బేబీ బూమర్ల సొమ్మంతా రాత్రికి రాత్రే కరిగిపోబోతోంది.. ఈ రెండు రంగాలు కుప్పకూలడం ఖాయమంటున్న Robert Kiyosaki

'రిచ్ డాడ్ పూర్ డాడ్' పుస్తక రచయిత, ప్రముఖ ఆర్థిక నిపుణుడు రాబర్ట్ కియోసాకి అంతర్జాతీయ ఆర్థిక పరిస్థితులపై ఎల్లప్పుడూ సూటిగా, నిర్మొహమాటంగా స్పందిస్తుంటారు. ముఖ్యంగా సోషల్ మీడియా వేదికగా ప్రస్తుత ఆర్థిక వ్యవస్థలోని లోపాలను ఎండగడుతూ, ఇన్వెస్టర్లను అప్రమత్తం చేస్తుంటారు.

ఈ క్రమంలోనే రాబోయే రోజుల్లో స్టాక్ మార్కెట్లు, రియల్ ఎస్టేట్ రంగాలు ఊహించని రీతిలో కుప్పకూలబోతున్నాయని హెచ్చరిస్తూ, ఎలాంటి బేర్ లేదా బుల్ మార్కెట్‌నైనా తట్టుకుని నిలబడేందుకు ముఖ్యంగా 'బేబీ బూమర్' (1946-1964 మధ్య జన్మించిన వృద్ధ తరం) తరానికి ఆయన కొన్ని కీలకమైన వ్యక్తిగత ఆర్థిక సిఫార్సులను అందించారు.

మొదటి వ్యక్తిగత ఆర్థిక సిఫార్సు: ఆర్థిక స్వాతంత్ర్యం అనే భావనపై బూమర్లు తమ ఆలోచనా విధానాన్ని మార్చుకోవాలని కియోసాకి సూచించారు. మార్కెట్ కుప్పకూలితే సాంప్రదాయ పదవీ విరమణ పథకాలైన 401(k) లేదా ఐఆర్ఏ (IRA) వంటి ఖాతాలలో దాచుకున్న సొమ్ము రాత్రికి రాత్రే కరిగిపోయే ప్రమాదం ఉంది. అందుకే కేవలం ఎస్‌అండ్‌పీ 500 (S&P 500) వంటి స్టాక్ మార్కెట్ సూచీలపై లేదా సాంప్రదాయ స్టాక్‌లపై మాత్రమే ఆధారపడకుండా, మార్కెట్ ఒడిదొడుకులకు గురికాని ప్రత్యామ్నాయ మార్గాల ద్వారా తమ పొదుపును పెంచుకోవాలని, సరికొత్త ఆదాయ వనరులను సృష్టించుకోవడంపై దృష్టి పెట్టాలని ఆయన స్పష్టం చేశారు.

రెండవ వ్యక్తిగత ఆర్థిక సిఫార్సు: ఇన్వెస్టర్లు తక్షణమే తమ ఇన్వెస్ట్‌మెంట్ పోర్ట్‌ఫోలియోను పునఃపరిశీలించుకోవాలని కియోసాకి గట్టిగా కోరుతున్నారు. అమెరికా చరిత్రలోనే ఎన్నడూ లేని విధంగా ఒక అతిపెద్ద స్టాక్ మార్కెట్ పతనం ముంచుకొస్తోందని, ఒకవేళ అదే జరిగితే ఇప్పటివరకు సురక్షితమైనవిగా భావించిన సాంప్రదాయ ఆస్తులన్నీ తీవ్ర నష్టాలను మిగిల్చే ప్రమాదకరమైన పందాలుగా మారిపోతాయని హెచ్చరించారు. మార్కెట్ సంక్షోభంలో పాత పద్ధతులైన 'కొనుగోలు చేసి అలాగే ఉంచుకోవడం' (Buy and Hold) ఏమాత్రం పనిచేయదని, కాబట్టి సమయం ఉన్నప్పుడే పోర్ట్‌ఫోలియోను సమీక్షించుకుని తగిన మార్పులు చేసుకోవడం ఉత్తమమని తెలిపారు.

Also Read

ప్రపంచ ఆర్థిక వ్యవస్థ సర్వనాశనం కాబోతోంది.. అలర్ట్ కాకుంటే అందరూ దివాలా తీస్తారంటున్న రాబర్ట్ కియోసాకి..

మూడవ అంశంగా.. రియల్ ఎస్టేట్ లేదా స్థిరాస్తుల పెట్టుబడులను పరిమితం చేసుకోవాలని లేదా పూర్తిగా వదిలించుకోవాలని కియోసాకి ఇచ్చిన సలహా చాలామందికి ఆశ్చర్యం కలిగిస్తోంది. ప్రస్తుతం గృహాల ధరలు సర్వకాలిక గరిష్ఠ స్థాయిలలో ఉన్నప్పటికీ, ఈ రియల్ ఎస్టేట్ బుడగ (Housing Bubble) త్వరలోనే పగిలిపోతుందని ఆయన గట్టిగా నమ్ముతున్నారు.

నా సొంత ఇల్లాన్ని నేను ఒక ఆస్తిగా (Asset) భావించడం లేదు" అని పేర్కొంటూ, ధరలు ఇంకా గరిష్టంగా ఉన్న ప్రస్తుత తరుణంలోనే ఇళ్లను అమ్మేసి లాభాలు స్వీకరించడం మంచిదని, అద్దె ఇళ్లలో ఉండటానికైనా సిద్ధపడాలని సూచించారు. సొంత ఇల్లే సర్వస్వంగా భావించే పాత తరానికి ఈ మాట మింగడం కష్టమే అయినా, భవిష్యత్తు నష్టాల నుండి తప్పించుకోవడానికి ఇది అవసరమన్నారు.

నాల్గవ అంశంగా.. కాగితపు కరెన్సీలపై నమ్మకం కోల్పోతున్న ఈ తరుణంలో భౌతిక రూపంలో ఉండే బంగారం, వెండితో పాటు సరికొత్త డిజిటల్ ఆస్తి అయిన బిట్‌కాయిన్ (Bitcoin) కొనుగోలు చేయాలని కియోసాకి బలమైన సిఫార్సు చేస్తున్నారు. మార్కెట్ అనిశ్చితిలో విలువైన లోహాలు ఎల్లప్పుడూ సురక్షితమైన ఆశ్రయంగా నిలుస్తాయని, అలాగే క్రిప్టోకరెన్సీ రంగం కొత్తదైనప్పటికీ అది సాంప్రదాయ మార్కెట్ పతనం నుండి రక్షణ కల్పించడమే కాకుండా భవిష్యత్తులో అత్యధిక వృద్ధిని, లాభాలను అందించగలదని Robert Kiyosaki విశ్లేషించారు.

చివరి అంశంగా.. బేబీ బూమర్లు తమ అదృష్టాన్ని పరీక్షించుకుంటూ మార్కెట్లోనే కొనసాగడం సురక్షితం కాదని హెచ్చరించారు. 1970ల నుండి రియల్ ఎస్టేట్, స్టాక్, బాండ్ మార్కెట్లలో వచ్చిన విపరీతమైన ఎదుగుదల వల్ల బూమర్ తరం ఆర్థికంగా బాగా లాభపడింది. అయితే 2020ల నాటికి ఈ తరం వృద్ధాప్యానికి చేరుకోవడం, వ్యవస్థలో వస్తున్న మార్పుల వల్ల ఈ మార్కెట్లన్నీ ఒకేసారి కుప్పకూలే ప్రమాదం పొంచి ఉందన్నారు. తాము నిర్మించుకున్న ఆర్థిక సామ్రాజ్యం కళ్లముందే చేజారిపోకముందే, ధరలు గరిష్టంగా ఉన్నప్పుడే ఇళ్లు, స్టాక్స్, బాండ్లను విక్రయించి నగదును సురక్షితం చేసుకోవాలని, ఈ విషయంలో ఏమాత్రం ఆలస్యం చేయవద్దని కియోసాకి.. బూమర్ తరానికి హితవు పలికారు.

డిస్క్లైమర్: ఈ వెబ్‌సైట్‌లోని అభిప్రాయాలు, సూచనలు పూర్తిగా వ్యక్తిగత విశ్లేషకులు లేదా ఇతర సంస్థలవి మాత్రమే. ఇవి Goodreturns.in లేదా Greynium Information Technologies Private Limited అధికారిక అభిప్రాయాలు కాదని గమనించగలరు.మేము ఈ విషయం యొక్క ఖచ్చితత్వం, సమగ్రత లేదా విశ్వసనీయతపై ఎటువంటి హామీ ఇవ్వడం కాని, అనుమతించడం కాని బాధ్యత వహించడం జరగదు. మేము ఎలాంటి పెట్టుబడి సలహా ఇవ్వము. అలాగే ఎటువంటి సెక్యూరిటీ కొనుగోలు లేదా అమ్మకాలు ప్రోత్సహించము. ఈ వెబ్‌సైట్‌లోని కథనం పూర్తిగా సమాచారం, విద్యా ప్రయోజనాల కోసమే అందించబడుతుంది. మీరు ఏదైనా పెట్టుబడి నిర్ణయం తీసుకునే ముందు, లైసెన్స్ పొందిన ఆర్థిక సలహాదారుల సహాయం తీసుకోండి. ఈ కథనాన్ని కేవలం సమాచారంగా మాత్రమే పరిగణించండి.