స్టాక్ మార్కెట్లో దుమ్మురేపిన SBI.. టీసీఎస్, ఐసీఐసీఐ బ్యాంక్‌లను వెనక్కి నెట్టి టాప్ 4 లోకి..

భారత అతిపెద్ద ప్రభుత్వ రంగ బ్యాంకు స్టేట్ బ్యాంక్ ఆఫ్ ఇండియా (SBI) మరోసారి దేశీయ స్టాక్ మార్కెట్‌లో సత్తా చాటింది. దలాల్ స్ట్రీట్‌లో సంచలన ప్రదర్శనతో SBI ఇప్పుడు మార్కెట్ క్యాపిటలైజేషన్ పరంగా టాటా కన్సల్టెన్సీ సర్వీసెస్ (TCS), ICICI బ్యాంక్‌లను వెనక్కి నెట్టి దేశంలో నాల్గవ అతిపెద్ద లిస్టెడ్ కంపెనీగా అవతరించింది. ఈ ఘనతకు ప్రధాన కారణం బ్యాంక్ ప్రకటించిన బలమైన Q3FY26 ఆర్థిక ఫలితాలే అని చెప్పవచ్చు.

ఫిబ్రవరి 11, 2026 నాటికి NSE డేటా ప్రకారం SBI మార్కెట్ క్యాపిటలైజేషన్ దాదాపు రూ.10.90 లక్షల కోట్లకు చేరింది. అదే సమయంలో ఐటీ దిగ్గజం TCS మార్కెట్ క్యాప్ రూ.10.52 లక్షల కోట్లకు తగ్గగా.. ప్రైవేట్ రంగ రుణదాత ICICI బ్యాంక్ మార్కెట్ విలువ రూ.10.07 లక్షల కోట్ల వద్ద నిలిచింది. మూడు వరుస ట్రేడింగ్ సెషన్లలో SBI షేరు ధర మొత్తం 11 శాతం లాభపడటం గమనార్హం. తాజా సెషన్‌లో మాత్రమే SBI షేరు 3 శాతం కంటే ఎక్కువగా పెరిగి రూ.1,181 వద్ద ముగిసింది. ఇక TCS షేరు ధర 2 శాతం కంటే ఎక్కువగా పడిపోయి రూ.2,909కి చేరగా, ICICI బ్యాంక్ షేరు పెద్దగా మార్పు లేకుండా రూ.1,409 వద్ద స్థిరపడింది.

మార్కెట్ క్యాపిటలైజేషన్ ర్యాంకింగ్స్‌ను పరిశీలిస్తే.. రిలయన్స్ ఇండస్ట్రీస్ ఇప్పటికీ అగ్రస్థానంలో కొనసాగుతోంది. దాని మార్కెట్ విలువ సుమారు రూ.19.87 లక్షల కోట్లు. రెండో స్థానంలో హెచ్‌డిఎఫ్‌సీ బ్యాంక్ ఉంది. దీనికి సుమారు రూ.14.26 లక్షల కోట్ల మార్కెట్ క్యాప్ ఉంది. మూడో స్థానంలో టెలికాం దిగ్గజం భారతి ఎయిర్‌టెల్ రూ.12.25 లక్షల కోట్ల మార్కెట్ విలువతో నిలిచింది. వీటి తర్వాత ఇప్పుడు SBI నాలుగో స్థానాన్ని దక్కించుకుంది.

SBI విజయానికి Q3FY26లో నమోదు చేసిన అద్భుతమైన ఆర్థిక పనితీరేనని చెప్పవచ్చు. ఈ త్రైమాసికంలో బ్యాంక్ నికర లాభం వార్షిక ప్రాతిపదికన 24 శాతం పెరిగి రూ.21,208 కోట్లకు చేరింది. ఇది SBI చరిత్రలోనే అత్యుత్తమ త్రైమాసిక లాభాల్లో ఒకటిగా నిలిచింది. ఈ వృద్ధికి ప్రధానంగా నికర వడ్డీ ఆదాయం (NII) పెరుగుదల, మెరుగైన ఆస్తి నాణ్యత, స్థిరమైన క్రెడిట్ వృద్ధి కారణమయ్యాయి. గత సంవత్సరం ఇదే త్రైమాసికంలో రూ.41,445 కోట్లుగా ఉన్న NII, ఈసారి 9 శాతం పెరిగి రూ.45,190 కోట్లకు చేరింది.

ఆస్తి నాణ్యత పరంగా కూడా SBI గణనీయమైన మెరుగుదల చూపించింది. Q2FY26లో రూ.76,243 కోట్లుగా ఉన్న స్థూల ఎన్‌పీఏలు, Q3FY26లో రూ.73,636 కోట్లకు తగ్గాయి. నికర ఎన్‌పీఏలు కూడా రూ.18,460 కోట్ల నుంచి రూ.18,012 కోట్లకు తగ్గడం విశేషం. ఫలితంగా స్థూల ఎన్‌పీఏ నిష్పత్తి 1.73 శాతం నుంచి 1.57 శాతానికి మెరుగుపడగా, నికర ఎన్‌పీఏ నిష్పత్తి 0.42 శాతం నుంచి 0.39 శాతానికి తగ్గింది.

ఈ బలమైన ఆర్థిక సూచీలు పెట్టుబడిదారుల్లో విశ్వాసాన్ని పెంచాయి. ప్రభుత్వ రంగ బ్యాంకుల పట్ల ఉన్న సందేహాలను SBI పనితీరు పూర్తిగా తిప్పికొట్టినట్లు కనిపిస్తోంది. మార్కెట్ నిపుణుల అభిప్రాయం ప్రకారం.. ఇదే ధోరణి కొనసాగితే SBI మరింత ఎత్తైన మార్కెట్ క్యాప్ స్థాయిలను కూడా చేరే అవకాశాలు ఉన్నాయని అంచనా వేస్తున్నారు.