వడ్డీ రేట్లు తగ్గింపు.. స్టాక్ మార్కెట్లో పరుగులు పెట్టిన ఐటీ కంపెనీల షేర్లు..

2025 సెప్టెంబర్ 17న అమెరికా ఫెడరల్ రిజర్వ్ ఈ ఏడాది తొలిసారిగా వడ్డీ రేట్లను తగ్గించింది. 0.25% కోత విధించడం ద్వారా.. అమెరికా ఆర్థిక వ్యవస్థలో కొత్త ఉత్సాహాన్ని నింపే ప్రయత్నం చేసింది. వడ్డీ రేట్లు తగ్గిన వెంటనే ప్రపంచ మార్కెట్లలో ఉత్సాహం పెరిగింది. ఈ ప్రభావం భారత స్టాక్ మార్కెట్‌పై కూడా పడింది. ప్రత్యేకించి, అమెరికా మార్కెట్‌పై ఆధారపడే భారతీయ ఐటీ కంపెనీల షేర్లు ఊపందుకున్నాయి.

సెప్టెంబర్ 18న గురువారం ట్రేడింగ్ ప్రారంభమైన వెంటనే నిఫ్టీ ఐటీ ఇండెక్స్ లాభాల్లోకి ఎగబాకింది. వరుసగా మూడో రోజు కూడా ఈ సూచీ పాజిటివ్‌గా ముగిసింది. పెట్టుబడిదారుల దృష్టి మొత్తం ఐటీ రంగంపైనే పడింది. LTIMindtree షేర్లు అత్యధికంగా దూసుకెళ్లి 3.6% లాభపడి రూ. 5,619 వద్ద ట్రేడ్ అయ్యాయి. Infosys, Wipro షేర్లు కూడా వెనుకబడకుండా ఒక్కొక్కటి 2 శాతం చొప్పున పెరిగాయి. ఎంఫసిస్, కోఫోర్జ్, HCL టెక్ వంటి ఇతర కంపెనీల షేర్లు కూడా 1 శాతం వరకూ లాభపడి ఈ రంగానికి ఉత్సాహాన్ని జోడించాయి.

Fed ఎందుకు వడ్డీ రేట్లు తగ్గించిందన్న ప్రశ్న ఇక్కడ సహజంగానే వస్తుంది. అమెరికా కార్మిక మార్కెట్ బలహీనత చూపించటం ఈ నిర్ణయానికి ప్రధాన కారణంగా చెప్పుకోవచ్చు. ఉద్యోగాల సృష్టి తగ్గిపోవడం, వేతనాల పెరుగుదల మందగించడం, వినియోగదారుల ఖర్చు తగ్గడం వంటి అంశాలు ఆర్థిక నెమ్మదింపును సూచించాయి. అందుకే ఫెడ్ రిస్క్ మేనేజ్‌మెంట్ దృక్పథంతో ఈ కోత విధించింది. అయితే, ఇది కేవలం జాగ్రత్త చర్య మాత్రమేనని, భవిష్యత్తులో పెద్ద ఎత్తున లేదా వేగంగా వడ్డీ రేట్లు తగ్గించే అవకాశం తక్కువని ఫెడ్ చైర్మన్ జెరోమ్ పావెల్ స్పష్టం చేశారు.

ఇక వడ్డీ రేట్లు తగ్గడంతో అమెరికాలో రుణాలు చౌకవుతాయి. ఫలితంగా వ్యక్తులు, కంపెనీలు ఎక్కువగా ఖర్చు చేయగలుగుతారు. ఖర్చులు పెరిగితే డిజిటల్ సేవలు, అవుట్‌సోర్సింగ్ అవసరం కూడా పెరుగుతుంది. భారతీయ ఐటీ సంస్థలు తమ ఆదాయంలో పెద్ద భాగాన్ని అమెరికా నుంచే పొందుతున్నాయి. కాబట్టి అక్కడ డిమాండ్ పెరగడం అంటే ఇక్కడ ఆదాయం పెరగడమే. అదే సమయంలో తక్కువ వడ్డీ రేట్లు అమెరికన్ పెట్టుబడిదారులను అధిక లాభాల కోసం భారత మార్కెట్లకు ఆకర్షిస్తాయి. ఈ రెండు అంశాలు కలిపి ఐటీ షేర్లపై నేరుగా సానుకూల ప్రభావం చూపాయి.

అయితే, ఈ ప్రక్రియ అంత తేలికైనది కాదని విశ్లేషకులు చెబుతున్నారు. గ్లోబల్ టెక్నాలజీ ఖర్చులు ఇంకా నెమ్మదిగానే ఉన్నాయి. ఆర్టిఫిషియల్ ఇంటెలిజెన్స్ వంటి కొత్త సాంకేతికతల వలన సాంప్రదాయ ఐటీ సేవల డిమాండ్‌పై ఒత్తిడి పెరుగుతోంది. అయినప్పటికీ, ఫెడ్ రేట్ కోత పెట్టుబడిదారులకు కొత్త ఆశలు రేకెత్తించింది. మార్కెట్‌లో ఒక నమ్మకం కలిగించి, తాత్కాలికంగా అయినా ఐటీ రంగానికి ఊపునిచ్చింది.

ఏదేమైనా ఫెడ్ వడ్డీ రేట్లు తగ్గించిన నిర్ణయం Infosys, Wipro, LTIMindtree వంటి భారతీయ ఐటీ దిగ్గజాలకు తక్షణ లాభాలను అందించింది. పెట్టుబడిదారుల మనసుల్లో కొత్త ఉత్సాహం నింపి, ఈ రంగం ముందుకు పాజిటివ్ దిశలో కదలడానికి మార్గం సుగమం చేసింది.

డిస్క్లైమర్: ఈ వెబ్‌సైట్‌లోని అభిప్రాయాలు, సూచనలు పూర్తిగా వ్యక్తిగత విశ్లేషకులు లేదా ఇతర సంస్థలవి మాత్రమే. ఇవి Goodreturns.in లేదా Greynium Information Technologies Private Limited అధికారిక అభిప్రాయాలు కాదని గమనించగలరు.మేము ఈ విషయం యొక్క ఖచ్చితత్వం, సమగ్రత లేదా విశ్వసనీయతపై ఎటువంటి హామీ ఇవ్వడం కాని, అనుమతించడం కాని బాధ్యత వహించడం జరగదు. మేము ఎలాంటి పెట్టుబడి సలహా ఇవ్వము. అలాగే ఎటువంటి సెక్యూరిటీ కొనుగోలు లేదా అమ్మకాలు ప్రోత్సహించము. ఈ వెబ్‌సైట్‌లోని కథనం పూర్తిగా సమాచారం, విద్యా ప్రయోజనాల కోసమే అందించబడుతుంది. మీరు ఏదైనా పెట్టుబడి నిర్ణయం తీసుకునే ముందు, లైసెన్స్ పొందిన ఆర్థిక సలహాదారుల సహాయం తీసుకోండి. ఈ కథనాన్ని కేవలం సమాచారంగా మాత్రమే పరిగణించండి