.

5. త్రైమాసిక ఫలితాలపై అంచనాలు

దేశీయంగా కంపెనీల నాలుగో త్రైమాసిక ఫలితాలు (Quarterly Earnings) విడుదలవుతున్న తరుణంలో, బ్యాంకింగ్ , ఆర్థిక సేవల రంగం నుంచి బలమైన ఫలితాలు వస్తాయని ఇన్వెస్టర్లు భావిస్తున్నారు. ఈ సానుకూల అంచనాలు స్టాక్ స్పెసిఫిక్ మూవ్‌మెంట్స్‌కు కారణమవుతున్నాయి.
మొత్తంగా చెప్పాలంటే, అంతర్జాతీయ ఉపశమనం , దేశీయ బలం తోడవ్వడం వల్ల స్టాక్ మార్కెట్ (Stock Market) ఈరోజు కళకళలాడుతోంది. అయితే, గ్లోబల్ క్యూస్ , తదుపరి వచ్చే కంపెనీ ఫలితాల ఆధారంగా మార్కెట్ ఈ వేగాన్ని ఎంతవరకు కొనసాగిస్తుందనేది చూడాలి.