IPO News: లాభాల తుక్కు రేగ్గొట్టిన ఎస్ఎమ్ఈ ఐపీవో.. తొలిరోజే 90% ప్రీమియం లిస్టింగ్, ఇన్వెస్టర్స్ పండగో..

Rajesh Power IPO: డిసెంబర్ నెల ప్రారంభమైనప్పటికీ ఈక్విటీ మార్కెట్లు మాత్రం ఇంకా ఒడిదొడుకుల్లోనే ఉన్నాయి. దేశీయ స్టాక్ మార్కెట్లు ఈ క్రమంలో నష్టాల్లో కొనసాగుతున్నప్పటికీ ఐపీవోలు మాత్రం సూపర్ లాభాల లిస్టింగ్ నమోదు చేశాయి. దీంతో ఐపీవోలపై బెట్టింగ్ వేసిన ఇన్వెస్టర్లు ప్రస్తుతం పండుగ చేసుకుంటున్నారు.

ఇప్పుడు మనం మాట్లాడుకోబోతున్నది రాజేష్ పవర్ సర్వీసెస్ కంపెనీ షేర్ల గురించే. కంపెనీ షేర్లు నేడు బీఎస్ఈ ఎస్ఎమ్ఈ కేటగిరీలో లిస్ట్ అయ్యాయి. తొలిరోజే ఐపీవో ఇష్యూ రేటు కంటే 90 శాతం ప్రీమియం ధర రూ.636 వద్ద అడుగుపెట్టడంతో ఇన్వెస్టర్లు సంతోషంలో ఉన్నారు. వాస్తవానికి దేశీయ స్టాక్ మార్కెట్లు బలహీనంగా ప్రారంభమైన వేళ స్టాక్ మాత్రం గ్రేమార్కెట్లో ఇన్వెస్టర్లు అంచనాలకు అనుగుణంగా బలమైన జాబితాను నమోదు చేసింది. దీనికి తోడు లిస్టింగ్ తర్వాత కూడా కంపెనీ షేర్లను కొనుగోలు చేసేందుకు ఇన్వెస్టర్ల నుంచి భారీగా డిమాండ్ ఉండటంతో స్టాక్ ధర రూ.668.30 స్థాయికి ఎగబాకింది. దీంతో తొలిరోజే ఇన్వెస్టర్లు ఏకంగా 100 శాతం లిస్టింగ్ గెయిన్స్ పొందారు.

వాస్తవానికి ఐపీవో ద్వారా కంపెనీ దేశీయ స్టాక్ మార్కెట్ల నుంచి రూ.160.47 కోట్లను సమీకరించింది. అయితే ఇందులో రూ.93.47 కోట్లకు తాజా ఈక్విటీ విక్రయం ఉండగా.. మిగిలిన రూ.67 కోట్లను ఆఫర్ ఫర్ సేల్ ద్వారా విక్రయించటానికి 20 లక్షల షేర్లను ఇష్యూలో విక్రయించింది. రిటైల్ ఇన్వెస్టర్ల కోసం కంపెనీ ఐపీవో నవంబర్ 25 నుంచి నవంబర్ 27 వరకు అందుబాటులో ఉంది. అలాగే కంపెనీ తన ఐపీవో ప్రైస్ బ్యాండ్ ధరను ఒక్కో షేరుకు రూ.319-335గా ఉంచింది. ఈ క్రమంలో కంపెనీ లాట్ పరిమాణాన్ని 400 షేర్లుగా నిర్ణయించటంతో ఇన్వెస్టర్లు ఐపీవోలో పాల్గొనటానికి కనీసం రూ.1.34 లక్షలు ఇన్వెస్ట్ చేయాల్సి వచ్చింది. ఈ క్రమంలో కంపెనీ యాంకర్ ఇన్వెస్టర్ల నుంచి రూ.44.77 కోట్లను సమీకరించింది.

ఐపీవో ఇష్యూ బుక్కింగ్ గురించి పరిశీలిస్తే రిటైల్ ఇన్వెస్టర్ల విభాగం 31.96 రెట్లు, ఎన్ఐఐ విభాగం 138.46 రెట్లు, క్యూఐబీ పోర్షన్ 46.39 సార్లు సభ్యత్వాన్ని పొందాయి. తాజా ఐపీవో ద్వారా సమీకరించిన మెుత్తాన్ని కంపెనీ కేబుల్ గుర్తింపు, టెస్టింగ్ అండ్ ఫాల్ట్ లొకేషన్ పరికరాల సహా అనేక కీలక ప్రయోజనాల కోసం ఉపయోగించాలని భావిస్తోంది. ఇదే క్రమంలో ఈ సొమ్ములో కొంత భాగాన్ని 1300 KW DC సోలార్ పవర్ ప్లాంట్‌ను ఏర్పాటు చేయడానికి, ఎలక్ట్రోలైజర్‌ల వంటి అనుబంధ పరికరాలతో పాటు గ్రీన్ హైడ్రోజన్ ఉత్పత్తికి సంబంధించిన సాంకేతిక నైపుణ్యం, అంతర్గత అభివృద్ధికి మద్దతు ఇవ్వడానికి నిధులను ఉపయోగించాలని చూస్తోంది. 1971లో స్థాపించబడిన రాజేష్ పవర్ సర్వీసెస్ లిమిటెడ్ రాష్ట్ర ట్రాన్స్ మిషన్ అండ్ డిస్ట్రిబ్యూషన్ సంస్థలు, ప్రైవేట్ యుటిలిటీలు పరిశ్రమలకు కన్సల్టెన్సీని అందిస్తుంది.